ເງິນໃບ 10 ໂດລາ ສະຫະລັດ ຈະປະກອບດ້ວຍຮູບພາບຂອງແມ່ຍິງ ສະຫະລັດ ຢ່າງໂດດເດັ່ນໃນປີ 2020.
ຮູບໃໝ່ນີ້ຈະໄປແທນທີ່ຮູບຂອງທ່ານ Alexander Hamilton, ເຊິ່ງເປັນລັດຖະມົນຕີ ກະຊວງ ການເງິນຂອງ ສະຫະລັດ ຄົນທຳອິດ, ເຊິ່ງຮູບຂອງທ່ານໄດ້ຖືກບັນຈຸໃສ່ເງິນໃບ 10 ໂດລາ ມາຕັ້ງແຕ່ທ້າຍຊຸມປີ 1920. ການອອກແບບເງິນໃໝ່ ຈະໄດ້ຖືກເປີດໂຕໃຫ້ທັນເວລາກັບ ວັນຄົບຮອບ 100 ຂອງການໃຫ້ສັດຕະຍາບັນ ຢ່າງເປັນທາງການ ໃນການແກ້ໄຂລັດຖະທຳມະນູນ ທີ່ໄດ້ໃຫ້ສິດແມ່ຍິງໃນການປ່ອນ ບັດເລືອກຕັ້ງ.
ລັດຖະມົນຕີ ກະຊວງການເງິນ ທ່ານ Jacob Lew ໄດ້ປະກາດກ່ຽວກັບ ແຜນການອອກແບບ ເງິນໃບ 10 ໃໝ່ວັນພຸດວານນີ້. ທ່ານ Lew ກ່າວວ່າ ກະຊວງການເງິນຈະເລີ້ມການໂຄສະນາ ສື່ສັງຄົມຕັ້ງສາຍາວ່າ “The New 10 ຫຼື ໃບສິບດອນໃໝ່” ເພື່ອເຊື້ອເຊີນໃຫ້ມີຄວາມເຫັນ ກ່ຽວກັບ ວ່າຮູບໃຜຄວນຈະໄດ້ຖືກເລືອກ ໃສ່ເງິນໃບ 10 ໃໝ່ນີ້, ພ້ອມດ້ວຍການປະຊຸມສາທະລະນະຫຼາຍຄັ້ງ. ທ່ານຈະເປີດເຜີຍໃຫ້ຊາບກ່ຽວ ກັບການຕັດສິນຂອງທ່ານ ພາຍໃນປີນີ້.
ຮູບແມ່ຍິງບໍ່ເຄີຍໄດ້ຖືກພິມໃສ່ໃບເງິນຂອງ ສະຫະລັດ ຕັ້ງແຕ່ປີ 1896, ເມື່ອທ່ານ ນາງ Martha Washington, ພັນລະຍາຂອງປະທານາທິບໍດີ ສະຫະລັດ ຄົນທຳອິດ ທີ່ໄດ້ຖືກພິມລົງຢູ່ໃນເງິນ ໃບໜຶ່ງໂດລາ.
ການປະກາດໃນວັນພຸດວານນີ້ ແມ່ນຕາມມາດ້ວຍການໂຄສະນາທາງອອນໄລນ໌, “ແມ່ຍິງໃນໃບ 20 ຫຼື Women on 20s” ທີ່ມີເປົ້າໝາຍຄ້າຍຄືກັນສຳລັບເງິນໃບ 20 ໂດລາ ເຊິ່ງປະຈຸບັນປະກອບດ້ວຍ ຮູບພາບຂອງ ທ່ານ Andrew Jackson, ປະທານາທິບໍດີຄົນທີ 7 ຂອງສະຫະລັດ. ຜົນການເລືອກຕັ້ງສ່ວນໃຫຍ່ ໄດ້ເລືອກເອົາຮູບຂອງ ນາງ Harriet Tubman ແມ່ຍິງຜິວດຳ ແລະ ເປັນຂ້າທາດທີ່ໄດ້ຫຼົບໜີເຊິ່ງນຳພາໃຫ້ຂ້າທາດອື່ນໆຫຼາຍພັນຄົນໄປສູ່ຄວາມເປັນອິດສະຫຼະ ໃນຊຸມປີກ່ອນສົງຄາມກາງເມືອງ ເພື່ອແທນທີ່ຮູບຂອງທ່ານ Jackson ຢູ່ໃນເງິນໃບ 20 ນັ້ນ.
