ພວກປະທ້ວງ Occupy Wall Street ໄດ້ຮັບອະນຸຍາດໃຫ້ກັບຄືນໄປຍັງສວນສາທາລະ
ນະໃນນະຄອນນີວຢ໊ອກ ບ່ອນທີ່ພວກເຂົາເຈົ້າຖືກໄລ່ໜີໃນຕອນເຊົ້າວັນອັງຄານວານນີ້
ແຕ່ບໍ່ໄດ້ໃຫ້ກາງເຕັ້ນຢູ່ໝົດຄືນໄດ້.
ສວນສາທາລະນະ Zuccotti ໄດ້ຖືກເປີດຄືນໃໝ່ ໃນຕອນແລງວັນອັງຄານວານນີ້ ຫລັງ
ຈາກສານສູງສຸດຂອງນີວຢ໊ອກຕັດສິນວ່າ ອໍານາດປົກຄອງນະຄອນນີວຢ໊ອກ ເຮັດຖືກແລ້ວ
ໃນການບັງຄັບຫ້າມບໍ່ໃຫ້ນອນຄ້າງຄືນໃນສວນສາທາລະນະນັ້ນ.
ພວກຕໍາຫລວດໃສ່ຊຸດເຄຶ່ອງແບບປາບການຈະລາຈົນ ໄດ້ເຄື່ອນກໍາລັງເຂົ້າໄປຈູ່ໂຈມ ຂັບໄລ່
ພວກປະທ້ວງອອກຈາກສວນ ໃນເວລາຂ້ອນແຈ້ງວັນອັງ ຄານວານນີ້ ໂດຍໄດ້ມ້າງເພບ່ອນ
ຢູ່ອາໃສຊົ່ວຄາວ ແລະເອົາຂີ້ເຫຍື້ອອອກໄປຈາກບ່ອນທີ່ໄດ້ກາຍເປັນແຄ້ມພັກເຊົາກາງເມືອງ
ນັ້ນ. ພວກປະທ້ວງຈໍານວນເກືອບ 200 ຄົນ ທີ່ບໍ່ຍອມໜີອອກຈາກທີ່ນັ້ນ ຖືກຈັບກຸມ.
ພວກປະທ້ວງໄດ້ຢື່ນອຸທອນຕໍ່ສານ ໃນເວລາຕໍ່ມາ ຂໍກັບຄືນໄປຍັງສວນສາທາລະນະ ພ້ອມ
ກັບຜ້າເຕັ້ນແລະຖົງນອນຂອງພວກເຂົາເຈົ້າ ແຕ່ຜູ້ພິພາກສາສານ Michael Stallman
ຕັດສິນວ່າ ພວກປະທ້ວງມີສິດທິຕາມລັດຖະທໍາມະນູນໃນການປາກເວົ້າຢ່າງເສລີ ແຕ່ບໍ່ມີ
ສິດທີ່ຈະຝ່າຝືນຂໍ້ຫ້າມບໍ່ໃຫ້ນອນຄ້າງຄືນໃນສວນສາທາລະນະນັ້ນ.
ເຈົ້າຄອງກໍາແພງນະຄອນນີວຢ໊ອກ ທ່ານ Michael Bloomberg ກ່າວວ່າ ທ່ານເຫັນ
ພ້ອມກັບການຕິດສິນຂອງສານ ທີ່ວ່າເສລີພາບໃນການປາກເວົ້າ ບໍ່ໄດ້ລວມເອົາສິດທິ
ໃນການສ້າງອັນຕະລາຍແກ່ສາທາລະນະຊົນ ຫລືລ່ວງລໍ້າສິດທິຂອງຄົນອື່ນໆໂດຍການ
ຍຶດຄອງສະຖານທີ່ສາທາລະນະ.
ນັບຕັ້ງແຕ່ເດືອນກັນຍາແລ້ວ ພວກປະທ້ວງຫລາຍຮ້ອຍຄົນໄດ້ພາກັນມາກາງເຕັ້ນນອນຢູ່
ສວນສາທາລະນະ Zuccotti ທີ່ໄດ້ກາຍມາເປັນສູນກາງແຫ່ງການເຄຶ່ອນໄຫວຕໍ່ຕ້ານລະບົບ
ນາຍທຶນ.
ເບິ່ງວິດີໂອ ລາຍງານຂ່າວພາສາອັງກິດ
