ສະຫະລັດ ຍ້າຍນັກໂທດທີ່ຕິດຄຸກຢູ່ອ່າວກວນຕານາໂມ ກັບຄືນມາເລເຊຍ ຫຼັງຈາກຍອມສາລະພາບຜິດ

ສະຫະລັດ ຍ້າຍນັກໂທດຊາວມາເລເຊຍ ສອງຄົນທີ່ຖືກຂັງຢູ່ຄຸກໃນອ່າວ ກວນຕານາໂມ ຂອງປະ​ເທດຄິວບາ ກັບຄືີນປະເທດ ຫຼັງຈາກທີ່ພວກເຂົາຍອມສາລະພາບຜິດ ໃນຂໍ້ຫາທີ່ກ່ຽວຂ້ອງກັບເຫດການລະເບີດທີ່ເກາະບາຫຼີ ໃນ ອິນໂດເນເຊຍ ເມື່ອປີ 2002 ແລະຕົກລົງໃຫ້ຂໍ້​ມູນເຖິງຜູ້ນຳຂະບວນການ ກໍ່ເຫດ ຕາມລາຍງານຂອງກະຊວງປ້ອງກັນປະເທດສະຫະລັດ ເຊິ່ງລາຍງານ ໂດຍອົງການຂ່າວເອພີ.

ໄອຍະການກ່າວວ່າທ້າວ ໂມຮຳເມັດ ຟາຣິກ ຍິນ ອາມິນ ແລະ ​ທ້າວ ໂມຮຳເມັດ ນາເຊຍຣ໌ ບິນ ເລປ ເຮັດວຽກໃຫ້ກັບເອັນເຊບ ນູຣຈາມານ ຫຼືທີ່ຮູ້ຈັກກັນໃນຊື່ ຮຳບາລີ ຜູ້ນຳກຸ່ມຈາມາຫ໌ ອິສລາມິຢາຫ໌ ໃນອິນໂດເນເຊຍ ເຊິ່ງເປັນສາຂາຂອງກຸ່ມກໍ່ການຮ້າຍ ອາລໄຄດາ ເປັນເວລາຫຼາຍປີ, ຮວມເຖິງ ການຊ່ອຍເຫຼືອໃຫ້ທ້າວ ຮຳບາລີ ຫລົບໜີການຈັບກຸມຫຼັງເກີດເຫດລະເບີດ ເມື່ອວັນທີ 12 ຕຸລາ 2002 ທີ່ມີຜູ້ເສຍຊີວິດ 202 ຄົນ.

ຖະແຫລງການຂອງທຳ​ນຽບ​ຫ້າ​ແຈ ລະບຸວ່າ ນັກໂທດທັງສອງຄົນຍອມສາລະ ພາບຜິດໃນຂໍ້ຫາສົມຮູ້ຮ່ວມຄິດ ແລະຂໍ້ຫາອື່ນໆ ເມື່ອເດືອນມັງກອນ ໂດຍການ ສົ່ງໂຕກັບໄປ ມາເລເຊຍ ຄັງນີ້ ເກີດຂຶ້ນຫລັງຈາກພວກເຂົາຕົກລົງທີ່ຈະໃຫ້ການ ທີ່ເປັນປະໂຫຍດຕໍ່ການດຳເນີນຄະດີກັບທ້າວ ຮຳບາລີ ຜູ້ທີ່ເຊື່ອວ່າ ເປັນຜູ້ບົງ ການວາງລະເບີດດັ່ງກ່າວ.

ທັງນີ້ທ້າວ ນູຣ໌ຈາມານ ຫຼື ຮຳບາລີ ຍັງຄົງຖືກຄວບຄຸມໂຕໄວ້ທີ່ຄຸກອ່າວ ກວນຕາານາໂມ ເພື່ອການສືບສວນໃນເດືອນມັງກອນ ສືບເນື່ອງຈາກເຫດ ລະເບີດທີ່ບາຫຼີ ແລະການໂຈມຕີອື່ນໆ.

ອະດີດປະທານາທິບໍດີສະຫະລັດ ທ່ານ ຈອຣ໌ຈ ດັບໂບຢູ ບຸຊ ໄດ້ຕັ້ງຫານທະ ຫານ ແລະຄຸກທີ່ຖານທັບເຮືອສະຫະລັດ ຢູ່ທີ່ອ່າວກວນຕານະໂມ ປະເທດເກາະ ຄິວບາ ຫລັງເຫດການຜູ້ກໍ່ການຮ້າຍໂຈມຕີສະຫະລັດ ເມື່ອວັນທີ 11 ກັນຍາ ປີ 2001 ຫຼື 9/11 ທີ່ນຳໄປສູ່ສົ່ງຄາມຕໍ່ຕ້ານຜູ້ກໍ່ການຮ້າຍ.

ໃນຊ່ວງນຶ່ງ ມີນັກໂທດທີ່ຄຸກອ່າວກວນຕານາໂມຫຼາຍຮ້ອຍຄົນ ສ່ວນໃຫຍ່ເປັນ ຊາວມຸສລິມ ແລະຂະນະນີ້ ຍັງມີນັກໂທດຖືກຄຸມຂັງທີ່ຄຸກແຫ່ງນີ້ 27 ຄົນ.

ແລະໃນວັນອັງຄານທີ່​ຜ່ານ​ມາ ເຈົ້າໜ້າທີ່ສະຫະລັດ ຍັງໄດ້ປ່ອຍໂຕຊາຍຊາວ ເຄນຢາ ຊື່ ໂມຮຳເມັດ ອັບດຸລ ມາລິກ ບາຈາບູ ກັບປະເທດຫຼັງຈາກທີ່ລາວ ຖືກຄວບຄຸມໂຕໄວ້ທີ່ຄຸກອ່າວກວດຕານາໂມ ເຖິງ 17 ປີ ໂດຍບໍ່ມີການຕັ້ງຂໍຫາ ໃດໆ.

ການປ່ອຍໂຕຄັ້ງນີ້ ເຮັດໃຫ້ເຫຼືອຜູ້ທີ່ຖືກຈັບກຸມອີກ 15 ຄົນທີ່ຍັງຖືກຄວບຄຸມ ໂຕໄວ້ໂດຍບໍ່ມີການຕັ້ງຂໍ້ຫາ ເຊິ່ງທາງການສະຫະລັດ ລະບຸວ່າ ກຳລັງຫາປະ ເທດທີ່ເໝາະສົມສຳລັບນັກໂທດເຫຼົ່ານັ້ນ ເຊິ່ງສ່ວນໃຫຍ່ມາຈາກ ເຢເມນ ທີ່ຖືກຄອບຄອງໂດຍກຸ່ມຕິດອາວຸດທີ່ໄດ້ຮັບການສະໜັບສະໜູນຈາກອີຣ່ານ.

ອົງການ​ນິ​ລະ​ໂທ​ກຳ​ສາ​ກົນຫຼື Amnesty International ​ໄດ້ກະຕຸ້ນໃຫ້ປະທາ ນາທິບໍດີ ໂຈ ໄບເດັນ ປ່ອຍໂຕນັກໂທດທີ່ບໍ່ມີຂໍ້ຫາເຫຼົ່ານັ້ນ ໃຫ້ເປັນອິດສະຫຼະ ກ່ອນທີ່ຈະພົ້ນຈາກຕຳແໜ່ງໃນເດືອນມັງກອນ ປີໜ້ານີ້.