ທ່ານ Mitt Romney ຜູ້ຫວັງຈະຄວ້າຕໍາແໜ່ງປະທານາທິບໍດີສະຫະລັດ ໄດ້ຮັບໄຊຊະນະ
ໃນການເລືອກຕັ້ງຂັ້ນຕົ້ນໃນສອງລັດເມື່ອວັນອັງຄານວານນີ້ ຄືຊະນະຢ່າງງ່າຍດາຍໃນລັດ
ອາຣິໂຊນາ ແລະມີຄະແນນນໍາໜ້າໃນການ ຕໍ່ສູ້ກັນທີ່ດຸເດືອດໃນລັດ Michigan ຊຶ່ງເປັນ
ລັດບ້ານເກີດເມືອງນອນຂອງທ່ານ ທາງພາກເໜືອຂອງສະຫະລັດ.
ທ່ານຣອມນີ ກ່າວຂອບອົກຂອບໃຈພວກສະໜັບສະໜຸນຂອງທ່ານທີ່ຮ້ອງໂຮໃຫ້ກໍາລັງໃຈ
ເມື່ອຕອນແລງວັນອັງຄານວານນີ້ ໃນສິ່ງທີ່ທ່ານອະທິບາຍ ວ່າເປັນໄຊຊະນະຄັ້ງຍິ່ງໃຫຍ່ໃນ
ສອງລັດດັ່ງກ່າວ.
ຂະນະດຽວກັນທ່ານ ຣອມນີ ໄດ້ກ່າວໂຈມຕີ ນະໂຍລາຍຕ່າງໆຂອງປະທານາທິບໍດີບາຣັກ
ໂອບາມາ ແລະພ້ອມດຽວກັນທ່ານໃຫ້ຄໍາໝັ້ນສັນຍາຈະສ້າງໜ້າວຽກ ເຮັດໃຫ້ເສດຖະກິດ
ຂອງປະເທດຊາດມີການເຕີບໂຕຄືນອີກ ແລະລົດຜ່ອນໜີ້ສິນ ພ້ອມທັງຂະໜາດຂອງລັດຖະ
ບານລົງ.
ທ່ານຣອມນີ ໄດ້ຕໍ່ສູ້ຢ່າງໜັກໜ່ວງໃນລັດມິຊິກັນ ເພື່ອເອົາຊະນະຄູ່ແຂ່ງທ່ານຣິກ ແຊນທໍຣໍາ
ທີ່ປາກົດວ່າໄດ້ຮັບຄະແນນສູງຂຶ້ນ ແລະເປັນຜູ້ໄດ້ຮັບໄຊຊະນະທັງສາມລັດເມື່ອຕົ້ນເດືອນນີ້
ຄື ລັດໂຄໂລຣາໂດ ມິນເນໂຊຕ້າ ແລະ ມິສຊູຣີ. ຜົນການຢັ່ງສຽງມະຫາຊົນຂອງທັງສອງ
ທ່ານປາກົດວ່າມີ ຄະແນນເກືອບເທົ່າໆກັນ ກ່ອນການແຂ່ງຂັນກັນ ໃນວັນອັງຄານວານນີ້.
ຄັ້ງນຶ່ງກ່ອນໜ້ານີ້ ທ່ານ ມິດ ຣອມນີ ມີຄະແນນນໍາໜ້າຢ່າງຫຼວງຫຼາຍໃນລັດມິຊິກັນ ຊຶ່ງ
ເປັນລັດບ້ານເກີດເມືອງນອນຂອງທ່ານແລະເປັນລັດທີ່ບິດາ ຂອງທ່ານເປັນຜູ້ປົກຄອງລັດ
ທີ່ມີຄວາມນິຍົມສູງ. ທ່ານຣອມນີ ຊະນະການເລືອກຕັ້ງຂັ້ນຕົ້ນໃນລັດນີ້ເມື່ອປີ 2008.
