ບັນດາຜູ້ສະມັກເປັນປະທານາທິບໍດີຂອງພັກຣີພັບບລີກັນພວມທຳການໂຄສະນາຫາສຽງຢ່າງ
ຂຸ້ນຂ້ຽວທີ່ລັດໄອໂອວາໃນວັນພະຫັດວານນີ້ 5 ມື້ກ່ອນຈະມີການແຕ່ງຕັ້ງເທື່ອທຳອິດໃນການ
ໂຄສະນາຫາສຽງເລືອກຕັ້ງປະທານາທິບໍດີ ໃນປີ 2012.
ໃນໄລຍະຫຼາຍໆມື້ຂ້າງໜ້ານີ້ບັນດາຜູ້ສະມັກຈະພາກັນໄປໂອ້ລົມກັບຜູ້ຄົນທີ່ຮ້ານຂາຍ Pizza
ຮ້ານອາຫານເຊົ້າແລະບາ ຕະຫຼອດທັງຢູ່ຕາມບ່ອນໂຮມຊຸມນຸມ ແລະສະຖານທີ່ສາທາລະນະ
ຕ່າງໆທັງຢູ່ພາຍໃນແລະອ້ອມລັດໄອໂອວາ ຊຶ່ງຕັ້ງຢູ່ໃນເຂດພາກກາງຂອງສະຫະລັດເພື່ອຢຸດ
ແວ່ໂຄສະນາຫາສຽງເປັນເວລານຶ່ງ ສອງ ຫຼືສາມຊົ່ວໂມງທີ່ນັ້ນ.
ການຢັ່ງຫາງສຽງປະຊາຊົນເທື່ອລ່າສຸດ ສະແດງໃຫ້ເຫັນວ່າ ອະດີດຜູ້ປົກຄອງລັດ Massa-
chusetts ທ່ານ Mitt Romney ໄດ້ມີຄະແນນສູງນຳໜ້າຄືນໃໝ່ແລະສະມາຊິກສະພາຕໍ່າ
Ron Paul ໄດ້ຮັບຄະແນນສຽງເປັນທີສອງ. ແຕ່ອະດີດສະມາຊິກສະພາສູງ Rick San-
torum ກ່າວວ່າ ທ່ານຍັງມີຄວາມເຊື່ອໝັ້ນວ່າ ການປະຊຸມຄັດເລືອກຫຼື Caucases ຊຶ່ງມີ
ການເບິ່ງກັນວ່າ ເປັນເຄື່ອງບົ່ງບອກທີ່ສຳຄັນສຳລັບຄວາມຫວັງໃນທົ່ວປະເທດນັ້ນຈະຫັນໃຫ້
ທ່ານເປັນຜູ້ໄດ້ປຽບ.
ທ່ານ Santorum ກ່າວວ່າການມີຄະແນນສຽງເພີ່ມຂຶ້ນແບບບໍ່ຄາດຄິດເປັນທີສາມຂອງທ່ານ
ໃນການຢັ່ງຫາງສຽງດັ່ງກ່າວຍ້ອນວ່າ ຜູ້ມີສິດປ່ອນບັດທີ່ນັ້ນ ໄດ້ພົບພໍ້ກັບທ່ານແລະກໍເຫັນວ່າ
ທ່ານສະທ້ອນໃຫ້ເຖິງຄຸນຄ່າຂອງພວກເຂົາເຈົ້າ.
ສຳຫຼັບຜູ້ສະມັກຄົນອື່ນໆ ທີ່ມີຄະແນນສຽງບໍ່ຄ່ອຍດີປານໃດຢູ່ລັດໄອໂອວາ ກໍຈະພາກັນຫັນ
ຄວາມສົນໃຈໄປຍັງລັດອື່ນໆ.
ອະດີດປະທານສະພາຕໍ່າສະຫະລັດທ່ານ Newt Gingrich ຜູ້ທີ່ໄດ້ຮັບຄວາມນິມຍົມສູງລ່າ
ສຸດແຕ່ຫາງສຽງນິຍົມພວມຄ່ອຍໆຫຼຸດລົງນັ້ນ ໄດ້ຕົກມາເປັນອັນດັບ 4 ທີ່ລັດໄອໂອວາຫຼັງ
ຈາກໄດ້ມີການໂຄສະນາໂຈມຕີໃນທາງລົບ ຈາກຄູ່ແຂ່ງຫຼາຍໆຄົນ. ເຖິງແມ່ນທ່ານຍັງສືບຕໍ່
ທຳການໂຄສະນາຫາສຽງຢ່າງຂຸ້ນຂ້ຽວເພື່ອ ທົດສອບເບິ່ງພື້ນໃນລັດດັ່ງກ່າວກໍດີ ແຕ່ທ່ານ
Gingrich ກໍໄດ້ເຕືອນພວກນັກຂ່າວວ່າ ທ່ານຈະເປັນຜູ້ຖືກເລືອກໃນການລົງຄະແນນສຽງ
ຢູ່ໃນ 50 ລັດບໍ່ແມ່ນແຕ່ໃນລັດໃດລັດນຶ່ງແລະເວົ້າວ່າຢູ່ໃນລັດອື່ນໆທ່ານຍັງສືບຕໍ່ມີຄະແນນ
ນຳໜ້າຢ່າງແຂງຂັນ.
ສ່ວນທ່ານ Jon Huntsman ທີ່ເຄີຍເປັນເອກອັກຄະລັດຖະທູດປະຈຳຈີນຂອງປະທານາທິບໍ
ດີບາຣັກໂອບາມາກຳລັງເພັ່ງເລັງໃສ່ລັດ New Hampshir ຊຶ່ງເປັນລັດທີສອງ ທີ່ຈະມີການ
ປ່ອນບັດເລືອກເອົາຜູ້ທີ່ຈະຖືກແຕ່ງຕັ້ງຂອງພັກ.
ໃນການສຳຫຼວດເທື່ອລ່າສຸດ ຢູ່ລັດດັ່ງກ່າວ ທ່ານ Romney ໄດ້ມີຄະແນນສຽງນຳໜ້າຢ່າງ
ແຂງຂັນໂດຍໄດ້ຮັບ 44% ຈາກພວກທີ່ມີທ່າທາງວ່າຈະພາກັນໄປປ່ອນບັດລົງຄະແນນສຽງ
ຕິດຕາມໂດຍທ່ານ Ron Paul.