ລິ້ງ ສຳຫລັບເຂົ້າຫາ

logo-print

ທັງສອງພັກ ຂອງ ສະຫະລັດ ກຳລັງເລັງ ໄປຂ້າງໜ້າ ໃສ່ ການເລືອກຕັ້ງ ໃນປີ 2016


ເບິ່ງວີດີໂອ ພັກຣີພັບບລີກັນ ໄດ້ຮັບໄຊຊະນະ ການເລືອກຕັ້ງກາງສະໄໝ

ພັກຣີພັບ​ບລີ​ກັນ ກຳລັງກຽມພ້ອມ ທີ່ຈະເຂົ້າຄວບຄຸມທັງສະພາຕ່ຳ
ແລະ ສະພາສູງ ຂອງສະຫະລັດ ໃນເດືອນມັງກອນ ຈະມາເຖິງນີ້
ຫຼັງຈາກໄດ້ກວດ ເອົາໄຊຊະນະ ໃນການເລືອກຕັ້ງກາງສະໄໝ ​
ເມື່ອໄວໆຜ່ານມານີ້. ພັກເດໂມແຄຣັດ ໄດ້ສູນເສຍສຽງສ່ວນຫຼາຍ
ໃນສະພາສູງ ແລະ ບັດນີ້ຈະຕ້ອງປັບໂຕ ມາເປັນພັກ ທີ່ມີສຽງ
ສ່ວນຫນ້ອຍ ຢູ່ໃນທັງສອງສະພາ. ເຖິງແມ່ນວ່າ ຄວາມ​ສັບສົນ
ທາງການເມືອງ ຍັງຄ່ອຍໆສືບຕໍ່ສະຫງົບລົງ ຈາກການປ່ອນ​ບັດ
ກາງສະໄໝ ເມື່ອບໍ່ດົນມານີ້ ກໍ​ຈິງ ​ແຕ່ທັງສອງພັກ ແມ່ນພາກັນ
ເລັງໄປຂ້າງໜ້າ ໃສ່ການເລືອກຕັ້ງ ປີ 2016 ເວລາ ຊາວ
ອາເມຣິກັນ ບໍ່ພຽງແຕ່ຈະເລືອກເອົາ ສະມາຊິກສະພາຊຸດໃໝ່​
ເທົ່າ​ນັ້ນ ແຕ່ຍັງຈະຕ້ອງເລືອກເອົາ ປະທານາທິບໍດີຄົນໃໝ່ ຂອງ​ປະ​ເທດ​ນຳອີກ. ຜູ້ສື່ຂ່າວ
ວີໂອເອ Jim Malone ມີລາຍງານ ກ່ຽວ​ກັບ​ເລື່ອງ​ນີ້ ຈາກວໍຊິງຕັນ ຊຶ່ງໄຊຈະເລີນສຸກ ຈະ
ນຳມາສະເໜີທ່ານ ໃນອັນດັບຕໍ່ໄປ.

ໃນຂະນະທີ່ ພັກຣີພັບບລີກັນ ພວມກຽມພ້ອມ ທີ່ຈະເຂົ້າຄວບ​ຄຸມອຳນາດ ໃນລັດຖະສະພາ ທັງສອງພັກ ກຳລັງ​ໄຈ້ແຍກ​ເບິ່ງຜົນ ຂອງການເລືອກຕັ້ງກາງສະໄໝ ໃນປີ 2014 ແລະ ມອງ​ໄປ​ຂ້າງ​ໜ້າ ​ເພື່ອ​ ຈະນຳເອົາບົດຮຽນດັ່ງກ່າວ ​ໄປໃຊ້ ສຳຫລັບ ການເລືອກຕັ້ງຕໍ່​ໄປ ໃນປີ 2016.

ທ່ານ Whit Ayres ນັກສຳຫລວດຫາງ​ສຽງ ຂອງພັກຣີພັບບລີກັນ ກ່າວວ່າ ໄຊຊະນະຕ່າງໆ ຂອງພັກຣີພັບບລີກັນ ໃນລັດຖະສະພານັ້ນ ອາດ​ຈະ​ເປັນ​ການ​ກະກຽມ ​ເພື່ອ​ໃຫ້​ໄດ້​ ໄຊຊະນະຍາດ​ເອົາ ທຳນຽບຂາວຄືນມາ ໃນສອງປີຂ້າງໜ້າ ຕັ້ງ​ແຕ່ມື້ນີ້ໄປ.

ທ່ານ Ayres ເວົ້າວ່າ “ພວກເຮົາມີ ບັນດາຜູ້ສະໝັກ ທີ່ດີກວ່າເກົ່າ ແລະ ພວກເຮົາມີ ບັນດາຜູ້ສະໝັກ ຜູ້ທີ່ອາດສາມາດເຕົ້າໂຮມສະມາຊິກ ພັກຣີພັບບລີກັນ ເຂົ້າກັນ
ແລະ ແນ່ນອນແລ້ວອັນນັ້ນ ເປັນສິ່ງທີ່ພວກເຮົາຈະຕ້ອງເຮັດ ໃນປີ 2016.”

