ກອງທັບສະຫະລັດ ໄດ້ເປີດສາກທຳການໂຈມຕີທາງອາກາດ
ສອງຮອບ ໃນວັນສຸກວານນີ້ ຢູ່ທາງພາກຕາເວັນຕົກສຽງເໜືອ
ຂອງອີຣັກ ໂດຍໃຊ້ຍົນທີ່ບໍ່ມີຄົນຂັບ ແລະເຮືອບິນລົບ.
ໂຄສົກທຳນຽບຫ້າແຈ ພົນເຮືອຈັດຕະວາ John Kerby ກ່າວວ່າ
ຍົນບໍ່ມີຄົນຂັບ ຫລື drone ໄດ້ຖິ້ມລະເບີດໃສ່ ພວກຫົວຕໍ່ສູ້ ລັດອິສ
ລາມ ໃກ້ກັບເມືອງ Irbil ໃນວັນສຸກວານນີ້. ທ່ານກ່າວວ່າ ຕໍ່ມາ ເຮືອບິນລົບໄດ້ຖີ້ມລະເບີດແປດລູກໃສ່ລົດແລະບ່ອນຍິງລູກປືນຄົກ ຢູ່ໃນເຂດນັ້ນ.
ທ່ານກ່າວວ່າ ກອງທັບສະຫະລັດປະຕິບັດການໂຈມຕີ ເພື່ອຊ່ວຍປ້ອງກັນເມືອງ Ibril ບ່ອນທີ່ພະນັກງານສະຫະລັດ ກຳລັງໃຫ້ການຊ່ວຍເຫລືອແກ່ລັດຖະບານ ອີຣັກ.
ກ່ອນໜ້ານັ້ນ ໃນວັນສຸກຄືກັນ ກອງທັບສະຫະລັດກໍໄດ້ຖີ້ມລະເບີດ
ໜັກ 250 ກິໂລ ທີ່ຊີ້ນຳໂດຍແສງ laser ໃສ່ໜ່ວຍປືນໃຫຍ່ແຫ່ງນຶ່ງ
ທີ່ໄດ້ຍິງຖະຫລົ່ມໃສ່ ກອງກຳລັງຊາວ Kurd ທີ່ປ້ອງກັນເມືອງ Irbil.
ເຈົ້າ ໜ້າທີ່ລັດຖະບານຂັ້ນສູງຄົນນຶ່ງກ່າວວ່າ ການໂຈມຕີຂອງ
ສະຫະລັດໄດ້ມີຂື້ນ ໃນຂະນະພວກລັດອິສລາມຫົວຮຸນແຮງ ໄດ້
ເລີ້ມບຸກຄືບໜ້າ ແລະຂົ່ມຂູ່ຕໍ່ເຂດອ້ອມແອ້ມເມືອງ Irbil ຂອງ
ຊາວ Kurd ນັ້ນ.
ທຳນຽບຫ້າແຈ ກ່າວອີກວ່າ ເຮືອບິນທະຫານສະຫະລັດ ໄດ້ຖີ້ມເຄື່ອງຂອງຊ່ວຍເຫລືອ
ດ້ານມະນຸດສະທຳເປັນມື້ທີ່ສອງ ໃນວັນເສົາມື້ນີ້ ໃຫ້ແກ່ຫລາຍພັນຄົນ ຊຶ່ງສ່ວນໃຫຍ່ເປັນອົບພະຍົບຊາວຄຣິສ ແລະຊາວ Yadizi ຜູ້ທີ່ໄດ້ຫລົບໜີຈາກບ້ານເຮືອນຂອງເຂົາ
ເຈົ້າ ຕໍ່ໜ້າການບຸກຄືບໜ້າມາຂອງພວກນັກລົບ ລັດອິສລາມ ແລະພາກັນໄປລີ້ໄພຢູ່ຕາມ
ຈ້າຍພູ Sinjar.
ປະທານນາທິບໍດີ ສະຫະລັດ ທ່ານ Barack Obama
ໄດ້ອະນຸມັດ ໃນວັນພະຫັດ ໃຫ້ເຮືອບິນທະຫານສະຫະລັດ
“ທຳການໂຈມຕີແບບມີເປົ້າໝາຍ” ຕ້ານ ພວກຫົວຮຸນແຮງ
ລັດອິສລາມ ພ້ອມກັບນຳສົ່ງອາຫານ ໃຫ້ແກ່ພວກອົບພະຍົບ
ທີ່ຕິດຄ້າງຢູ່ນັ້ນ.
ໃນວັນສຸກວານ ນີ້ ທ່ານ Obama ໄດ້ສົ່ງໜັງສືສະບັບນຶ່ງ
ເຖິງປະທານສະພາຕ່ຳສະຫະລັດ ທ່ານ John Boehner
ໃນການປະຕິບັດຕາມມະຕິວ່າດ້ວຍການໃຊ້ອຳນາດສົງຄາມ
ໂດຍໄດ້ຊີ້ແຈງກ່ຽວກັບສະຖານນະການ ໃຫ້ຟັງ.
ວີດີໂອ: ພວກນັບຖືສາສະໜາສ່ວນນ້ອຍ ພາກັນໜີໄປຫລົບໄຟ ຢູ່ໃນເຂດ ຂອງຊາວເຄີດ:
