ປະທານາທິບໍດີສະຫະລັດ ທ່ານບາຣັກ ໂອບາມາ ແລະອະດີດ
ປະທານາທິບໍດີ George W. Bush ໄດ້ເຂົ້າຮ່ວມພິທີ ລະນຶກ
ເຖິງວັນຄົບຮອບ 50 ປີທີ່ຕຳຫຼວດໄດ້ທຸບຕີພວກເດີນຂະບວນ ຮຽກຮ້ອງເອົາສິດທິພົນລະເມືອງຢ່າງສັນຕິທີ່ເມືອງ Selma ລັດ
Alabama. ເຫດການດັ່ງກ່າວ ໄດ້ກາຍມາເປັນທີ່ຮູ້ກັນວ່າ ວັນ
ອາທິດທີ່ນອງເລືອດ. ວັນຄົບຮອບນີ້ ແມ່ນຖືເປັນໂອກາດ ລະ
ນຶກເຖິງຄວາມກ້າວໜ້າດ້ານສິດທິພົນລະເມືອງທີ່ໄດ້ຮັບມາໃນ
ໄລຍະ 50 ປີ. ດັ່ງທີ່ Marcus Harton ຜູ້ສື່ຂ່າວວີໂອເອ ລາຍ
ງານມາກໍແມ່ນວ່າມັນຍັງເປັນໂອກາດເພື່ອທົບທວນເບິ່ງຄວາມ
ບໍ່ສະເໝີພາບທີ່ຍັງມີຢູ່ຕໍ່ມາ ໃນເວລານີ້ ດັ່ງໄພສານຈະນຳເອົາ ລາຍລະອຽດມາສະເໜີທ່ານໃນອັນດັບຕໍ່ໄປ.
ເບິ່ງວີດີໂອ ລາຍງານນີ້ ເປັນພາສາລາວ:
ພວກເດີນຂະບວນໃນປີ 1965 ແມ່ນພາກັນຮຽກຮ້ອງໃຫ້ຍຸດຕິໃນການຈຳແນກກີດກັນຕໍ່ ບັນດາຜູ້ມີສິດປ່ອນບັດ ຊາວເມຣິກັນ ເຊື້ອສາຍອາຟຣິກາ. ພາບການໃຊ້ຄວາມຮຸນແຮງ ຂອງຕຳຫຼວດໄດ້ສ້າງຄວາມຕື່ນຕົກໃຈໃຫ້ແກ່ຊາວອາເມຣິກັນແລະສ້າງຄວາມສະໜັບ
ສະ ໜຸນຕໍ່ກົດໝາຍຕ່າງໆ ທີ່ຫ້າມບໍ່ໃຫ້ມີການຈຳແນກກີດກັນຕໍ່ຜູ້ມີສິດປ່ອນບັດ.
ທ່ານໂອບາມາ ໄດ້ສະແດງຄວາມຄຳນັບ ຕໍ່ພວກນັກເຄື່ອນໄຫວ ທີ່ຊ່ອຍແຜ້ວທາງທີ່ທ່ານ ໄດ້ເດີນຕາມໄປຍັງທຳນຽບຂາວ ແລະຮັບຮູ້ເຖິງການຈຳແນກກີດກັນ ທີ່ຍັງມີຢູ່ຕໍ່ມາ ຢູ່ໃນ ສະຫະລັດ.
ປະທານາທິບໍດີໂອບາມາ ກ່າວວ່າ “ພວກເຮົາຮູ້ດີວ່າການເດີນຂະບວນຍັງບໍ່ທັນແລ້ວ ເສັດເທື່ອ ການແຂ່ງຂັນຍັງບໍ່ທັນຊະນະເທື່ອ ແລະການໄປໃຫ້ເຖິງປາຍທາງທີ່ໄດ້
ຕັ້ງໄວ້ ບ່ອນທີ່ພວກເຮົາຈະຖືກຕີລາຄາ ໂດຍລັກສະນະນິໄສໃຈຄໍຂອງພວກເຮົາ
ນັ້ນ ບັງຄັບໃຫ້ພວກເຮົາຕ້ອງຍອມຮັບໃນເລື້ອງນີ້.”