ພັກຣີພັບບລີກັນ ບໍ່ມີຄວາມຂາດແຄນ ດ້ານບັນດາຜູ້ສະໝັກແຂ່ງຂັນ ເປັນປະທານາທິບໍດີ ຜູ້ທີ່ມີຄວາມຫວັງສູງ ເຊັ່ນ ອະດີດ ຜູ້ປົກຄອງເມືອງ ລັດຟໍຣີດາ ທ່ານ Jeb Bush ຜູ້ປົກ
ຄອງເມືອງ ລັດນິວ ເຈີຊີ ທ່ານ Chris Christie ແລະ ສະມາຊິກສະພາສູງ ລັດແທກຊັດ ທ່ານ Ted Cruz.

ທ່ານ Ayres ກ່າວວ່າ ​ແຕ່​ຍັງ​ບໍ່​ຮູ້ ຢ່າງ​ຈະ​ແຈ້ງ​ເທື່ອ​ວ່າ ຜູ້​ໃດ ມີ​ຄະ​ແນນ​ສຽງ ນຳ​ໜ້າ.

ທ່ານ Ayres ເວົ້າວ່າ “ຜູ້ໃດກໍ່ຕາມ ທີ່ໄດ້​ໄຊຊະນະ ມັນຈະພິສູດໃຫ້ເຫັນ ​ເຖິງຄວາມ
ສາມາດ ​ໃນ​ການ​ເຕົ້າ​ໂຮມກຸ່ມ Tea Party ກຸ່ມ Libertarian ກຸ່ມ​ຈັດຕັ້ງຫຼັກ
ກຸ່ມສັງຄົມອະນຸລັກນິຍົມ ແລະ ກຸ່ມສາກົນນິຍົມ ຂອງພັກຣີພັບບລີກັນ ທັງໝົດ ​
ໃຫ້ເຂົ້າກັນເປັນແນວໂຮມອັນໜຶ່ງອັນດຽວ ແລະ ອຳ​ນວຍ​ໃຫ້​ແຕ່ລະກຸ່ມ​ເຫຼົ່ານັ້ນ
ເປັນທີ່ພຽງພໍ ເພື່ອສ້າງຕັ້ງສຽງສ່ວນຫຼາຍ​ໄດ້.”

ພັກ​ເດ​ໂມ​ແຄຣັດ ມີບັນຫາ​ທ້າ​ທາຍ​ ທີ່​ແຕກ​ຕ່າງ​ອອກ​ໄປ ​ໃນ​ການ​ເລັງ​ໄປຂ້າງ​ໜ້າ ​ເຖິງ​ປີ 2016.

ອະດີດ ລັດຖະມົນຕີ​ຕ່າງປະ​ເທດ ທ່ານ​ນາງ Hillary Clinton ​ແມ່ນ​ເປັນ​ທີ່​ຈະ​ແຈ້ງ​ແລ້ວວ່າ ​ມີ​ຄະ​ແນນ​ສຽງ​ນຳໜ້າ ​ໃນ​ການ​ເປັນໂຕ​ແທນ​ພັກເດ​ໂມ​ແຄຣັດ ສຳ​ຫລັບ​ປີ 2016 ຄັນ​ທ່ານ​ນາງ ຈະ​ລົງແຂ່ງຂັນ.

​ແຕ່ທ່ານ​ນາງ Celinda Lake ນັກ​ວາງ​ແຜນ​ຍຸດ​ທະ​ສາດ​ ຂອງ​ພັກເດ​ໂມ​ແຄຣັດ ​ເວົ້າວ່າ
ພັກ​ເດ​ໂມ​ແຄຣັດ ຕ້ອງ​ໄດ້​ຊອກ​ຫາ​ຄຳ​ຂວັນ​ທາງ​ດ້ານ​ເສດຖະກິດ ທີ່​ຈະ​ພາ​ໃຫ້​ຊະນະ.
ທ່ານ​ນາງ​ກ່າວ​ຕື່ມ​ວ່າ: “​ແລະ ​ໃນນາມ​ສະມາຊິກ​ພັກເດ​ໂມ​ແຄຣັດ ສິ່ງ​ທຳ​ອິດ​ທີ່​ພວກ​
ເຮົາ​ຄວນ​ເຮັດ​ນັ້ນ ​ແມ່ນ ​ເປີດ​ເຜີຍອອກ​ມາ ​ແຜນ​ເສດຖະກິດ ​ແລະ ນະ​ໂຍບາຍ
ສຳ​ຫລັບ​ອະນາຄົດ ທີ່​ຈະ​ຮັບປະກັນ​ໃຫ້ ທຸກໆ​ຄົນ​ພາຍໃນ​ປະ​ເທດ ສາມາດ ມີ​
ໂອກາດ ​ໃນ​ການ​ໄດ້​ຮັບ​ຄວາມ​ອຸດົມ​ຮັ່ງມີ ​ແກ່​ເຂົາ​ເຈົ້າ ​ແລະ ລູກ​ເຕົ້າຂອງເຂົາ​ເຈົ້າ.”

