ພວກປະທ້ວງ Occupy Wall Street ຈໍານວນຫລາຍພັນຄົນ ໄດ້ພາກັນເດີນຂະບວນ
ປະທ້ວງໃນສະຫະລັດ ແລະໃນຫົວເມືອງອື່ນໆໃນທົ່ວໂລກ ໃນວັນພະຫັດວານນີ້ ອັນເປັນ
ພາກສ່ວນຂອງມື້ແຫ່ງການເຄື່ອນໄຫວ ເພື່ອເປັນຂີດໝາຍຄົບຮອບສອງເດືອນຂອງການ
ເລີ່ມຕົ້ນຂະບວນການດັ່ງກ່າວ ຢູ່ສວນສາທາລະນະແຫ່ງນຶ່ງໃນ Manhattan.
ທີ່ນີວຢອກ ວັນພະຫັດວານນີ້ ພວກປະທ້ວງຫລາຍພັນຄົນພາກັນຍ່າງຂ້າມຂົວ Brooklyn
ຫລາຍຊົ່ວໂມງ ຫລັງຈາກພວກປະທ້ວງຕໍ່ຕ້ານລະບົບນາຍທຶນ ໄດ້ຕໍ່ສູ້ກັບພວກຕໍາຫລວດ
ແລະທັບມ້າງຮົ້ວອ້ອມທີ່ຕໍາຫລວດໄດ້ຕິດຕັ້ງໄວ້ອ້ອມຖະໜົນ Wall Street ນັ້ນ. ພວກປະ
ທ້ວງຢ່າງໜ້ອຍ 200 ຄົນຖືກຈັບກຸມໃນລະຫວ່າງການປະທະກັນນັ້ັນ.
ການປະທ້ວງຄັ້ງໃຫຍ່ໃນມື້ວານນີ້ ແມ່ນເກີດຂຶ້ນສອງມື້ຫລັງຈາກອໍານາດປົກຄອງນະຄອນ
ນິວຢອກ ໄດ້ໄລ່ພວກປະທ້ວງໃຫ້ໜີອອກຈາກສວນສາທາລະນະ Zoccotti ໃນເຂດ Lower
Manhattan ຊຶ່ງເປັນສູນກາງຂອງຂະບວນການດັ່ງກ່າວ. ພວກປະທ້ວງໄດ້ຮັບອະນຸຍາດໃຫ້
ກັບຄືນໄປຍັງສວນສາທາລະນະໄດ້ ແຕ່ຫ້າມບໍ່ໃຫ້ປຸກເຕັ້ນຄ້າງຄືນຢູ່ທີ່ນັ້ນ. ນອກນີ້ແລ້ວ
ພວກປະທ້ວງຍັງໄດ້ໄປທໍາການປະທ້ວງ ຢູ່ຕາມສະຖານີລົດໄຟໃຕ້ດິນຂອງນີວຢອກນັ້ນນໍາ.
ໃນແຫ່ງອື່ນໆນັ້ນ ພວກຕໍາຫລວດທີ່ນະຄອນ Los Angeles ລັດແຄລິຟໍເນຍ ໄດ້ຈັບກຸມ
ພວກປະທ້ວງຕໍ່ຕ້ານ Wall Street ຢ່າງນ້ອຍ 20 ຄົນ ໃນຂະນະທີ່ທັບມ້າງແຄ້ມຂະນາດ
ນ້ອຍໃນເຂດກາງເມືອງ. ການເດີນຂະບວນປະທ້ວງທໍານອງດຽວກັນນີ້ ກໍໄດ້ມີຂຶ້ນທີ່ເມືອງ
Portland ລັດ Oregon ແລະຫົວເມືອງອື່ນໆຂອງສະຫະລັດ. ສ່ວນທີ່ນະຄອນຫລວງ
ວໍຊິງຕັນດີຊີ ພວກປະທ້ວງໄດ້ພາກັນເດີນຂະບວນ ໄປຕາມຂອບທາງຍ່າງຂອງຂົວ Key
Bridge ທີ່ເປັນຂົວເຊື່ອມຕໍ່ ວໍຊິງຕັນດີຊີກັບລັດເວີຈີເນຍ ອັນເປັນພາກສ່ວນນຶ່ງຂອງການ
ຮຽກຮ້ອງໃຫ້ປະຕິບັດການ “Get on the Bridge” ໃນທົ່ວປະເທດນັ້ນ.
ສ່ວນຢູ່ຕ່າງປະເທດ ພວກປະທ້ວງຕໍ່ຕ້ານນາຍທຶນ ທີ່ໄດ້ພາກັນປຸກເຕັ້ນພັກແຮມຢູ່ນອກ
ວິຫານຫລືໂບດ St. Paul ທີ່ລອນດອນ ໄດ້ປະຕິເສດບໍ່ຍອມໜີ ເຖິງແມ່ນໝົດກໍານົດມື້
ເສັ້ນຕາຍວັນພະຫັດ ເພື່ອໃຫ້ພວກເຂົາເຈົ້າມ້າງເຕັ້ນຂອງພວກເຂົາເຈົ້າ ຖ້າບໍ່ດັ່ງນັ້ນຈະຖືກ
ດໍາເນີນຄະດີນັ້ນແລ້ວ ກໍຕາມ.
ເບິ່ງວີດິໂອ ລາຍງານຂ່າວພາສາອັງກິດ: