ຫຼັງຈາກມີຄວາມຂັດແຍ່ງທາງການທູດແບບບໍ່ໄປບໍ່ມາ ກັບເຈົ້າໜ້າທີ່ ຂອງກຸ່ມຕາລີບານທີ່ແທ້ຈິງມາໄດ້ເກືອບ 2 ປີ ແລ້ວ ວໍຊິງຕັນກຳລັງທົບທວນນະໂຍບາຍກ່ຽວກັບອັຟການິສຖານຂອງຕົນເພື່ອເປັນການຕອບກັບ ຕໍ່ສິ່ງທີ່ເຈົ້າໜ້າທີ່ສະຫະລັດເອີ້ນວ່າການປົກຄອງທີ່ “ເຄັ່ງຄັດ” ຂອງກຸ່ມຕາລີບານ.
ການທົບທວນຄືນດັ່ງກ່າວມີຂຶ້ນ ໃນຂະນະທີ່ມີລາຍງານວ່າອົງການສະຫະປະຊາຊາດກຳລັງພິຈາລະນາ ໂຈະການປະຕິບັດງານຢູ່ໃນອັຟການິສຖານ ເນື່ອງຈາກວ່າ ກຸ່ມຕາລີບານໄດ້ຫ້າມບໍ່ໃຫ້ແມ່ຍິງອາຟການິສຖານ ເຮັດວຽກໃນໜ່ວຍງານ ຂອງອົງການສະຫະປະຊາຊາດ.
“ລັດຖະບານສະຫະລັດ ໄດ້ທົບທວນຄືນແນວທາງຂອງຕົນ ແລະ ການພົວພັນ ກັບກຸ່ມຕາລີບານ ໃນສະພາບຂອງຄຳສັ່ງທີ່ເຂັ້ມງວດຫຼາຍຂຶ້ນຂອງພວກເຂົາ ທີ່ແນໃສ່ ແລະມີການຈຳແນກຕໍ່ແມ່ຍິງ ແລະເດັກຍິງ ໃນອັຟການິສຖານ,” ນັ້ນຄືຄຳເວົ້າຂອງໂຄສົກການຕ່າງປະເທດ ກ່າວຕໍ່ວີໂອເອ.
ໂດຍບໍ່ຫວັ່ນໄຫວຕໍ່ການປະນາມຈາກທົ່ວໂລກ ກ່ຽວກັບນະໂຍບາຍຫຍຽດແມ່ຍິງຂອງເຂົາເຈົ້າ, ລວມທັງຈາກບັນດາປະເທດທີ່ມີປະຊາກອນສ່ວນໃຫຍ່ເປັນມຸສລິມ, ກຸ່ມຕາລີບານຢືນຢັນວ່າ ການກີດກັນຜູ້ຍິງບໍ່ໃຫ້ໄດ້ຮັບການສຶກສາ, ການເຮັດວຽກ ແລະ ການມີສ່ວນຮ່ວມທາງການເມືອງ ແມ່ນບັນຫາພາຍໃນຂອງອັຟການິສະຖານ.
ສຽງທີ່ເຄັ່ງຄັດຂຶ້ນຂອງວໍຊິງຕັນແມ່ນມີຂຶ້ນໃນຂະນະທີ່ມີລາຍງານວ່າເລຂາທິການໃຫຍ່ຂອງອົງການສະຫະປະຊາຊາດທ່ານ ແອນໂຕນິໂອ ກູເຕເຣັສ (Antonio Guterres) ກໍາລັງວາງແຜນທີ່ຈະຈັດກອງປະຊຸມສາກົນໃນເດືອນພຶດສະພາ ເພື່ອປຶກສາຫາລື ກ່ຽວກັບຄວາມເປັນໄປໄດ້ ທີ່ຈະໃຫ້ກຸ່ມຕາລີບານ ບ່ອນນັ່ງຢູ່ໃນກອງປະຊຸມໃຫຍ່ຂອງອົງການສະຫະປະຊາຊາດ ເພື່ອແລກປ່ຽນ ກັບການຕ່າວປີ້ນການຈຳກັດຕໍ່ແມ່ຍິງອັຟການຂອງລະບອບປົກຄອງອິສລາມ.
ເມື່ອຖືກຖາມກ່ຽວກັບເປົ້າໝາຍຂອງກອງປະຊຸມທີ່ໄດ້ສະເໜີໃນວັນພຸດວານນີ້, ເອກອັກຄະລັດຖະທູດຣັດເຊຍປະຈໍາອົງການສະຫະປະຊາຊາດ ທ່ານ ວາສຊີລີ ເນເບນເຊຍ (Vassily Nebenzia) ກ່າວຕໍ່ບານດານັກຂ່າວໃນນະຄອນນິວຢອກວ່າ ທ່ານບໍ່ເຊື່ອວ່າກຸ່ມດັ່ງກ່າວຈະພິຈາລະນາການຮັບຮູ້ນັ້ນ.