​ເພື່ອ​ທີ່​ຈະ​ໃຫ້ ທ່ານ​ນາງ Clinton ​ໄດ້​ຮັບ​ຜົນສຳ​ເລັດນັ້ນ ບັນດານັກວິ​ເຄາະ ​ທຳນາຍ​ວ່າ
ທ່ານ​ນາງ ຈະ​ຕ້ອງ​ຕີ​ຕົວອອກ​ຫ່າງ ​ໃນ​ລະດັບ​ໃດ​ລະດັບ​ນຶ່ງ ຈາກປະທານາທິບໍດີ ບາຣັກ
​ໂອ​ບາ​ມາ ​ທີ່ຖືກ​ໄດ້​ພິສູດ​ໃຫ້​ເຫັນ​ແລ້ວວ່າ ບໍ່​ເປັນທີ່​ນິຍົມ​ຊົມ​ຊອບ ​ໃນ​ການ​ເລືອກ​ຕັ້ງກາງ​
ສະ​ໄໝ​ໃນ​ປີ​ນີ້.

ທ່ານ​ນາງ Celinda Lake ເວົ້າວ່າ “ຂ້າພະ​ເຈົ້າຄິດ​ວ່າ ດຽວ​ນີ້ ຄົນ​ສ່ວນຫຼາຍ ມີ​ຜົນ​
ສະ​ລຸບແລ້ວ ອັນ​ທີ່​ຖືກຕ້ອງ ຫຼື ບໍ່​ຖືກຕ້ອງ ວ່າ ​ໃນ​ເມື່ອ ທ່ານ ​ໂອ​ບາ​ມາ ມີ​ການ​
ປ່ຽນ​ແປງນັ້ນ ທ່ານ ບໍ່​ມີ​ປະສົບ​ປະການຫຼາຍພຽງພໍ ທີ່​ພວກ​ເຮົາ​ຕ້ອງການ ​ເພື່ອ​
ເຮັດ​ໃຫ້​ທຸກ​ສິ່ງ​ ທຸກ​ຢ່າງ​ສຳ​ເລັດ​ເສັດ​ສິ້ນ​ໄປ ​ໃນ​ຕົວ​ຈິງ. ​ແຕ່ບໍ່​ມີ​ຜູ້​ໃດ​ ຕັ້ງຄຳ​ຖາມ​
ກ່ຽວ​ກັບ ຄຸນ​ນະ​ສົມບັດ ​ແລະ ປະສົບ​ປະການຕ່າງໆ ຂອງ​ທ່ານ​ນາງ Hillary
Clinton ເລີຍ.”

​ທ່ານ John Fortier ນັກວິ​ເຄາະ ຈາກ​ສູນ​ສຶກສາ ນະ​ໂຍບາຍ ​ໂຮມ​ສອງ​ຝ່າຍ ກ່າວ​ວ່າ
ເຖິງ​ແມ່ນ​ວ່າ ​ເປັນ​ຜູ້​ນິຍົມ​ຊົມ​ຊອບ ກໍ່ຕາມ ທ່ານ​ນາງ Clinton ຈະ​ປະ​ເຊີນ​ໜ້າ​ ກັບຄູ່​ແຂ່ງ
ຈາກສະມາ​ຊິກ​ເດ​ໂມ​ແຄຣັດ ບາງ​ສ່ວນ ຢ່າງ​ແນ່ນອນ.

ທ່ານ John Fortier ​ເວົ້າວ່າ “​ແລະ ມັນ​ຈະ​ເປັນ​ການ​ຍາກ ທີ່​ຈະ​ເອົາ​ຊະນະ ທ່ານ​
ນາງ Clinton ​ແລະ ຖ້າ​ຜູ້​ໃດ​ຜູ້​ນຶ່ງ ​ແຂ່ງຂັນ​ກັບ​ທ່ານ​ນາງ ​ແລະ ຂ້າພະ​ເຈົ້າຄິດ​ວ່າ ​ແນ່ນອນ​ທີ່​ສຸດ ວ່າ​ພວກຄູ່​ແຂ່ງຈະ​ອອກ​ມາທ້າ​ທາຍ ທ່ານ​ນາງ ​ແລະ ບາງທີພວກ​ເຂົາ​ເຈົ້າ ອາດຈະ​ພະຍາຍາມ ຖົກ​ຖຽງ ມາ​ຈາກ​ເບື້ອງ​ຊ້າຍສຸດຂອງ​ພັກ ແລະວ່າ ທ່ານ​ນາງ​ມັກ​ຈະ​ໃຊ້​ເລື່ອງທາງ​ທະຫານ ​ເຂົ້າ​ແກ້​ໄຂ​ນະ​ໂຍບາຍການ​ຕ່າງປະ​ເທດ.”

​ທ່ານ Ayres ສັງກັດ​ພັກຣີພັບ​ບລີ​ກັນ ກ່າວ​ວ່າ ແຕ່​ພັກ​ເດ​ໂມ​ແຄ​ຣັດ ອາດ​ປະ​ເມີນການ
​ຕ່ຳ​ເກີນ​ໄປ ກ່ຽວກັບ​ວ່າ ມັນ​ຈະ​ມີ​ຄວາມຍາກລຳ​ບາກຫຼາຍປານ​ໃດ ​ທີ່​ຈະຮັກສາ​ຕຳ​ແໜ່​ງ​
ໃນ ທຳນຽບຂາວ​ໄວ້​ໄດ້ ຫຼັງຈາກ​ປະທານາທິບໍດີ ​ໂອ​ບາ​ມາ.

