ທ່ານ ຣິກ ແຊນທໍຣໍາ ຜູ້ສະມັກເປັນຜູ້ຕາງໜ້າພັກຣີພັບບລິກັນ ໃນການເລືອກຕັ້ງປະທາ
ນາທິບໍດີສະຫະລັດ ໄດ້ກ່າວຂອບໃຈພວກສະໜັບສະໜຸນທ່ານຫລັງຈາກໄດ້ຮັບໄຊຊະນະ
ໃນການເລືອກຕັ້ງຂັ້ນຕົ້ນຂອງພັກທີ່ລັດຫລຸຍເຊຍນາ ຊຶ່ງເປັນການຊະນະຄັ້ງທີ່ 11 ໃນ
ການແຂ່ງຂັນ 34 ລັດ.
ໃນຕອນກ່າວຢູ່ທີ່ລັດວີສຄອນຊິນ ທາງພາກເໜືອສະຫະລັດ ຊຶ່ງເປັນລັດຕໍ່ໄປທີ່ຈະຈັດ
ການເລືອກຕັ້ງຂັ້ນຕົ້ນຂອງພັກຣີພັບບລິກັນ ຂຶ້ນໃນວັນທີ່ 3 ເມສານັ້ນ ທ່ານແຊນທໍຣໍາ
ອະດີດສະມາຊິກສະພາສູງສະຫະລັດກ່າວວ່າ “ພວກເຮົາບໍ່ເຊື່ອຕາມທີ່ບັນດາຜູ້ຊ່ຽນຊານ
ໄດ້ກ່າວວ່າການແຂ່ງຂັນຍຸຕິລົງໄປແລ້ວ. ພວກເຮົາຍັງຢູ່ທີ່ນີ້ ຍັງຕໍ່ສູ້ໄປເລື້ອຍໆ.”
ທ່ານ ແຊນທໍຣໍາ ໄດ້ຮັບຄະແນນສຽງດີຫລາຍໃນເຂດອະນຸລັກນິຍົມພາກໃຕ້ນັ້ນ ແຕ່
ທ່ານ ມິດ ຣອມນີ ອະດີດຜູ້ວ່າການລັດແມສຊາຈູແຊສ ຍັງມີຄະແນນນໍາໜ້າຫລາຍຢູ່ ໃນ
ການແຂ່ງຂັນເພື່ອໃຫ້ໄດ້ຖືກແຕ່ງຕັ້ງເປັນຜູ້ແທນພັກໃນການເລືອກຕັ້ງປະທານາທິບໍດີນັ້ນ
ການສໍາຫລວດຫາງສຽງພວກທີ່ປ່ອນບັດອອກມາ ຈາກໜ່ວຍປ່ອນບັດທັງໝົດໃນລັດ
ຫລຸຍເຊຍນາ ຊີ້ໃຫ້ເຫັນວ່າ ທ່ານແຊນທໍຣໍາໄດ້ຮັບ 47 ເປີເຊັນຂອງຄະແນນສຽງວັນເສົາ
ວານນີ້ ສົມທຽບກັບທ່ານມິດ ຣອມນີ ທີ່ໄດ້ 27 ເປີເຊັນ.
ອະດີດປະທານສະພາຕໍ່າສະຫະລັດ ທ່ານ Newt Gingrich ມາໃນອັນດັບສາມ ຄືໄດ້
16 ເປີເຊັນ. ສ່ວນທ່ານ ຣອນ ພອລ ສະມາຊິກສະພາຕໍ່າຈາກລັດເທກຊັສ ມາໃນອັນ
ດັບສີ່ ໄດ້ 6 ເປີເຊັນ.
ລັດຫລຸຍເຊຍນາມີຕົວແທນທັງໝົດ 46 ຄົນ ທີ່ຈະໄປຮ່ວມກອງປະຊຸມໃຫຍ່ຂອງພັກຣີພັບ
ບລິກັນໃນເດືອນສິງຫາ ແລະໃນນັ້ນ20 ຄົນແມ່ນໄດ້ຕັດສິນໃຈເອົາຄະແນນສຽງໃຫ້ທ່ານ
ແຊນທໍຣໍາ ໄປແລ້ວໃນວັນເສົາວານນີ້. ສ່ວນຈໍານວນທີ່ຍັງເຫລືອ ແມ່ນຈະຕັດສິນໃຈໃນ
ກອງປະຊຸມພັກລະດັບລັດໃນເດືອນມິຖຸນານີ້.
ປັດຈຸບັນນີ້ ທ່ານ ມິດ ຣອມນີ ໄດ້ຮັບສຽງສະໜັບສະໜູນຈາກຜູ້ແທນພັກຫລາຍກວ່າ 560
ຄົນແລ້ວ ຂອງຈໍານວນທີ່ຕ້ອງການ 1,144 ຄົນ ເພື່ອທີ່ຈະຖືກເລືອກເປັນຜູ້ແທນພັກເຂົ້າ
ແຂ່ງຂັນເລືອກຕັ້ງປະທານາທິບໍດີນັ້ນ.