ລິ້ງ ສຳຫລັບເຂົ້າຫາ

ວັນອັງຄານ, ໑໖ ເມສາ ໒໐໒໔

ທ່ານມິດ ຣອມນີ ຈະໄດ້ເປັນ ຜູ້ສະໝັກປະທານາທິບໍດີ ຂອງພັກຣີພັບບລິກັນ (ວີດີໂອ)


ທ່ານມິດ ຣອມນີ ຜູ້ສະໝັກປະທານາທິບໍດີ ສັງກັດພັກ Republican ຕ້ອນຮັບພວກສະໜັບສະໜຸນທ່ານ ຫຼັງຈາກທໍາ ການໂຄສະນາຫາສຽງທີ່
ລັດເນວາດາ.
ວັນທີ 30 ພຶດສະພາ 2012.
ທ່ານມິດ ຣອມນີ ຜູ້ສະໝັກປະທານາທິບໍດີ ສັງກັດພັກ Republican ຕ້ອນຮັບພວກສະໜັບສະໜຸນທ່ານ ຫຼັງຈາກທໍາ ການໂຄສະນາຫາສຽງທີ່ ລັດເນວາດາ. ວັນທີ 30 ພຶດສະພາ 2012.

ທ່ານ​ມິດ ຣອມນີ ອະດີດ​ຜູ້​ປົກຄອງ​ລັດ Massachusetts ​ແມ່ນ​ຈະ​ໄດ້​ຮັບການ​ແຕ່ງ​ຕັ້ງ​ໃຫ້​ເປັນ​ຜູ້​ສະໝັກ​ແຂ່ງຂັນ​ປະທານາທິບໍດີ​ຂອງ​ພັກ Republican ຢ່າງ​ແນ່ນອນ​ແລ້ວ.

ທ່ານຣອມນີ ​ໄດ້​ຮັບ​ຄວາມ​ໝັ້ນ​ໃຈ​ໃນ​ການ​ທີ່​ຈະ​ຖືກ​ແຕ່ງ​ຕັ້ງ​ນີ້ ຫລັງ ຈາກທີ່ໄດ້​ຮັບ​ໄຊຊະນະ​ໃນ​ການ​ເລືອກ​ຕັ້ງ​ຂັ້ນ​ຕົ້ນ​ຂອງ​ພັກ ໃນ​ວັນ​ອັງ ຄານ​ວານ​ນີ້ ​ທີ່​ລັດ Texas ບ່ອນ​ທີ່ມີ​ການ​ແຂ່ງຂັນ​ກັນຍາ​ດ​ເອົາ​ຜູ້ແທນ​ຂອງ​ພັກ ​ຈໍານວນ​ຫຼາຍກວ່າ 150 ທ່ານ ຊຶ່ງ​ທ່ານຣອມນີ​ໄດ້ຮັບ​ສຽງ ​ສະໜັບສະໜຸນ ຈາກ​ປະມານ 88 ຄົນ ໃນ​ຈໍານວນ​ຜູ້​ຕາງ​ໝ້າ​ທັງ​ໝົດ​ ນັ້ນ ຊຶ່ງເຮັດໃຫ້​ຈໍານວນ​ຜູ້​ສະໜັບສະໜຸນທ່ານ​ ​ເພີ່ມ​ຂຶ້ນ​ເປັນຫຼາຍ​ກວ່າ 1144 ຄົນ​ ທີ່ທ່ານຕ້ອງການ​ນັ້ນ.