ທ່ານ Ayres ​ເວົ້າວ່າ “ຂ້າພະ​ເຈົ້າ ຈະ​ບອກ​ທ່ານ​ວ່າ ມັນ​ເປັນ​ການ​ຍາກ​ທີ່​ສຸດ ສຳ​ຫລັບ ພັກໃດນຶ່ງ ຈະ​ເອົາ​ຊະນະ​ການ​ເລືອກ​ຕັ້ງປະທານາທິບໍດີ 3 ສະ​ໄໝລຽນຕິດ. ​ປະຫວັດສາດ​ແລ້ວ ​ແມ່ນ​ແນະໃຫ້ເຫັນ​ວ່າ ມັນ​ເປັນ​ເຫດການ​ ທີ່ຜິດ​ປົກກະຕິ​ທີ່​ສຸດ.”

ຄັ້ງຫລ້າສຸດ​ ທີ່​ມັນ​ໄດ້ເກີດ​ຂຶ້ນ ​ແມ່ນ ​ເມື່ອ​ປີ 1988 ​ໃນ​ເວ​ລາ ທີ່ຮອງ​ປະທານາທິບໍດີ ທ່ານ
George H.W. Bush ​ໄດ້​ຖືກ​ເລືອກຕັ້ງ​ໃຫ້ ​ເປັນ​ປະທານາທິບໍດີ ຕໍ່​ຈາກ ປະທານາທິບໍດີ
ທ່ານ Ronald Reagan ຫຼັງຈາກ ທີ່​ທ່ານ ດຳລົງ​ຕຳ​ແໜ່​ງ​ມາ 2 ສະ​ໄໝ​ແລ້ວ.

ລາຍງານບລອກສົດ! ຜົນການເລືອກຕັ້ງ ປະທານາທິບໍດີ ສະຫະລັດ 2020

ລາຍງານບລອກສົດ! ການເລືອກຕັ້ງ ໃນ ສະຫະລັດ ປີ 2020

ອະດີດຮອງປະທານາທິບໍດີິສະຫະລັດ ທ່ານໂຈ ໄບເດັນ ຊຶ່ງເປັນບຸກຄົນທີ່ຮູ້ຈັກກັນດີໃນວົງການເມືອງຂອງນະຄອນ ຫຼວງວໍຊິງຕັນ ເກືອບເຄິ່ງສັດຕະວັດແລ້ວນັ້ນ ຄາດຄະເນກັນວ່າ ຈະເປັນຜູ້ຊະນະການເລືອກຕັ້ງປະທານາທິບໍດີຂອງສະຫະລັດ ແລະຈະໄດ້ສາບານຕົວເຂົ້າຮັບຕຳແໜ່ງໃນວັນທີ 20 ມັງກອນຈະມາ ເປັນປະທານາທິບໍດີທີ່ມີອາຍຸແກ່ທີ່ສຸດ ໃນປະຫວັດສາດ. ທ່ານໄບເດັນ ສັງກັດພັກເດໂມແຄຣັດ ທີ່ໄດ້ເປັນສະມາຊິກສະພາສູງມາ 36 ປີ ແລະ 8 ປີ ເປັນຮອງປະທານາທິບໍດີ ໃນສະໄໝປະທານາທິບໍດີບາຣັກໂອບາມາ ແມ່ນຄາດກັນໂດຍອົງການຂ່າວຕ່າງໆ ໄດ້ເອົາຊະນະປະທານາທິບໍດີດໍໂນລ ທຣຳ ທີ່ລົງສະໝັກແຂ່ງຂັນເອົາຕຳແໜ່ງຕື່ມອີກ ໃນການໂຄສະນາຫາສຽງທີ່ຂົມຂື່ນ ແລະຫຼັງຈາກໄດ້ມີການນັບບັດຄະແນນສຽງຫຼັງຈາກການເລືອກຕັ້ງມາໄດ້ຫຼາຍມື້ແລ້ວ. ຄະແນນສຽງແມ່ນຍັງຈະໄດ້ຮັບການຢືນຢັນຢ່າງເປັນທາງການ ແລະພວມໄດ້ຮັບການທ້າທາຍຢູ່ໃນສານ ແຕ່ກໍຄາດກັນວ່າ ຈະຜ່ານຜ່າໄປໄດ້. ທ່ານໄບເດັນ ໄດ້ຊະນະຕຳແໜ່ງປະທານາທິບໍດີ ໂດຍໄດ້ຮັບຄະແນນຈາກຜູ້ແທນລັດ ຢ່າງໜ້ອຍ 270 ຄະແນນ ຂອງຈຳນວນທັງໝົດ 538 ຄະແນນ. ການໄດ້ຮັບໄຊຊະຂອງທ່ານໄບເດັນ ເຮັດໃຫ້ທ່ານທຣຳເປັນປະທານາທິບໍດີຄົນທີ 3 ໃນຮອບສີ່ທົດສະວັດ ທີ່ບໍ່ສາມາດໄດ້ຮັບເລືອກ ໃຫ້ເຂົ້າຮັບຕຳແໜ່ງຕື່ມອີກ ຫຼັງຈາກໄດ້ຂຶ້ນເປັນປະທານາທິບໍດີ 4 ປີແລ້ວ.

