ສະຫະລັດ ກໍາລັງເປັນປະເທດທີ່ປະກອບມີີຄົນທີ່ມີເຊື້ອຊາດ ຜິວພັນອັນຫລາກ ຫລາຍເພີ້ມຂຶ້ນນັບມື້ ເນື່ອງຈາກປະຊາກອນຜິວຂາວໄດ້ຫຼຸດລົງໃນທົດສະວັດທີ່ຜ່ານມາເປັນຄັ້ງທໍາອິດ ໃນປະຫວັດສາດຂອງປະເທດ, ອີງຕາມລາຍລະອຽດອັນ ໃໝ່ ທີ່ສະແດງໃຫ້ເຫັນ ຢູ່ໃນການສໍາຫລວດສຳມະໂນຄົວປີ 2020.
ຫ້ອງການສໍາຫລວດສຳມະໂນຄົວກ່າວໃນວັນພະຫັດວານນີ້ວ່າ ການນັບຈໍານວນຄົນ ທີ່ມີຂຶ້ນນຶ່ງຄັ້ງ ຕໍ່ທົດສະວັດນັ້ນ ໄດ້ສະແດງໃຫ້ເຫັນວ່າ ມີປະຊາກອນ 331 ລ້ານ 4 ແສນຄົນ ອາໄສຢູ່ໃນສະຫະລັດໃນປີກາຍນີ້, ເພີ້ມຂຶ້ນພຽງແຕ່ 7.4 ເປີ ເຊັນ ນັບຕັ້ງແຕ່ປີ 2010 ເປັນຕົ້ນມາ. ມັນເປັນການເຕີບໂຕໃນໄລຍະ 10 ປີທີ່ ຕໍ່າທີ່ສຸດເທົ່າທີ່ເຄີຍມີມານັບຕັ້ງແຕ່ມີການສໍາຫຼວດເລີ້ມຂຶ້ນໃນປີ 1790 ເປັນຕົ້ນ ມາ ຍົກເວັ້ນໃນໄລຍະເສດຖະກິດຕົກຕໍ່າຄັ້ງໃຫຍ່ ໃນຊຸມປີ 1930 ເທົ່ານັ້ນ.
ແຕ່ວ່າ ສັດສ່ວນປະກອບທາງດ້ານເຊື້ອຊາດ ແລະຊົນເຜົ່າຂອງປະເທດ ໄດ້ມີການປ່ຽນແປງ; ປະຊາຊົນມັກເຄື່ອນຍ້າຍເຂົ້າໄປອາໄສຢູ່ໃນເຂດຕົວເມືອງຫລາຍຂຶ້ນ, ຊຶ່ງສ່ວນຫຼາຍແມ່ນຍ້າຍໄປຫາບັນດາລັດຢູ່ທາງພາກໃຕ້ ແລະພາກຕາເວັນຕົກ; ແລະຊາວອາເມຣິກັນມັກຈະອອກຈາກປະຊາຄົມນ້ອຍໄປ ຊຶ່ງເຮັດໃຫ້ປະຊາກອນຂອງປະຊາຄົມເຂົາເຈົ້າເຫລົ່ານັ້ນ ຫຼຸດລົງໄປອີກ.
ຄົນທີ່ລະບຸວ່າຕົນເປັນຄົນຜິວຂາວຍັງຄົງເປັນກຸ່ມປະຊາກອນທີ່ໃຫຍ່ທີ່ສຸດຢູ່ໃນສະຫະລັດ ກໍຄືມີ 204 ລ້ານ 3 ແສນຄົນ ແຕ່ພວກເຂົາເຈົ້າມີຈໍານວນໜ້ອຍກວ່າປີ 2010 ນັ້ນ 8.6 ເປີເຊັນ.
ຄົນກຸ່ມໃຫຍ່ອັນດັບຮອງລົງມາ ແມ່ນພວກທີ່ລະບຸຕົນເອງວ່າ ເປັນຄົນຮິສເປນິກ ຫຼື ອາເມຣິກາລາຕິນ, ລວມທັງ 62 ລ້ານ 1 ແສນຄົນ ໃນປີ 2020, ຊຶ່ງເປັນກຸ່ມຄົນອາເມຣິກັນທີ່ເພີ່ມຂຶ້ນ 23 ເປີເຊັນ ໃນທົດສະວັດຜ່ານມານີ້.
ກຸ່ມຄົນທີ່ລະບຸວ່າຕົນມີສອງເຊື້ອຊາດ ຫຼື ຫຼາຍເຊື້ອຊາດກວ່ານັ້ນ ຫລືເອີ້ນວ່າ ລູກຊອດນັ້ນ ລວມທັງໝົດມີ 33 ລ້ານ 8 ແສນຄົນ, ເພີ່ມຂຶ້ນ 276 ເປີເຊັນ ເມື່ອທຽບ ໃສ່ປີ 2010. ຊາວອາເມຣິກັນເຊື້ອສາຍອາຟຣິກາ ທັງໝົດແມ່ນມີ 46 ລ້ານ 9 ແສນ ຄົນ, ແຕ່ວ່າກໍເປັນກຸ່ມ ທີ່ມີໜ້ອຍກວ່າ ພວກທີ່ລະບຸຕົນວ່າເປັນຄົນ “ເຊື້ອຊາດອື່ນ” ຫຼື ໃນກຸ່ມທີ່ມີຫລາຍເຊື້ອຊາດປະສົມກັນ ທີ່ມີ 49 ລ້ານ 9 ແສນຄົນ. ຊາວອາເມຣິກັນເຊື້ອສາຍເອເຊຍມີທັງໝົດ 24 ລ້ານຄົນ, ຄົນອາເມຣິກັນເຊື້ອສາຍອິນເດຍ ແລະຊາວອາລາສກາ ມີ 9 ລ້ານ 7 ແສນ
ຄົນ, ແລະ “ຄົນພື້ນເມືອງຮາວາຍ ແລະ ຄົນທີ່ເປັນຊາວເກາະມະຫາສະໝຸດ
ປາຊີຟິກອື່ນໆ” ທີ່ມີເຊື້ອສາຍດຽວ ຫຼືຢູ່ໃນກຸ່ມທີ່ມີຫລາຍເຊື້ອສາຍປະສົມກັນ ແມ່ນມີ 1 ລ້ານ 6 ແສນຄົນ.
ພວກນັກຊ່ຽວຊານກ່ຽວກັບສະຖິຕິໃນການປ່ຽນແປງປະຊາກອນບາງຄົນເວົ້າວ່າ ຄົນຜິວຂາວຍັງຈະເປັນກຸ່ມຊົນທີິ່ໃຫຍ່ທີ່ສຸດຢູ່ພາຍໃນປີ 2045 ແຕ່ກໍມີທ່າທາງວ່າ ກຸ່ມຄົນທີ່ມີຜິວພັນປະສົມຫຼືພວກລູກຊອດຈະມີຈຳນວນຫຼາຍຂຶ້ນ ຮວມທັງຊາວອາເມຣິກາລາຕິນ, ຄົນຜິວດໍາ, ຄົນອາເມຣິກັນເຊື້ອສາຍເອເຊຍ ແລະອື່ນໆ ອີກດ້ວຍ.
