ສະຫະລັດ ປະນາມ ອັນທີ່ຕົນຮ້ອງວ່າ ລາຍງານການໂຈມຕີ
ແບບ “ປ່າເຖື່ອນ” ໂດຍບັນດາເຮືອບິນເຮລິຄອບເຕີຊີເຣຍ
ທີ່ໄດ້ຖີ້ມລະເບີດຖັງລົງໃສ່ ສູນອົບພະຍົບ ຊຶ່ງພາກັນຫລົບໜີ
ສົງຄາມກາງເມືອງ ທີ່ດຳເນີນມາໄດ້ສາມປີເຄິ່ງແລ້ວນັ້ນ.
ກຸ່ມສີ້ງຊອມສິດທິມະນຸດຊີເຣຍ ທີ່ມີຫ້ອງການຢູ່່ອັງກິດ ກ່າວ
ວ່າ ການໂຈມຕີໃນ ວັນພຸດວານນີ້ ທີ່ແຂວງ Idlib ໄດ້ເຮັດໃຫ້
ມີຜູ້ເສຍຊີວິດຢ່າງໜ້ອຍ 10 ຄົນ.
ໂຄສົກຍິງ ກະຊວງຕ່າງປະເທດ ສະຫະລັດ ທ່ານນາງ Jen
Psaki ກ່າວວ່າ ສະຫະລັດບໍ່ສາມາດຢືນຢັນກ່ຽວກັບລາຍລະ
ອຽດໄດ້ໃນທັນທີ ແຕ່ວ່າ “ຕື່ນຕົກ ໃຈ” ໃນລາຍງານນີ້ ແລະໄດ້ກ່າວມາໂດຍຕະຫຼອດ ຕ້ານການກະທຳ ຂອງລັດ ຖະບານຊີເຣຍ "ທີ່ບໍ່ໃຫ້ຄວາມສຳຄັນຕໍ່ຊີວິດຂອງມະນຸດ.”
ອົບພະຍົບ ຊີເຣຍ ໃນ ເທີກີ
ທ່ານນາງ Psaki ຍັງໄດ້ກ່າວຍໍ້າເຖິງຄວາມຈຳເປັນ ທີ່ຊີເຣຍຕ້ອງເປັນຜູ້ຮັບຜິດ ຊອບ ກ່ຽວກັບການກະທຳຕ່າງໆຕໍ່ພົນລະເຮືອນ ໃນລະຫວ່າງທີ່ເກີດບັນຫາຂັດແຍ້ງ ທີ່ເລີ້ມ
ດ້ວຍການປະທ້ວງແບບສະຫງົບໃນເດືອນມີນາ ປີ 2011 ກ່ອນທີ່ ຈະກາຍເປັນສົງຄາມ
ທີ່ເຮັດໃຫ້ເກືອບ 200,000 ຄົນເສຍຊີວິດ.
ການສູ້ລົບໄດ້ບັງຄັບໃຫ້ອົບພະຍົບກວ່າ 3 ລ້ານຄົນ ພາກັນຫລົບໜີ ໄປຫາປະເທດ
ເພື່ອນບ້ານ ແລະອີກ 6 ລ້ານ 5 ແສນຄົນ ຕ້ອງຫລົບໜີໄປຈາກເຮືອນ ຊ້ານບ້ານຊ່ອງ
ຢູ່ໃນຊີເຣຍເອງ.
ຄະນະກຳມະການສະຫະປະຊາຊາດ ໄດ້ພິມເຜີຍແຜ່ລາຍງານເປັນປະຈຳ ກ່ຽວກັບ
ສະພາບການດ້ານສິດທິມະນຸດ ຢູ່ໃນຊີເຣຍ ໃນຂະນະທີ່ເກີດສົງຄາມ ໂດຍ ມີການ
ພົບເຫັນວ່າ ທະຫານລັດຖະບານໄດ້ທຳການໂຈມຕີໃນຂອບເຂດທີ່ກວ້າງ ຂວາງຕໍ່
ພົນລະເຮືອນຢູ່ເປັນປະຈຳ.