00:30 8.11.2020

ລາຍງານຂ່າວຫຼ້າສຸດ ໃນເຊົ້າວັນເສົາມື້ນີ້ແຈ້ງວ່າ ທ່ານໂຈ ໄບເດັນ ແລະທ່ານນາງຄາມາມາ ແຮຣິສ ຜູ້ສະໝັກເປັນປະທານາທິບໍດີ ຈາກພັກເດໂມແຄຣັດ ໄດ້ຮັບຄະແນນ 273 ຄະແນນສຽງຂອງຜູ້ຕາງໜ້າລັດແລ້ວ ເຊີນເບິ່ງແຜນທີ່ການເລືອກຕັ້ງໃນສະຫະລັດຂອງເຮົາຕື່ມ!

23:51 7.11.2020

ມາຮອດເຊົ້າວັນເສົາມື້ນີ້ ຕາມເວລາໃນພາກຕາເວັນອອກຂອງສະຫະລັດ ຄະແນນສຽງກໍຍັງບໍ່ມີການປ່ຽນແປງ ຈາກທີ່ພວກເຮົາໄດ້ລາຍງານໄປແລ້ວ ຄື ທ່ານໄບເດັນໄດ້ຮັບ 253 ຄະແນນ ແລະປະທານາທິບໍດີທຣຳ ໄດ້ຮັບ 214 ຄະແນນ. ທ່ານໄບເດັນຕອ້ງການອີກພຽງ 17 ຄະແນນ ຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາ ແມ່ນຕ້ອງການອີກ 56 ຄະແນນຈຶ່ງຈະຮອດ 270 ຄະແນນເພື່ອຈະເຂົ້າກຳຕຳແໜ່ງຕື່ມອີກ 4 ປີ. ເວລານີ້ຫຼາຍລັດຍັງສືບຕໍ່ນັບຄະແນນກັນຢູ່ ແລະລັດຈໍເຈຍ ໄດ້ປະກາດໃນວັນສຸກມື້ວານນີ້ວ່າ ຕົນຈະນັບຄະແນນ ຄືນໃໝ່ທັງໝົດ ຍ້ອນວ່າ ປະທານາທິບໍດີດໍໂນລ ທຣຳ ຜູ້ສະໝັກຂອງພັກຣີພັບບລີກັນ ແລະຜູ້ທ້າຊິງ ຫຼືຄູ່ແຂ່ງຈາກພັກເດໂມແຄຣັດ ທ່ານໂຈ ໄບເດັນ ມີຄະແນນໃກ້ຄຽງກັນຫຼາຍ.

18:52 7.11.2020

ໃນຕອນຄ່ຳຂອງວັນພະຫັດວານນີ້ ປະທານາທິບໍດີດໍໂນລ ທຣຳ ໄດ້ກ່າວອ້າງ ໂດຍບໍ່ມີຫຼັກຖານວ່າ ທ່ານໄດ້ຖືກສໍ້ໂກງ ໃຫ້ອອກຈາກຕໍາແໜ່ງ ໃນສະໄໝທີສອງ. ທ່ານກ່າວວ່າ “ຖ້າທ່ານນັບບັດຄະແນນສຽງທີ່ປ່ອນແບບຖືກຕ້ອງຕາມກົດໝາຍ, ຂ້າພະເຈົ້າຈະໄດ້ຊະນະຢ່າງງ່າຍໆ.” ທ່ານກ່າວຕໍ່ໄປອີກວ່າ "ຖ້າທ່ານນັບບັດຄະແນນສຽງທີ່ຜິດກົດໝາຍ, ພວກເຂົາສາມາດພະຍາຍາມລັກເອົາການເລືອກຕັ້ງໄປ ຈາກພວກເຮົາໄດ້." ທ່ານທຣໍາ ໄດ້ໃຊ້ເວລາ 16 ນາທີ ຢືນກ່າວຄໍາປາໄສ ຢູ່ຫ້ອງປະຊຸມຖະແຫລງຂ່າວ ໃນທຳນຽບຂາວ ໂດຍກ່າວວ່າ ຄະແນນນຳໜ້າຂອງທ່ານທີ່ມີຢູ່ໃນລັດຕ່າງໆກຳລັງຖືກ "ລັກເອົາອອກໄປຢ່າງລັບໆ ເທື່ອລະເລັກລະນ້ອຍ" ໃນຂະນະທີ່ມີການນັບຄະແນນສຽງຍັງສືບຕໍ່ດໍາເນີນໄປຢູ່ນັ້ນ. ມາຮອດວັນສຸກ ຄະແນນສຽງກໍຍັງບໍ່ມີການປ່ຽນແປງ ຈາກທີ່ພວກເຮົາໄດ້ລາຍໄປແລ້ວ ຄື ທ່ານໄບເດັນໄດ້ຮັບ 253 ຄະແນນ ແລະປະທານາທິບໍດີທຣຳ ໄດ້ຮັບ 214. ຂະນະນີ້ ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 56 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາແໜ່ງໄວ້ ໃນອີກ 4 ປີຕໍ່ໜ້າ.

