ທ່ານມິດ ຣອມນີ ຜູ້ສະມັກແຂ່ງຂັນປະທານາທີບໍດີສະຫະລັດຫວັງວ່າ ຈະເສີມຂະຫຍາຍ
ຖານະເປັນຜູ້ມີສຽງນໍາໜ້າຢ່າງແຂງແຮງຂອງທ່ານເພື່ອໃຫ້ໄດ້ຮັບການແຕ່ງຕັ້ງເປັນຜູ້ສະ
ໝັກຂອງພັກ Republican ໃນການປະຊຸມຄັດເລືອກຜູ້ຕາງໜ້າຂອງພັກໃນວັນອັງຄານ
ມື້ນີ້ທີ່ລັດ Colorado ແລະລັດ Minnesota ນັ້ນ.
ທ່ານຣອມນີ ປາກົດວ່າມີທ່າທາງທີ່ຈະໄດ້ຮັບໄຊຊະນະໃນລັດ Colorado ແຕ່ການສໍາ
ຫຼວດຫາງສຽງປະຊາຊົນໃນລັດ Minnesota ສະແດງໃຫ້ເຫັນວ່າ ໃນບັນດາຜູ້ສະໝັກ
ແຂ່ງຂັນສັງກັດພັກ Republican ທັງ 4 ທ່ານ ຜູ້ໃດກໍສາມາດມີສຽງນໍາໜ້າໄດ້ ຊຶ່ງອະ
ດີດສະມາຊິກສະພາສູງສະຫະລັດຈາກລັດ Pennsylvania ທ່ານ Rick Santorum
ມີສຽງນໍາໜ້າໃນເວລານີ້.
ອະດີດປະທານສະພາຕໍ່າສະຫະລັດ ທ່ານ Newt Gingrich ຊຶ່ງແຕ່ກ່ອນ ເຄີຍຖືວ່າ
ເປັນຄູ່ແຂ່ງຄົນສຳຄັນຂອງທ່ານຣອມນີ ທີ່ຈະໄດ້ຖືກແຕ່ງຕັ້ງໃຫ້ເປັນຜູ້ຕາງໜ້າພັກ
Republican ນັ້ນມີສຽງນໍາໜ້າໝູ່ຢ່າງຫລວງຫລາຍໃນການສໍາຫລວດຫາງສຽງປະ
ຊາຊົນໃນລັດ Colorado ໃນທ້າຍປີຜ່ານມານີ້ ແຕ່ຕັ້ງແຕ່ນັ້ນມາ ທ່ານໄດ້ສູນເສຍສຽງ
ສະໜັບສະໜຸນຢູ່ໃນລັດດັ່ງກ່າວ.
ທ່ານຣອມນີ ໄດ້ຊະນະການເລືອກຕັ້ງໃນລັດ Colorado ແລະລັດMinnesota ໃນ
ຄວາມພະຍາຍາມເພື່ອໃຫ້ໄດ້ຮັບການແຕ່ງຕັ້ງເປັນຜູ້ສະໝັກຮັບເລືອກຕັ້ງຕາງໜ້າ
ພັກ Republican ໃນປີ 2008 ຜ່ານມານັ້ນ.
ການປະຊຸມແຕ່ງຕັ້ງຜູ້ຕາງໜ້າຂອງພັກເປັນພາກສ່ວນນຶ່ງຂອງການດໍາເນີນຂັ້ນຕອນ
ໄປໃນແຕ່ລະລັດໆ ເພື່ອຄັດເລືອກເອົາຜູ້ສະມັກຂອງພັກ Republican ເຂົ້າແຂ່ງຂັນ
ກັບປະທານາທິບໍດີ ບາຣັກ ໂອບາມາ ສັງກັດພັກເດໂມກຣັດ ໃນການແຂ່ງຂັນເລືອກ
ຕັ້ງປະທານາທິບໍດີສະຫະລັດໃນເດືອນພະຈິກປີນີ້.
ວັນອັງຄານມື້ນີ້ ກໍມີການເລືອກຕັ້ງຂັ້ນຕົ້ນຂອງພັກ Republican ໃນລັດ Missouri
ເຊ່ນກັນ ແຕ່ບໍ່ເປັນການເລືອກຕັ້ງທີ່ມີຜົນບັງຄັບແລະບໍ່ມີການແບ່ງປັນຜູ້ຕາງໜ້າຈາກ
ລັດນັ້ນ.
ໃນວັນຈັນວານນີ້ ຜູ້ສະມັກແຂ່ງຂັນທັງ 4 ທ່ານພາກັນໂຄສະນາຫາສຽງເລືອກຕັ້ງໃນ
ລັດ Minnesota ແລະລັດ Colorado ຊຶ່ງທ່ານ ຣອມນີ ໄດ້ແນຈຸດການໂຄສະນາຫາ
ສຽງຂອງທ່ານໃສ່ທ່ານ Santorum ເພື່ອພະຍາຍາມຢຸດແຮງກະຕຸ້ນໃດໆທີ່ມາຈາກ
ອະດີດສະມາຊິກສະພາສູງສະຫະລັດທ່ານນີ້.