ທ່ານໂອບາມາ ໄດ້ຊີ້ໃຫ້ເຫັນເຖິງລາຍງານຂອງກະຊວງຍຸຕິທຳເມື່ອອາທິດແລ້ວນີ້ກ່ຽວກັບ ການປະຕິບັດຂອງຕຳຫລວດທີ່ເມືອງ Ferguson ລັດ Missouri ບ່ອນທີ່ໄດ້ມີການໂຮມ ຊຸມນຸມປະທ້ວງເປັນເວລາຫຼາຍໆອາທິດ ລຸນຫລັງການສັງຫານໜຸ່ມນ້ອຍຜິວດຳຄົນນຶ່ງ ທີ່ ບໍ່ມີອາວຸດໂດຍຕຳຫຼວດຜິວຂາວ ໃນລະຫວ່າງການປະເຊີນໜ້າກັນນັ້ນ. ລາຍງານພົບວ່າ ຕຳຫຼວດໃນເມືອງ Ferguson ໄດ້ລ່ວງລະເມີດສິດທິຂອງພົນລະເມືອງຊາວຜິວດຳຢູ່ເປັນ ປະຈຳ.
ອະດີດລັດຖະມົນຕີການຕ່າງປະເທດສະຫະລັດ ທ່ານ Colin Powell ກ່າວວ່າ ທ່ານບໍ່ໄດ້ ແປກໃຈເລີຍກ່ຽວກັບການກ່າວຫາທີ່ວ່າມີການຈຳແນກກີດກັນໃນການປະຕິບັດງານຂອງ ຕຳຫຼວດນັ້ນ.
ທ່ານ Powell ກ່າວວ່າ “ຂ້າພະເຈົ້າຮູ້ດີວ່າ ເລື້ອງເຫລົ່ານີ້ຍັງມີຢູ່ ໃນຫຼາຍເຂດຂອງ ປະເທດ. ມັນບໍ່ຄວນເປັນເລື້ອງທີ່ແປກເລີຍ ສຳຫລັບພວກເຮົາທຸກຄົນ.”
ທ່ານ Powell ເວົ້າວ່າ ຜູ້ບັນຊາການຕຳຫຼວດຢູ່ໃນທົ່ວສະຫະລັດຄວນຈະກວດສອບເບິ່ງ ຂັ້ນຕອນແລະພາກປະຕິບັດຕ່າງໆຂອງກົມກອງຂອງຕົນ ເພື່ອກຳຈັດການປະຕິບັດຕໍ່ປະ ຊາຊົນກຸ່ມນ້ອຍ ແບບບໍ່ຍຸດຕິທຳ. ທ່ານ James Knowles ເຈົ້າຄອງກຳແພງເມືອງ Fer-
guson ກ່າວວ່າ ທ່ານໄດ້ດຳເນີນການດັ່ງກ່າວນັ້ນໄປແລ້ວໃນຂະນະທີ່ທ່ານຕັດສິນໃຈວ່າ ຈະຮັບມືກັບການຕຳໜິຕິຕຽນຕໍ່ກຳລັງຕຳຫຼວດຂອງທ່ານແບບໃດ.
ທ່ານ Knowles ກ່າວວ່າ “ຂ້າພະເຈົ້າຄິດວ່າ ສິ່ງສຳຄັນທີ່ສຸດໃນເວລານີ້ ກໍຄື ອ່ານ ລາຍງານນັ້ນ ຊອກເບິ່ງບ່ອນໃດ ທີ່ໄດ້ມີການປະຕິບັດຢ່າງຜິດພາດ ແລະລັກສະ ນະຕະຫຼອດທັງການກະທຳ ແລະການຄຸ້ມຄອງທີ່ພວກເຮົາຄວນໄດ້ຈັດຕັ້ງຂຶ້ນມາ ແລະຕ້ອງມີໄວ້ເພື່ອຄ້ຳປະກັນວ່າພວກເຮົາຈະປົກປ້ອງຄວາມປອດໄພແລະສິດທິ
ພົນລະເມືອງຂອງທຸກໆຄົນທີ່ເຂົ້າມາຍັງເມືອງ Ferguso ແລະອາໄສຢູ່ໃນເມືອງ
Ferguson.”
ທີ່ເມືອງ Selma ປະທານາທິບໍດີ ໂອບາມາ ກ່າວວ່າ ມັນເປັນຮ່ອງຮອຍ ຂອງຄວາມກ້າວ
ໜ້າ ທີ່ວ່າການຈຳແນກກີດກັນຂອງຕຳຫຼວດ ທີ່ເມືອງ Ferguson ບໍ່ໄດ້ຮັບການສະໜັບ ສະໜຸນໂດຍກົດໝາຍ ຫຼືປະເພນີດັ່ງທີ່ເຄີຍເປັນມາ ເມື່ອ 50 ປີກ່ອນພຸ້ນ. ທ່ານຮຽກຮ້ອງ ໃຫ້ປະຊາຊົນຊາວອາເມຣິກັນທຸກໆຄົນດຳເນີນງານໄປສູ່ການກຳຈັດຄວາມບໍ່ສະເໝີພາບ ທາງດ້ານເຊື້ອຊາດຜິວພັນ.