19:29 6.11.2020

ໃນຕອນບ່າຍວັນພະຫັດມື້ນີ້ ຕາມເວລາໃນເຂດພາກຕາເວັນອອກຂອງສະຫະລັດ ທ່ານໂຈ ໄບເດັນ ໄດ້ປາກົດຕົວເປັນເວລາສັ້ນໆ ທີ່ນະຄອນວິລມິງຕັນ ໃນລັດເດລາແວ ໂດຍກ່າວວ່າ "ບັດທຸກໆບັດຈະຕ້ອງໄດ້ຖືກນັບ." ທ່ານກ່າວຕື່ມວ່າ "ມັນແມ່ນກ່ຽວກັບວ່າ ປະຊາຊົນໃນປະເທດນີ້ ໄດ້ສະແດງອອກເຖິງການຕັດສິນໃຈຂອງພວກເຂົາເຈົ້າແບບໃດ ແລະມັນເປັນຄວາມປະສົງຂອງຜູ້ມີສິດປ່ອນບັດ ບໍ່ມີໃຜ ແລະບໍ່ມີສິ່ງໃດທັງໝົດ ທີ່ໄດ້ເລືອກເອົາປະທານາທິບໍດີຂອງສະຫະລັດ."

06:13 6.11.2020

ໃນເວລາ 12 ໂມງເຄິ່ງຂອງວັນພະຫັດ, ທີ 5 ພະຈິກ (ຕາມເວລາວໍຊິງຕັນ) ທ່ານໂຈ ໄບເດັນ ຄູ່ແຂ່ງຈາກພັກເດໂມແຄຣັດ ຍັງມີຄະແນນເທົ່າເດີມ ຕາມທີ່ພວກເຮົາໄດ້ລາຍໄປແລ້ວ ຄື 253 ແຕ່ທ່ານປະທານາທິບໍດີ ດໍໂນລ ທຣຳ ໄດ້ຮັບຕື່ມອີກນຶ່ງຄະແນນ ເພີ້ມຂຶ້ນເປັນ 214. ຂະນະນີ້ ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 56 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນຊຶ່ງຄາດໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້. ລາຍງານຂ່າວແຈ້ງວ່າ ມາຮອດວັນພະຫັດມື້ນີ້ ທ່ານໄບເດັນແມ່ນນຳໜ້າ ໃນຄະແນນສຽງຂອງປະຊາຊົນ ຄືໄດ້ 71 ລ້ານ 6 ແສນຄົນ ປຽບທຽບໃສ່ທ່ານທຣຳ ທີ່ໄດ້ຮັບ​ແຕ່ 68​ ລ້ານ 1 ແສນຄົນ ອີງຕາມອົງການຄົ້ນຄວ້າເອດີສັນແລະອົງການຂ່າວເອພີ.

00:38 6.11.2020

ມາຮອດ 7:00 ຕອນເຊົ້າຂອງວັນພະຫັດ, ທີ 5 ພະຈິກ (ຕາມເວລາວໍຊິງຕັນ) ທັງທ່ານໂຈ ໄບເດັນ ແລະປະທານາທິບໍດີດໍໂນລ ທຣຳ ຍັງມີຄະແນນເທົ່າເດີມ ຕາມທີ່ພວກເຮົາໄດ້ລາຍໄປແລ້ວ ຄື 253 ຕໍ່ 213 ຄະແນນ. ຂະນະນີ້ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 57 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້ ແຕ່ພວກທ່ານກໍສາມາດຕິດຕາມເບິ່ງໜ້າເວັບໄຊຂອງພວກເຮົາ ກ່ຽວກັບຄະແນນຫລ້າສຸດ.

19:20 5.11.2020

ມາຮອດ 9:00 ຕອນຄໍ່າຂອງວັນພຸດ, ທີ 4 ພະຈິກ ທ່ານໂຈ ໄບເດັນໄດ້ຄະແນນຈາກຜູ້ແທນລັດຕື່ມອີກສອງລັດ ຄືມິຊິແກນ ແລະວິສຄັນຊິນ ຈຶ່ງເຮັດໃຫ້ທ່ານນໍາໜ້າ ທ່ານທຣໍາ ໂດຍມີ 253 ຕໍ່ 213 ຄະແນນ. ຂະນະນີ້ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 57 ຄະແນນຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້!

