ປະທານາທິບໍດີ ບາຣັກ ໂອບາມາແຫ່ງສະຫະລັດ ທໍາການຢ້ຽມຢາມເມືອງ Las Vegas ສູນກາງການພະນັນໃນລັດເນວາດາແລະຖານທັບອາກາດແຫ່ງນຶ່ງໃນລັດ Colorado ເຂດ ພູ Rocky ໃນວັນພະຫັດມື້ນີ້ ເພື່ອຊຸກຍູ້ໂຄງການພະລັງງານໃໝ່ຂອງທ່ານ ຢູ່ໃນ 2 ລັດ ທີ່ສໍາຄັນສໍາລັບການເລືອກຕັ້ງປະທານາທິບໍດີໃນປີ 2012 ນີ້.
ຄາດວ່າທ່ານໂອບາມາ ຈະເວົ້າເລື້ອງການປະຕິຮູບດ້ານພະລັງງານຢູ່ທີ່ບ່ອນຢຸດແວ່ທັງສອງບ່ອນ ເພື່ອດຶງເອົາຄວາມສົນໃຈຂອງປະຊາຊົນ ຕໍ່ຂໍ້ສະເໜີຂອງທ່ານກ່ຽວກັບໃຊ້ພະລັງງານ ທີ່ສະອາດ ແລະໃຫ້ມີການຜະລິດນໍ້າມັນ ແລະແກັສທໍາມະຊາດພາຍໃນປະເທດຫລາຍຂຶ້ນ. ຖ້ອຍຖະແຫລງຂອງທ່ານມີຂຶ້ນຫລັງຈາກໄດ້ຮັບການຕໍາໜິຕິຕຽນຈາກພວກ ສະມາຊິກພັກ Republican ໃນຕົ້ນສັບປະດານີ້ກ່ຽວກັບການໂຈະແຜນການສ້າງທໍ່ລໍາລຽງນໍ້າມັນຂ້າມຊາດຈາກປະເທດການາດາ ຫາ ລັດ Texas ຂອງສະຫະລັດນັ້ນ.
ທັງລັດເນວາດາ ແລະລັດ Colorado ກໍານົດຈະມີການເລືອກຕັ້ງປະທານາທິບໍດີຂັ້ນຕົ້ນຂອງພັກ Republican ຂຶ້ນພາຍໃນອີກ 2 ສັບປະດາຂ້າງໜ້ານີ້.
ໃນຂະນະດຽວກັນ ພວກຜູ້ສະມັກປະທານາທິບໍດີສັງກັດພັກ Republican ອັນມີທ່ານ Newt Gingrich ທ່ານມິດ ຣອມນີ ທ່ານ ຣິກ ຊັງໂຕຣອມ ແລະທ່ານຣອນ ໂພນ ຈະປະເຊີນໜ້າກັນໃນການໂຕ້ ວາທີກັນໃນແລງວັນພະຫັດມື້ນີ້ທີ່ລັດຟລໍຣີດາ. ພັກ Republican ຈະມີການເລືອກຕັ້ງຂັ້ນຕົ້ນຂອງຕົນໃນວັນອັງຄານໜ້ານີ້. ການແຂ່ງຂັນໃນລັດຟລໍຣີດາ ຈະເປັນການແຂ່ງຂັນລະຫວ່າງທ່ານ Newt Gingrich ແລະທ່ານ ມິດ ຣອມນີ ຊຶ່ງເວລານີ້ກໍາລັງມີສຽງນໍາໜ້າ ແລະເບິ່ງຄືວ່າ ຈະໂຕ້ວາທີກັນເລື້ອງປະເດັນຕ່າງໆ ເຊ່ນເລື້ອງຄົນເຂົ້າເມືອງ ແລະຄວາມສໍາພັນຂອງສະຫະລັດກັບຄີວບາ ຊຶ່ງເປັນລັດທີ່ຕັ້ງຢູ່ໃກ້ທີ່ສຸດ ກັບປະເທດຄອມມີວນິດ ເທິງເກາະດອນແຫ່ງນີ້.
ໃນວັນພຸດວານນີ້ ປະທານາທິບໍດີໂອບາມາ ໄດ້ໄປຢ້ຽມຢາມໂຮງງານ ເຮັດສາຍພານສົ່ງເຄື່ອງ ໃນລັດໄອໂອວາ ເພື່ອສົ່ງເສີມແຜນການເສດ ຖະກິດທີ່ທ່ານໄດ້ເປີດເຜີຍອອກ ໃນລະຫວ່າງການກ່າວປາໄສປະຈໍາປີຂອງທ່ານຕໍ່ສະພາຮ່ວມສະຫະລັດໃນຄໍ່າຄືນວັນອັງຄານຜ່ານມານີ້ ຊຶ່ງປະທານາທິບໍດີ ໂອບາມາກ່າວວ່າ ສິ່ງສໍາຄັນສໍາລັບການປ່ຽນແປງນັ້ນ ແມ່ນໃຫ້ລັດຖະສະພາຮັບຜ່ານການປະຕິຮູບເລື້ອງການເສຍພາສີນັ້ນ.