ການແຂ່ງຂັນເພື່ອໃຫ້ໄດ້ຮັບການແຕ່ງຕັ້ງເປັນຜູ້ສະມັກປະທານາທິບໍດີຂອງພັກຣີພັບບລີກັນ
ໄດ້ຈ້ອມເຂົ້າເຫຼືອພຽງ 4 ຄົນໃນວັນພະຫັດວານນີ້ຊຶ່ງພວກທ່ານໄດ້ເຂົ້າຮ່ວມໃນການໂຕ້ວາ
ທີຢ່າງດຸເດືອດ ຢູ່ລັດ South Carolina ກ່ອນການເລືອກຕັ້ງຂັ້ນຕົ້ນຊຶ່ງຈະມີຂຶ້ນໃນມື້ວັນ
ເສົານີ້ທີ່ລັດສຳຄັນດັ່ງກ່າວ.
ອະດີດປະທານສະພາຕໍ່າສະຫະລັດ ທ່ານ Newt Gingrich ສະມາຊິກສະພາຕໍ່າຈາກລັດ
ເທັກຊັສ ທ່ານ Ron Paul ອະດີດຜູ້ປົກຄອງລັດ Massachusetts ທ່ານ Mitt Rom-
ney ແລະອະດີດສະມາຊິກສະພາສູງຈາກລັດ Pennsylvania ທ່ານ Rick Santorum
ໄດ້ໂຕ້ຖຽງກັນກ່ຽວກັບເລື່ອງວຽກເຮັດງານທຳ ການຮັກສາສຸຂະພາບແລະຄວາມເປັນຜູ້ນຳ.
ທ່ານ Gingrich ໄດ້ສະແດງຄວາມໂກດແຄ້ນອອກມາເວລາມີການຊັກຖາມທ່ານໃນຕອນ
ເລີ່ມຕົ້ນຂອງການໂຕ້ວາທີ ກ່ຽວກັບການກ່າວຫາ ຂອງອະດີດພັນລະຍາທ່ານທີ່ວ່າທ່ານ
ໄດ້ຂໍຮ້ອງໃຫ້ມີ “ການແຕ່ງງານແບບເປີດກວ້າງ” ໃນປີ 1999 ເພື່ອອຳນວຍ ໃຫ້ທ່ານມີ
ຄວາມສຳພັນຖານຊູ້ສາວນອກການແຕ່ງງານໄດ້.
ທ່ານໄດ້ປະຕິເສດວ່າເລື່ອງດັ່ງກ່າວແມ່ນບໍ່ຖືກຕ້ອງ ແລະໄດ້ກ່າວໂຈມຕີຕໍ່ອັນທີ່ທ່ານເອີ້ນວ່າ
ສື່ມວນຊົນແຖວໜ້າ ໂດຍເອີ້ນຂ່າວນີ້ວ່າເພື່ອຫວັງທຳລາຍ ຮ້າຍກາດແລະມີຈຸດປະສົງໃນທາງ
ລົບ.
ສ່ວນທ່ານ Romney ນັ້ນ ໄດ້ກ່າວປ້ອງກັນ ຈາກການໂຈມຕີທີ່ວ່າ ທ່ານໄດ້ໄລ່ຄົນງານ
ອອກຈາກວຽກການ ເວລາທ່ານເປັນຫົວໜ້າບໍສັດລົງທຶນ ທີ່ທຳການຊື້ ບໍລິສັດຕ່າງໆນັ້ນ.
ທ່ານເວົ້າວ່າທີ່ຈິງແລ້ວທ່ານໄດ້ຊ່ອຍບໍລິສັດເຫຼົ່ານີ້ສ້າງວຽກເຮັດງານທຳແລະເວົ້າວ່າ ທ່ານ
ຈະບໍ່ຂໍຂະມາໂທດໃດໆໃນການທີ່ທ່ານກາຍເປັນນັກທຸລະກິດທີ່ປະສົບຄວາມສຳເລັດ.
ທ່ານ Santorum ແລະທ່ານ Romney ໄດ້ກ່າວໂຈມຕີທ່ານ Ron Paul ທີ່ຈະຕັດການ
ໃຊ້ຈ່າຍທາງດ້ານທະຫານລົງ ໃນຂະນະທີ່ບັນດາຜູ້ສະມັກທັງໝົດ ຕ່າງກໍໄດ້ກ່າວໂຈມຕີແຜນ
ການຮັກສາສຸຂະພາບຂອງປະທານາທິບໍດີບາຣັກໂອບາມາແລະຮຽກຮ້ອງໃຫ້ມີການປາບ
ປາມພວກຄົນເຂົ້າເມືອງແບບຜິດກົດໝາຍ.
ບໍ່ເທົ່າໃດຊົ່ວໂມງ ກ່ອນມີການໂຕ້ວາທີກັນ ໃນມື້ວານ ນີ້ຜູ້ປົກຄອງລັດເທັກຊັສທ່ານ Rick
Perry ໄດ້ຖອນໂຕອອກຈາກການແຂ່ງຂັນ ຫຼັງຈາກໄດ້ຮັບຄະແນນສຽງບໍ່ຄ່ອຍດີປານໃດ
ໃນການປະຊຸມຄັດເລືອກຜູ້ສະມັກ ທີ່ລັດໄອໂອວາ ແລະການເລືອກຕັ້ງຂັ້ນຕົ້ນ ທີ່ລັດນິວ
ແຮມເຊີ. ຫຼັງຈາກນັ້ນທ່ານກໍໄດ້ປະກາດສະໜັບສະໜຸນທ່ານ Gingrich ໃຫ້ເປັນຜູ້ສະມັກ
ປະທານາທິບໍດີຂອງພັກຣີພັບບລີກັນ.
ການເລືອກຕັ້ງຂັ້ນຕົ້ນທີ່ລັດ South Carolina ຈະມີຂຶ້ນໃນມື້ວັນເສົານີ້. ການຢັ່ງຫາງ
ສຽງເທື່ອລ່າສຸດສະແດງໃຫ້ເຫັນວ່າ ທ່ານ Romney ມີຄະແນນນຳໜ້າໝູ່ ແຕ່ການສະ
ໜັບສະໜຸນທ່ານ Gingrich ພວມຖີບໂຕສູງຂຶ້ນ.