ທ. ໂຈ ໄບເດັນ ໄດ້ຮັບຄະແນນຈາກຜູ້ແທນລັດ 253 ຄະແນນ ແລະ ປ. ດໍໂນລ ທຣຳ ໄດ້ຮັບ 213 ຄະແນນ
ທ. ໂຈ ໄບເດັນ ໄດ້ຮັບຄະແນນຈາກຜູ້ແທນລັດ 253 ຄະແນນ ແລະ ປ. ດໍໂນລ ທຣຳ ໄດ້ຮັບ 213 ຄະແນນ

08:42 5.11.2020
ປະທານາທິບໍດີ ດໍໂນລ ທຣຳ ໄດ້ຊະນະໃນ 3 ລັດ ເທັກຊັສ ມອນຕານາ ແລະ ໄອໂອວາ
ປະທານາທິບໍດີ ດໍໂນລ ທຣຳ ໄດ້ຊະນະໃນ 3 ລັດ ເທັກຊັສ ມອນຕານາ ແລະ ໄອໂອວາ
ປະທານາທິບໍດີ ດໍໂນລ ທຣຳ ໄດ້ຊະນະ ລັດ ຟລໍຣິດາ
ປະທານາທິບໍດີ ດໍໂນລ ທຣຳ ໄດ້ຊະນະ ລັດ ຟລໍຣິດາ
ອະດີດຮອງປະທານາທິບໍດີ ໂຈ ໄບເດັນ ໄດ້ຊະນະ ລັດ ມິນເນໂຊຕາ
ອະດີດຮອງປະທານາທິບໍດີ ໂຈ ໄບເດັນ ໄດ້ຊະນະ ລັດ ມິນເນໂຊຕາ

ມາເຖິງປັດຈຸບັນນີ້ ຄະແນນຈາກຜູ້ແທນ ຂອງທ່ານດໍໂນລ ທຣຳ ແລະທ່ານໂຈ ໄບເດັນ ສູສີກັນ 213 ຕໍ່ 220 ໃນຂະນະນີ້ ຍັງເຫຼືອອີກຢູ່ 9 ລັດທີ່ຍັງບໍ່ທັນສຳເລັດການນັບຄະແນນສຽງເທື່ອ ປະກອບດ້ວຍລັດ ເມນ ເພັນຊີລເວເນຍ ຄາໂຣໄລນາເໜືອ ຈໍເຈຍ ມິຊິແກນ ວິສຄັນຊິນ ເນວາດາ ອາຣິໂຊນາ ແລະອາລາສກາ ຄາດກັນວ່າ ຜົນການນັບບັດເລືອກຕັ້ງ ທີ່ສົ່ງເຂົ້າໄປທາງໄປສະນີ ຈະເລີ້ມຂຶ້ນໃນຕອນເຊົ້າ ວັນທີ 4 ພະຈິກນີ້ ຢູ່ໃນສະຫະລັດ ແລະຈະໃຊ້ເວລາຫຼາຍສົມຄວນ ບໍ່ຮູ້ວ່າ ຈະແລ້ວເສັດໃນມື້ນີ້ຫຼືບໍ່!

16:01 4.11.2020

ລາຍງານກ່ຽວກັບການນັບຄະແນນສຽງໃນເບື້ອງຕົ້ນຈາກລັດຕ່າງໆທາງພາກຕາເວັນອອກ ທີ່ໄດ້ປິດໜ່ວຍເລືອກຕັ້ງ

ມື້ນີ້ ປະທານາທິບໍດີ ດໍໂນລ ທຣໍາທີ່ສັງກັດພັກຣີພັບບລິກັນ ແລະຄູ່ແຂ່ງຂອງ ທ່ານກໍຄື ອະດີດຮອງປະທານາທິບໍດີ ໂຈ ໄບເດັນໄດ້ຮັບໄຊຊະນະໃນຫລາຍລັດ ແລ້ວ ຂະນະທີ່ຜົນຂອງການເລືອກຕັ້ງກໍາລັງອອກມາເລື້ອຍໆຢູ່ ແລະຊາວອາເມຣິ ກັນຕັດສິນໃຈວ່າໃຜຈະບໍລິຫານປະເທດຈາກທໍານຽບຂາວໃນນຶ່ງສະໄໝກໍຄື 4 ປີຕໍ່ໜ້າ ຊຶ່ງເລີ້ມຈາກເດືອນມັງກອນຈະມາເຖິງນີ້.

ໜ່ວຍເລືອກຕັ້ງຂອງບັນດາລັດຢູ່ໃນເຂດແຄມຝັ່ງທະເລທາງຕາເວັນອອກ ແລະ ຫລາຍໆລັດໃນເຂດພາກໃຕ້ ແລະພາກຕາເວັນຕົກຕອນກາງ ຂອງປະເທດ ໄດ້ປິດລົງ ແລະກໍໄດ້ເລີ້ມນັບຄະແນນສຽງແລ້ວ. ສ່ວນບັນດາລັດໃນພາກຕາເວັນ ຕົກຂອງປະເທດກໍກໍາລັງປິດໜ່ວຍປ່ອນບັດລົງ ແລະກໍຈະເລີ້ມນັບບັດເລືອກຕັ້ງ ໃນໄວໆນີ້.

