ປະທານາທິບໍດີສະຫະລັດທ່ານ Barack Obama ຍັງສືບຕໍ່ທຳການໂຄສະນາຫາສຽງທາງ
ລົດບັດ ໃນພາກກາງຂອງປະເທດ ເພື່ອອະທິບາຍເຖິງນະໂຍບາຍດ້ານເສດຖະກິດຂອງທ່ານ
ຂະນະທີ່ທ່ານທຳການຕອບໂຕ້ຕໍ່ການຕຳໜິຕິຕຽນທີ່ວ່າ ທ່ານບໍ່ໄດ້ດຳເນີນການຢ່າງພຽງພໍ
ເພື່ອກະຕຸກຊຸກຍູ້ເສດຖະກິດ ແລະແກ້ໄຂບັນຫາຄົນຫວ່າງງານນັ້ນ.
ທ່ານ Obama ມີແຜນການທີ່ຈະໄປຮ່ວມກອງປະຊຸມເສດຖະກິດໃນເຂດຊົນນະບົດ ໃນວັນ
ອັງຄານມື້ນີ້ທີ່ລັດໄອໂອວາ ນຶ່ງມື້ຫຼັງຈາກທີ່ໄດ້ກ່າວຊີ້ແຈງນະໂຍບາຍຂອງທ່ານຕໍ່ປະຊາຊົນ
ທີ່ນັ້ນ ແລະທີ່ລັດມິນີໂຊຕາ.
ທ່ານປະທານາທິບໍດີໄດ້ກ່າວໃນວັນຈັນວານນີ້ວ່າ ທ່ານມີແຜນທີ່ຈະນໍາສະເໜີຕໍ່ລັດຖະສະພາ
ແຜນການສົ່ງເສີມເສດຖະກິດຂອງປະເທດທີ່ພວມປະສົບບັນຫານັ້ນ ຫຼັງຈາກທີ່ທາງລັດຖະ
ສະພາກັບຄືນມາເຮັດວຽກໃນເດືອນໜ້າ. ທ່ານ Obama ໄດ້ຮຽກຮ້ອງໃຫ້ລັດຖະສະພາ ຕໍ່ອາຍຸການຕັດພາສີເງິນເດືອນ ດຳເນີນການແລະຮັບຜ່ານຮ່າງກົດໝາຍການຄ້າ ເພື່ອສ້າງ
ວຽກເຮັດງານທຳໃນດ້ານການກໍ່ສ້າງ.
ລັດໄອໂອວາໄດ້ເປັນຈຸດເພັ່ງເລັງທາງດ້ານການເມືອງໃນໄລຍະຫຼາຍໆມື້ຜ່ານມານີ້ ລຸນຫຼັງ
ທີ່ມີການເລືອກຕັ້ງໃນວັນເສົາແລ້ວນີ້ ທີ່ສະແດງໃຫ້ເຫັນວ່າຜູ້ໃດມີຄະແນນສຽງນຳໜ້າໃນ
ບັນດາຜູ້ສະມັກເປັນປະທານາທິບໍດີຂອງພັກ Republican ທີ່ຈະເຂົ້າແຂ່ງຂັນໃນການ
ເລືອກຕັ້ງປະທານາທິບໍດີ ໃນປີໜ້ານັ້ນ.
ສະມາຊິກພັກ Republican ກ່າວວ່າ ທ່ານ Obama ແມ່ນບໍ່ໄດ້ດຳເນີນການຫຍັງຫຼາຍ
ໃນການຊຸກຍູ້ເສດຖະກິດໃຫ້ດີຂຶ້ນນັ້ນ ແລະຍັງໄດ້ຕຳໜິຕິຕຽນທ່ານ ທີ່ເຮັດໃຫ້ໜີ້ສິນລັດຖະ
ບານເພີ່ມຂຶ້ນນັ້ນ.