ທ່ານພັນກິມູນ ເລຂາທິການໃຫຍ່ສະຫະປະຊາຊາດ ຮຽກຮ້ອງໃຫ້ໂລກຕອບສະໜອງຢ່າງຮີບດ່ວນຕໍ່ສະພາວະສຸກເສີນທີ່ເກີດຈາກໄພນໍ້າຖ້ວມໃນປາ
ກິສຖານນັ້ນ ໃນວັນອາທິດວານນີ້ ໃນລະຫວ່າງກອງປະຊຸມລະດັບລັດຖະມຸນຕີຂັ້ນສູງຂອງນາໆຊາດທີ່ປຶກສາຫາລືກັນເລື້ອງໄພຫາຍຍະນະດັ່ງກ່າວ ທີ່ນະຄອນນີວຢອກນັ້ນ.
ການພົບປະຂອງບັນດາເຈົ້າໜ້າທີ່ລະດັບສູງ ປະມານ 25 ທ່ານ ຮວມ ທັງທ່ານນາງ Hillary Clinton ລັດຖະມຸນຕີການຕ່າງປະເທດສະຫະລັດນໍາ ໄດ້ໄຂຂຶ້ນກ່ອນກອງປະຊຸມສຸດຍອດປະຈໍາປີຂອງສະຫະປະຊາຊາດວ່າດ້ວຍສະຖານະການໃນປາກິສຖານ ຊຶ່ງກໍານົດຈະມີຂຶ້ນໃນທ້າຍ ສັບປະດານີ້.
ແຕ່ໃນກອງປະຊຸມໃນມື້ວານນີ້ ໄດ້ມີພຽງບໍ່ເທົ່າໃດປະເທດ ທີ່ຮັບປາກທີ່ຈະໃຫ້ການບໍລິຈາກເງິນກ້ອນໃໝ່ ສົມທົບໃສ່ກອງທຶນຊ່ອຍເຫລືອດ້ານມະນຸດສະທໍາ ຈໍານວນ 2 ພັນລ້ານດອນລາ ທີ່ທາງສະຫະປະຊາຊາດໄດ້ຂໍຮ້ອງໄປໃນອາທິດຜ່ານມານັ້ນ.
ທ່ານພັນກິມູນກ່າວວ່າ ວັດຖຸປະສົງຂອງການພົບປະກັນໃນວັນອາທິດວານນີ້ແມ່ນເພື່ອສົ່ງສານອັນຈະແຈ້ງ ໄປຍັງປະຊາຊົນປາກິສຖານວ່າ ປະຊາຄົມ
ໂລກຈະກະທໍາທຸກສິ່ງທຸກຢ່າງທີ່ຕົນສາມາດເຮັດໄດ້ເພື່ອຊ່ອຍປາກິສຖານໃນທຸກໆບາດກ້າວ ນັບແຕ່ການບັນເທົາທຸກໄປຮອດການ ຟື້ນໂຕຄືນ ຈົນເຖິງການບູລະນະສ້າງສາປະເທດຄືນໃຫມ່ນັ້ນ.
ມີປະຊາຊົນຫລາຍກວ່າ 1700 ຄົນໄດ້ເສຍຊີວິດໄປແລ້ວຍ້ອນໄພນໍ້າຖ້ວມ ທີ່ໄດ້ສົ່ງຜົນກະທົບຕໍ່ປະຊາຊົນຕື່ມອີກເກືອບ 20 ລ້ານຄົນ. ໄພນໍ້າຖ້ວມດັ່ງກ່າວໄດ້ກວາດລ້າງໝູ່ບ້ານໄປຫລາຍແຫ່ງ ຕະຫລອດທັງທໍາລາຍໄຮ່ນາຮົ້ວສວນແລະສັດລ້ຽງ ທໍາລາຍຖະໜົນຫົນທາງ ຂົວສະພານແລະໂຄງລ່າງພື້ນຖານອື່ນໆອີກ.
ທ່ານນາງຄລິນຕັນ ກ່າວວ່າ ມາຮອດປັດຈຸບັນນີ້ ສະຫະລັດໄດ້ບໍລິຈາກເງິນຈໍານວນ 345 ລ້ານດອນລ້າ ເພື່ອຊ່ອຍບັນເທົາທຸກຈາກໄພຫາຍຍະນະດັ່ງກ່າວແກ່ປາກິສຖານ.