ໃນຊົ່ວໂມງທີ່ຈະມາເຖິງນີ້ ຄວນເອົາໃຈໃສ່ຕິດຕາມການນັບຄະແນນສຽງໃນລັດທີ່ຕັ້ງແຄມມະຫາສະໝຸດແອດແລນຕິກ ຄືລັດຟລໍຣິດາ ແລະ ຄາໂລໄຣນາເໜືອ- ເຊິ່ງທັງສອງລັດນີ້ໄດ້ຊ່ວຍໃຫ້ທ່ານທຣໍາ ໄດ້ຮັບໄຊຊະນະໃນປີ 2016 ແລະບ່ອນທີ່ການຢັ່ງຫາງສຽງທ້າຍປີນີ້ສະແດງໃຫ້ເຫັນວ່າທ່ານທຣໍາ ແລະທ່ານໄບເດັນມີ ຄະແນນສູສີກັນ. ລັດເພັນໂຊວາເນຍ ທີ່ເປັນລັດຍາດແຍ່ງກັນ ກໍ່ແມ່ນຈຸດສຸມຂອງຄວາມສົນໃຈອີກແຫ່ງນຶ່ງ ແຕ່ອາດຈະບໍ່ລາຍງານຜົນເລືອກຕັ້ງທີ່ສົມບູນເປັນເວລາຫຼາຍມື້. ນັກວິເຄາະກ່າວວ່າທັງສາມລັດແມ່ນມີຄວາມຈຳເປັນ ສຳລັບທ່ານທຣໍາ ຖ້າເພິ່ນຕ້ອງການດຳລົງຕຳແໜ່ງ ເປັນສະໄໝທີສອງແລະຫລີກລ້ຽງການເປັນປະທານາທິບໍດີສະຫະລັດ ຄົນທີສາມໃນສີ່ທົດສະວັດທີ່ຜ່ານມາທີ່ຈະເສຍໄຊຢູ່ໃນການເລືອກຕັ້ງຄືນ.

ສຳລັບທ່ານໄບເດັນແລ້ວ ການໄດ້ໄຊຊະນະໃນລັດໃດກໍ່ຕາມໃນ 3 ລັດນັ້ນແມ່ນຈະເພີ່ມໂອກາດໃຫ້ທ່ານໄດ້ຮັບຕຳແໜ່ງປະທານາທິບໍດີໃນການພະຍາຍາມຄັ້ງທີສາມຂອງທ່ານ. ທ່ານໄດ້ສູນເສຍການແຂ່ງຂັນເປັນຜູ້ຕາງໜ້າພັກເດໂມແຄຣັດ ເພື່ອເຂົ້າຮ່ວມການເລືອກຕັ້ງປະທານາທິບໍດີ ໃນປີ 1988 ແລະ 2008 ມາແລ້ວ.

ໃນການເລືອກເອົາຜູ້ນໍາປະເທດນັ້ນສະຫະລັດແມ່ນໃຊ້ລະບົບປະຊາທິປະໄຕແບບທາງອ້ອມ ຊຶ່ງບໍ່ໄດ້ເອົາຕາມຄະແນນນິຍົມຂອງປະຊາຊົນທັງຊາດ. ຜົນຂອງການເລືອກຕັ້ງແມ່ນຖືກຕັດສິນໂດຍການເລືອກຕັ້ງຢູ່ໃນແຕ່ລະລັດໃນທົ່ວປະເທດ ທີ່ມີ 50 ລັດ ແລະນະຄອນຫລວງວໍຊິງຕັນ. ເພື່ອຈະໃຫ້ໄດ້ໄຊຊະນະ ໃນການເລືອກຕັ້ງ, ຜູ້ສະໝັກປະທານາທິບໍດີຕ້ອງໄດ້ຮັບ 270 ຄະແນນສຽງ ຈາກຜູ້ແທນໃນລັດ ທີ່ມີສະມາຊິກທັງໝົດ 538 ຄົນ ກໍຄື 538 ສຽງນັ້ນ.

ການເລືອກຕັ້ງປະທານາທິບໍດີສະຫະລັດຈັດຂຶ້ນໃນທຸກໆ 4 ປີໃນວັນອັງຄານທໍາອິດຂອງເດືອນພະຈິກ ຊຶ່ງປີນີ້ກໍກົງກັບວັນທີ 3 ກໍຄືມື້ນີ້ເອງ. ຕາມປົກກະຕິແລ້ວປະຊາຊົນອາເມຣິກັນພາກັນໄປປ່ອນບັດດ້ວຍຕົວເອງຢູ່ສະຖານທີ່ບ່ອນບັດຕ່າງໆ. ແຕ່ວ່າໃນປີນີ້ຍ້ອນການລະບາດຂອງໄວຣຣັສໂຄໂຣນາຫລາຍໆ ລັດແມ່ນຈັດໃຫ້ມີການປ່ອນບັດກ່ອນການເລືອກຕັ້ງ ຊຶ່ງຜູ້ມີສິດປ່ອນບັດ ເລືອກຕັ້ງ ສາມາດສົ່ງບັດລົງຄະແນນສຽງຂອງຕົນໄປທາງໄປສະນີ ຫລືໄປປ່ອນບັດດ້ວຍ ຕົວເອງກ່ອນວັນເລືອກຕັ້ງຕາມສະຖານທີ່ທີ່ຈັດໄວ້ໃຫ້ໃນເມືອງ ແລະເຂດເລືອກ ຕັ້ງຕ່າງໆ ອີງຕາມກົດລະບຽບຂອງແຕ່ລະລັດ.

10:47 4.11.2020
ມີລາຍງານ ຕື່ມອີກ
XS
SM
MD
LG