​ໃນ​ຖະ​ແຫຼ​ງການ​ສະບັບ​ນຶ່ງ ທີ່ໜ່ວຍ​ໂຄສະນາ​ຫາ​ສຽງ​ເລືອກ​ຕັ້ງ​ຂອງ​ທ່ານ​ນໍາ​ອອກ​ເຜີຍ​ແຜ່ນັ້ນ ທ່ານຣອມນີ ກ່າວ​ວ່າ ພັກ​ໄດ້​ເຂົ້າ​ມາ​ຮ່ວມ​ກັນ​ແລ້ວ​ໂດຍ​ມີເປົ້າ​ໝາຍ​ ເຮັດ​ໃຫ້​ຄວາມ​ລົ້ມ​ແຫຼວ​ມາ​ເປັນ​ເວລາ 3 ປີ​ເຄິ່ງນັ້ນ ຢູ່​ເບື້ອງ​ຫຼັງ​ຂອງ​ພວກ​ເຮົາ ​ແລະ​ຈະ​ກະທໍາ​ທຸກ​ສິ່ງ​ທຸກ​ຢ່າງ​ເພື່ອ​ໃຫ້​ອາ​ເມຣິກາ ກັບຄືນ​ໄປ​ມີ​ວຽກ​ການ​ເຮັດ​ຢ່າງ​ເຕັມ​ສ່ວນ ​ແລະ​ຄວາມ​ຈະ​ເລີ​ນຮຸ່ງ​ເຮືອງ​ເທົ່າ​ນັ້ນ.

​ບັນດາ​ສະມາຊິກພັກ Republican ຈະ​ຈັດ​ກອງ​ປະຊຸມ​ຫຼວງ​ຂອງພວກ​ຕົນ​ຂຶ້ນ ທີ່​ເມືອງ Tampa ລັດ​ຟລໍຣິດາ ​ໃນ​ເດືອນ​ສິງຫາ ​ເພື່ອ​ຮັບ​ເອົາ​ການ​ແຕ່ງ​ຕັ້ງທ່ານຣອມນີ ​ໃຫ້​ເປັນ​ຜູ້​ສະມັກ​ເລືອກ​ຕັ້ງ​ປະທານາທິບໍດີ ຂອງພັກ​ຢ່າງ​ເປັນ​ທາງ​ການ ​ແລະ​ຮັບຮອງ​ເອົາ​ຜູ້​ທີ່​ທ່ານ​ຈະເລືອກ​ເອົາ​ເປັນ​ຮອງ​ປະທານາທິບໍດີ​ຂອງ​ທ່ານ​ນັ້ນ. ທ່ານຣອມນີຈະ​ເປັນຄົນ​ທໍາ​ອິດ​ທີ່​ຖື​ສາສະໜາ Mormon ທີ່​ຈະ​ຖືກ​ແຕ່ງ​ຕັ້ງ​ໃຫ້​ເປັນ​ຜູ້​ສະໝັກຮັບ​ເລືອກ​ຕັ້ງປະທານາທິບໍດີ ຈາກ​ພັກ​ການ​ເມືອງ​ໃຫຍ່ຂອງ​ສະຫະລັດ.

ຫຼັງ​ຈາກ​ເສຍ​ໄຊ​ໃນ​ການແຂ່ງຂັນ​ເປັນ​ຜູ້ສະໝັກ​ເລືອ​ກຕັ້ງ​ຂອງ​ພັກ Republican ​ເມື່ອ 4 ປີຜ່ານມາ​ໃຫ້​ທ່ານ John McCain ນັ້ນ ທ່ານ ຣອມນີ​ແມ່ນ​ໄດ້​ຜ່ານ​ຜ່າ​ກັບການແຂ່ງຂັນ​ທີ່​ຫຍຸ້ງຍາກ​ ​ຈາກຜູ້​ສະໝັກ ແຂ່ງ​ຫຼາຍ​ຄົນ ຮວມທັງທ່ານ Newt Gingrich, ທ່ານ Rick Santorum, ທ່ານ Rick Perry ​ແລະ​ທ່ານ Herman Cain.

ຜົນ​ການ​ສໍາ​ຫຼວດຫາງ​ສຽງ​ປະຊາຊົນ​ຫວ່າງ​ໄວໆມາ​ນີ້ ສະ​ແດງ​ໃຫ້​ເຫັນ​ວ່າ ທ່ານ​ມີ​ສຽງ​ນິຍົມ​ເກືອບ​ເທົ່າໆ​ກັນ​ກັບ ​ປະທານາທິບໍດີໂອ​ບາ​ມາ ທີ່​ບໍ່​ມີຄູ່​ແຂ່ງ​ຄົນ​ໃດ​ເລີຍ ໃນ​ການ​ຍາດ​ເອົາ​ການຖືກ​ແຕ່ງ​ຕັ້ງ​ຈາກ​ພັກ​ເດໂມ ກຣັດນັ້ນ.

XS
SM
MD
LG