ຜູ້ສະມັກເປັນປະທານາທິບໍດີສະຫະຣັດ ສີ່ຄົນຂອງພັກ Republican ທີ່ຍັງເຫລືອຢູ່ນັ້ນ
ພາກັນໂຕ້ວ່າທີຄັ້ງສຸດທ້າຍ ກ່ອນການເລືອກຕັ້ງຂັ້ນຕົ້ນ ທີ່ສໍາຄັນໃນລັດຟລໍຣິດານັ້ນ
ໄດ້ໂຕ້ຖຽງກັນກ່ຽວກັບເລື່ອງຄົນເຂົ້າເມືອງ ປະຫວັດເສຍພາສີ ແລະຂໍ້ສະເໜີການຕັ້ງ
ອານານິຄົມທີ່ດວງຈັນ ຢູ່ທີ່ລັດຊຶ່ງເປັນທີ່ຕັ້ງຂອງອຸສາຫະກຳອະວະກາດສ່ວນໃຫຍ່ຂອງ
ປະເທດນັ້ນ.
ທ່ານ Newt Gingrich ແລະທ່ານ Mitt Romney ໄດ້ກ່າວໂຈມຕີກັນໃນການ
ໂຕ້ວາທີໃນແລງວັນພະຫັດວານນີ້ ທີ່ເມືອງ Jacksonville ທາງພາກເໜືອຂອງລັດ
ຟລໍລິດາ ຊຶ່ງເປັນລັດທີ່ຕັ້ງຢູ່ໃກ້ທີີ່ສຸດກັບຄີວບາ ແລະເປັນບ່ອນຢູ່ອາໄສຂອງປະຊາຄົມ
ຊາວຄິວບາທີ່ໃຫ່ຍທີສຸດ.
ທ່ານ Gingrich ໄດ້ກ່າວຫາທ່ານ Romney ວ່າ ເປັນຜູ້້ສະມັກທີ່ຕໍ່ ຕ້ານພວກຄົນ
ເຂົ້າເມືອງ ຊຶ່ງທ່ານ Romney ເອີ້ນຄໍາກ່າວຫາດັ່ງກ່າວວ່າ ເປັນຄໍາເວົ້າທີ່ບໍ່ສຸພາບ
ແລະຮຽກຮ້ອງໃຫ້ທ່ານ Gingrich ຂໍຂະມາໂທດ ແຕ່ທ່ານ Gingrich ໄດ້ກ່າວຫາ
ທ່ານ Romney ວ່າຢາກບັງຄັບໃຫ້ພວກຄົນເຂົ້າເມືອງທີ່ຜິດກົດໝາຍທັງໝົດ ຮ່ວມ
ທັງພວກຜູ້ເຖົ້າ ໃຫ້ພາກັນໜີອອກຈາກປະເທດ. ທ່ານ Romney ກ່າວວ່າ ທ່ານ
ຢາກໃຫ້ຜູ້ຄົນເດີນທາງເຂົ້າມາຍັງສະຫະລັດ ແລະເຮັດວຽກເຮັດການ ຢ່າງຖືກຕ້ອງ
ຕາມກົດໝາຍ.
ທ່ານ Romney ໄດ້ໂຈມຕີ ທ່ານ Gingrich ທີ່ເມື່ອໝໍ່ມານີ້ໄດ້ສະເໜີໃຫ້ຕັ້ງອານາ
ນິຄົມຢູ່ເທິງດວງຈັນ ໂດຍກ່າວວ່າ ທ່ານຢາກຈະເຫັນມີການໃຊ້ເງິນທັງໝົດນັ້ນມາສ້າງ
ເຮືອນຊານຢູ່ໃນສະຫະຣັດ ແທນທີ່ຈະຕັ້ງອານານິຄົມຢູ່ເທີີງດວງຈັນ. ຂູ່ແຂ່ງທ່ານ Ron
Paul ກ່າວຕື່ມ ອີກວ່າ ແທນທີ່ຈະສ້າງອານານິຄົມທີ່ດວງຈັນນັ້ນ ບາງທີ່ນັກການເມືອງ
ຄວນຖືກສົ່ງຂື້ນໄປດວງຈັນ.
ຂະນະທີ່ລັດຟລໍຣິດາຍັງເປັນລັດທີ່ມີຊາວຢິວອາໄສຢູ່ເປັນຈຳນວນຫຼວງຫຼາຍນັ້ນອິສຣາແອລ
ກໍເປັນຫົວຂໍ້ສຳຄັນອັນນຶ່ງໃນການໂຕ້ວາທີ. ທັງທ່ານ Romney ແລະທ່ານ Santorum
ຕ່າງກໍເວົ້າວ່າ ຈະບໍ່ສາມາດມີສັນຕິພາບໄດ້ຢູ່ໃນພາກຕາເວັນອອກກາງຈົນກວ່າພວກຜູ້ນຳ
ປາແລສໄຕນ໌ຮັບຮູ້ສິດທິໃນການຄົງຢູ່ໄດ້ຂອງອິສຣາແອລ. ພວກທ່ານທັງສອງຕ່າງກໍໄດ້ຕຳ
ໜິຕິຕຽນປະທານາທິບໍດີບາຣັກ ໂອບາມາທີ່ຮຽກຮ້ອງໃຫ້ອິສຣາແອລຢຸດເຊົາການຕັ້ງບ້ານ
ໃໝ່ຢູ່ໃນດິນແດນທີ່ອາດເປັນພາກສ່ວນນຶ່ງຂອງລັດປາແລສໄຕນ໌ໃນອະນາຄົດນັ້ນ.
ຜູ້ໃດກໍຕາມທີ່ເປັນຜູ້ຊະນະໃນການເລືອກຕັ້ງຂັ້ນຕົ້ນທີ່ລັດຟລໍຣິດາຊຶ່ງເປັນລັດ ທີ່ມີປະຊາຊົນ
ອາໄສຢູ່ຢ່າງໜາແໜ້ນ ໃນພາກໃຕ້ຂອງສະຫະລັດ ໃນວັນອັງຄານຈະມານີ້ ຈະໄດ້ຮັບຜູ້ຕາງ
ໜ້າເປັນຈຳນວນຫຼວງຫຼາຍ ໄປຮ່ວມກອງປະຊຸມຫຼວງແຫ່ງຊາດຂອງພັກ ແລະອາດຈະມີຄະ
ແນນສຽງນຳໜ້າຢ່າງແໜ້ນໜາ ໃນການແຂ່ງຂັນເປັນຜູ້ສະມັກປະທານາທິບໍດີຂອງພັກຣີພັບ
ບລີກັນ. ບໍ່ຄືກັນກັບໃນຊຸມປີຜ່ານໆມາ ໃນປີ 2012 ນີ້ ຍັງບໍ່ມີຜູ້ນຳທີ່ຈະແຈ້ງໂຜ່ໂຕຂຶ້ນມາ
ເທື່ອ ຫຼັງຈາກໄດ້ມີການແຂ່ງຂັນໄປແລ້ວຢູ່ໃນສາມລັດ.
ຂະນະດຽວກັນ ປະທານາທິບໍດີສະຫະລັດ ທ່ານບາຣັກ ໂອບາມາ ພວມຢ້ຽມຢາມ 5 ລັດ
ທັງເພື່ອເສີມຂະຫຍາຍການສະໜັບສະໜຸນໃນການເລືອກຕັ້ງແລະໂຄສະນາກ່ຽວກັບແຜນ
ການເສດຖະກິດໃໝ່ຂອງທ່ານ.
