ລັດຖະມົນຕີກະຊວງປ້ອງກັນປະເທດສະຫະລັດທ່ານ Leon Panetta ກ່າວວ່າ ທ່ານມີ
ຄວາມວິຕົກກັງວົນ ກ່ຽວກັບນາຍໝໍປາກິສຖານຄົນນຶ່ງ ທີ່ໄດ້ຊ່ອຍສະຫະລັດຊອກຫານາຍ
ໂອຊາມາ ບິນລາເດັນ ຜູ້ນຳກຸ່ມກໍ່ການຮ້າຍອາລກາຍດາ.
ທ່ານ Panetta ກ່າວຕໍ່ລາຍການ 60 ນາທີຂອງໂທລະພາບ CBS ວ່າ ນາຍໝໍ Shikal
Afridi ໄດ້ໃຫ້ຂໍ້ມູນສືບລັບສຳຄັນທີ່ເປັນປະໂຫຍດຫຼາຍ ໃນການບຸກເຂົ້າໄປສັງຫານນາຍບິນ
ລາເດັນທີ່ປະສົບຄວາມສຳເລັດ ໂດຍໜ່ວຍກ້າຕາຍ Navy Seal ໃນວັນທີ 2 ພຶດສະພາ
ປີກາຍຢູ່ເຮືອນຂອງລາວ ໃນເມືອງ Abbottabad ນັ້ນ. ລາຍການສຳພາດທ່ານ Panetta
ຈະອອກອາກາດໃນວັນອາທິດມື້ອື່ນນີ້.
ປາກິສຖານໄດ້ຈັບນາຍໝໍ Afridi ແລະກ່າວຫາທ່ານວ່າທໍລະຍົດຕໍ່ປະເທດຊາດ. ທ່ານໝໍ
Afridi ຊຶ່ງໄດ້ເຮັດວຽກໃຫ້ໜ່ວຍສືບລັບສະຫະລັດ ໄດ້ຈັດໂຄງການສັກຢາວັກຊີນຂຶ້ນເພື່ອ
ເກັບກຳຂໍ້ມູນ DNA ສຳລັບພິສູດກ່ຽວກັບການມີໜ້າຂອງນາຍບິນລາເດັນຢູ່ທີ່ເຮືອນແຫ່ງດັ່ງ
ກ່າວ.
ທ່ານ Panetta ກ່າວວ່າ ການຈັບກຸມບຸກຄົນ ທີ່ໃຫ້ຄວາມຊ່ອຍເຫຼືອ ໃນການສືບຫາຜູ້ກໍ່
ການຮ້າຍຂອງປາກິສຖານແມ່ນເປັນຄວາມພິດພາດທີ່ຮ້າຍແຮງ.
ລັດຖະມົນຕີກະຊວງປ້ອງກັນປະເທດສະຫະລັດກ່າວວ່າ ທ່ານເຊື່ອວ່າບາງຄົນທີ່ມີອຳນາດ
ໃນປາກິສຖານຮູ້ຈັກວ່ານາຍບິນລາເດັນຫຼົບລີ້ຢູ່ໃສ. ທ່ານ Panetta ເວົ້າວ່າ ມີລາຍງານ
ສືບລັບແຈ້ງວ່າ ເຮືອບິນເຮຣີຄອບເຕີ້ທະຫານຂອງປາກິສຖານ ໄດ້ບິນຜ່ານເຮືອນນາຍບິນ
ລາເດັນ ຊຶ່ງເປັນເຮືອນຫຼັງໃຫຍ່ທີ່ສຸດຢູ່ໃນບໍລິເວນດັ່ງກ່າວແລະອ້ອມດ້ວຍກຳແພງທີ່ສູງ 5
ແມັດເຄິ່ງ.
ທ່ານ Panetta ຮັບຮູ້ວ່າ ທ່ານບໍ່ມີຫຼັກຖານອັນໜັກແໜ້ນຢືນຢັນວ່າລັດຖະບານປາກິສຖານ
ຮູ້ຈັກ ນາຍບິນລາເດັນຢູ່ໃສ ແຕ່ໃນທັດສະນະສ່ວນໂຕຂອງທ່ານແລ້ວມີບາງຄົນ ຢູ່ບ່ອນໃດ
ບ່ອນນຶ່ງ ບາງທີອາດຮູ້ເລື່ອງດັ່ງກ່າວນີ້.
