ສື່ຂອງທາງການຈີນໄດ້ຕໍາໜິ
ການລາຍງານຂອງສະຫະລັດ
ກ່ຽວກັບສິດເສລີພາບໃນການ
ນັບຖືສາສະໜາຢູ່ໃນທົ່ວໂລກ
ວ່າ ການເປີດເຜີຍລາຍງານນີ້
ແມ່ນບໍ່ພາໃຫ້ເກີດຜົນໃດໆ.
ອົງການຂ່າວຊິນຫົວຂອງທາງ
ການຈີນ ກ່າວຢູ່ໃນບົດວິຈານໃນ
ວັນອັງຄານມື້ນີ້ ວ່າ ລາຍງານ
ດັ່ງກ່າວແມ່ນເປັນເຄື່ອງມືທາງ
ການເມືອງຢ່າງນຶ່ງ ແລະວ່າ
ສະຫະລັດ ກໍາລັງບັງຄັບໃຫ້
ປະເທດອື່ນໆ ຮັບເອົາມາດ
ຕະຖານດ້ານນະໂຍບາຍທາງ
ສາສະໜາຂອງຕົນ.
ລາຍງານປະຈໍາປີຂອງກະຊວງການຕ່າງປະເທດສະຫະລັດ ທີ່ນໍາອອກເປີດເຜີຍໃນວັນຈັນ
ວານນີ້ ກ່າວວ່າ ການເຄົາລົບຕໍ່ເສລີພາບໃນການນັບຖືສາສະໜາຂອງຈີນນັ້ນໄດ້ເສື່ອມໂຊມ
ລົງ ຮວມທັງຢູ່ໃນຂົງເຂດຂອງຊາວທິເບດ ແລະໃນການປາບປາມຊາວມຸສລິມ ທີ່ອາໄສ
ຢູ່ເຂດ Xinjiang ນັ້ນ ນໍາ.
ລາຍງານໄດ້ບົ່ງຊື່ຈີນວ່າ ເປັນ 1 ໃນ 8 ປະເທດທີ່ໜ້າເປັນຫ່ວງກັງວັນກ່ຽວກັບເລື່ອງນີ້.
ປະເທດອື່ນໆນັ້ນກໍມີ ມຽນມາ, Eritrea, Iran ເກົາຫຼີເໜືອ, Saudi Arabia, Sudan, ແລະ Uzbekistan.
ລາຍງານດັ່ງກ່າວຍັງເນັ້ນເຖິງການໃຊ້ກົດໝາຍປາບປາມການທໍາລາຍຊື່ສຽງຂອງສາສະໜາ
ໃນບັນດາປະເທດມຸສລິມ ຮວມທັງ Saudi Arabia, Pakistan ແລະ Afghanistan.
ແລະຍັງກ່າວອີກວ່າ ໃນເກົາຫຼີເໜືອນັ້ນ ອິດສະລະພາບໃນການນັບຖືສາສະໜາແມ່ນບໍ່ມີເລີຍ.