2 ມື້ກ່ອນການເລືອກຕັ້ງຂັ້ນຕົ້ນຢ່າງເປັນທາງການໃນສະຫະລັດ ຈະມີຂຶ້ນທີ່ລັດ New
Hampshire ນັ້ນ ພວກຜູ້ສະໝັກຄົນສໍາຄັນທີ່ຢາກໄດ້ຮັບການແຕ່ງຕັ້ງໃຫ້ເປັນຜູ້ແຂ່ງ
ຂັນເລືອກຕັ້ງປະທານາທິບໍດີສັງກັດພັກ Republican ໄດ້ໂຕ້ວາທີກັນເປັນເທື່ອທີສອງ
ໃນໄລຍະສອງມື້.
ພວກຜູ້ສະໝັກແຂ່ງຂັນທັງໝົດໄດ້ພະຍາຍາມຕະຫລອດມາ ເພື່ອອວດອ້າງຄວາມໜ້າ
ເຊື່ອຖືໃນດ້ານນິຍົມແນວທາງເດີມຂອງເຂົາເຈົ້າ ທີ່ກົງກັນຂ້າມກັບປະທານາທິບໍດີບາຣັກ
ໂອບາມາ ຫົວນິຍົມເສລີນັ້ນ ແລະໃນລະຫວ່າງການໂຕ້ວາທີກັນໃນວັນອາທິດວານນີ້
ໃນລັດ New Hampshire ທາງພາກຕາເວັນອອກສຽງເໜືອຂອງສະຫະລັດ ບ່ອນທີ່
ການເລືອກຕັ້ງຂັ້ນຕົ້ນຂອງພັກ Republican ຈະມີຂຶ້ນໃນມື້ອື່ນນີ້ ຜູ້ສະໝັກຄົນອື່ນໆ
ຕ່າງກໍໄດ້ພາກັນຕັ້ງຄໍາຖາມ ກ່ຽວກັບນະໂຍບາຍອະນຸລັກນິຍົມຂອງທ່ານ ມິດ ຣອມນີ
ອະດີດຜູ້ວ່າການລັດ Massachusetts.
ອະດີດປະທານສະພາຕໍ່າສະຫະລັດ ທ່ານ Newt Gingrich ເອີ້ນທ່ານຣອມນີວ່າ ຫົວ
ນິຍົມແນວທາງປານກາງທີ່ຂາດຄວາມເຊື່ອໝັ້ນ ແລະບໍ່ເມ່ນຫົວອະນຸລັກນິຍົມແນວທາງ
ເດີມແທ້ ແລະວ່າທ່ານຣອມນີ ຈະປະເຊີນກັບບັນຫາໃນການທີ່ຈະຖືກເລືອກຕັ້ງເປັນປະ
ທານາທິບໍດີນັ້ນ.
ເບິ່ງລາຍງານທີ່ກ່ຽວຂ້ອງກັນ:
ສ່ວນທ່ານຣອມນີໄດ້ກ່າວປ້ອງກັນປະວັດນິຍົມແນວທາງເດີມຂອງທ່ານ ໃນຂະນະດຽວ
ກັນ ກໍຮຽກຮ້ອງໃຫ້ລັດຖະບານຕັດຄ່າໃຊ້ຈ່າຍລົງ ແລະບໍ່ໃຫ້ຂຶ້ນພາສີ ຊຶ່ງທ່ານກ່າວວ່າ
ປະທານາທິບໍດີໂອບາມາໄດ້ຮ້ອງຂໍໃຫ້ເຮັດນັ້ນ. ຄໍາຮຽກຮ້ອງດັ່ງກ່າວຂອງທ່ານຣອມນີ
ແມ່ນເປັນການກ່າວຢໍ້າ ຫົວຂໍ້ຄວາມສໍາຄັນຂອງພັກ Republican.
ທ່ານຣອມນີຍັງເປັນຜູ້ສະໝັກ ທີ່ຄົນເຊື່ອກັນວ່າຈະເປັນຜູ້ຊະນະໃນການເລືອກຕັ້ງຂັ້ນຕົ້ນ
ໃນລັດ New Hampshire. ມີການມອງເຫັນວ່າ ທ່ານ Ron Paul ສະມາຊິກສະພາ
ຕໍ່າສະຫະລັດຈາກລັດ Texas ແລະອະດີດສະມາຊິກສະພາສູງສະຫະລັດ ທ່ານ Rick
Santorum ພວມແຂ່ງຂັນກັນເອົາອັນດັບສອງ. ທ່ານຣອມນີ ໄດ້ຊະນະທ່ານ Rick
Santorum ຢ່າງຫວຸດວິດໃນການເລືອກຕັ້ງຂັ້ນຕົ້ນຂອງພັກ ທີ່ລັດ Iowa ໃນສັບປະ
ດາຜ່ານມານີ້.
ທ່ານຣອມນີໄດ້ຖືກໂຈມຕີມາເປັນເວລາຫລາຍເດືອນແລ້ວ ກ່ຽວກັບປະວັດຂອງທ່ານ
ໃນຕອນທີ່ເປັນເຈົ້າຂອງບໍລິສັດລົງທຶນເອກະຊົນ ແລະໄດ້ເງິນມາຫລາຍລ້ານດອນລາ.
ຫລາຍຄົນເວົ້າວ່າ ບໍລິສັດຂອງທ່ານໄດ້ປົດພວກພະນັກງານຫລາຍຮ້ອຍຄົນອອກຈາກ
ບໍລິສັດຕ່າງໆທີ່ທ່ານໄດ້ຊື້ເອົາ ໃນຂະນະທີ່ທໍາກໍາໄລຢ່າງຫລວງຫລາຍໃຫ້ພວກລົງທຶນ.
