ກອງທັບປາກິສຖານໄດ້ປະຕິເສດບໍ່ຍອມຮັບເອົາຜົນການສືບສວນຂອງສະຫະລັດກ່ຽວກັບ
ການໂຈມຕີໃນເດືອນແລ້ວຂອງກຳລັງປະສົມທີ່ເຮັດໃຫ້ທະຫານປາກິສຖານ 24 ຄົນເສຍ
ຊີວິດຢູ່ດ່ານຊາຍແດນຂອງປາກິສຖານຕິດກັບອັຟການິສຖານນັ້ນ.
ກອງທັບປາກິສຖານ ກ່າວໃນວັນສຸກມື້ນີ້ວ່າ ຜົນຂອງການສືບສວນທີ່ວ່ານີ້ແມ່ນຍັງຂາດ
ຄວາມຈິງ ແລະວ່າ ຕົນຈະໃຫ້ຄຳຕອບທີ່ລະອຽດເວລາໃດທີ່ຕົນໄດ້ຮັບລາຍງານຢ່າງເປັນ
ທາງການແລ້ວ.
ໃນວັນພະຫັດວານນີ້ ເຈົ້າໜ້າທີ່ກະຊວງປ້ອງກັນປະເທດສະຫະລັດໄດ້ຖິ້ມໂທດໃສ່ການປະ
ສານງານທີ່ບໍ່ພຽງພໍ ທັງຂອງກຳລັງຂອງປາກິສຖານແລະກຳລັງສະຫະລັດ ໃນການໂຈມຕີ
ທີ່ມີຂຶ້ນໃນເດືອນແລ້ວ.
ພົນຈັດຕະວາ Stephen Clark ນາຍທະຫານຈາກກອງທັບອາກາດສະຫະລັດ ທີ່ເປັນ
ຫົວໜ້າໃນການສືບສວນກ່າວວ່າ ການຂາດຄວາມໄວ້ເນື້ອເຊື່ອໃຈທີ່ຍັງປົກຄຸມລະຫວ່າງ
ປະເທດທັງສອງເປັນອຸບປະສັກຂັດຂວາງບໍ່ໃຫ້ອີກຝ່າຍນຶ່ງໄດ້ຮັບຂໍ້ມູນທີ່ສະເພາະເຈາະຈົງ
ກ່ຽວກັບກຳລັງທະຫານແລະສະຖານທີ່ໆມີການສູ້ລົບເກີດຂຶ້ນ.
ທ່ານ George Little ໂຄສົກຂອງທຳນຽບຫ້າແຈກ່າວວ່າ ການສືບສວນພົບວ່າກຳລັງ
ຂອງສະຫະລັດ ອີງຕາມຂໍ້ມູນທີ່ພວກເຂົາເຈົ້າມີໃນເວລານັ້ນໄດ້ທຳການປ້ອງກັນໂຕແລະ
ໃຊ້ກຳລັງທີ່ເໝາະສົມຕອບໂຕ້ຫຼັງຈາກພວກເຂົາເຈົ້າໄດ້ຖືກຍິງໂຈມຕີ.
ທ່ານເວົ້າວ່າ ນາຍທະຫານອະເມຣິກັນ ໄດ້ແຈ້ງຂໍ້ມູນແຜນທີ່ໆບໍ່ຖືກຕ້ອງໃຫ້ແກ່ຝ່າຍປາ
ກິສຖານຊາບ ຊຶ່ງພາໃຫ້ມີການເຂົ້າໃຈຜິດກ່ຽວກັບທີ່ຕັ້ງຂອງດ່ານກວດທະຫານປາກິສ
ຖານໃນບໍລິເວນຊາຍແດນ. ທ່ານເວົ້າວ່າ ດ້ວຍເຫດນັ້ນພ້ອມໆກັບຊ່ອງຫວ່າງອື່ນໆໃນ
ດ້ານຂໍ້ມູນກ່ຽວກັບການເຄື່ອນໄຫວ ແລະທີ່ຕັ້ງຂອງກຳລັງຕ່າງໆຂອງທັງສອງຝ່າຍ ມີ
ສ່ວນພາໃຫ້ເກີດເຫດການທີ່ໜ້າສະຫຼົດໃຈດັ່ງກ່າວ.
ແຕ່ການສືບສວນໃນຄັ້ງນີ້ພົບວ່າ ກຳລັງສະຫະລັດບໍ່ໄດ້ມີຄວາມຕັ້ງໃຈເລິຍທີ່ຈະໂຈມຕີ
ເປົ້າໝາຍທາງທະຫານຂອງປາກິສຖານ.
ກະຊວງປ້ອງກັນປະເທດສະຫະລັດໄດ້ສະແດງຄວາມເສຍໃຈເປັນທີ່ສຸດແລະຄວາມເສົ້າ
ສະຫຼົດໃຈຢ່າງແທ້ຈິງກ່ຽວກັບເຫດຮ້າຍທີ່ເກີດຂຶ້ນໃນຄັ້ງນີ້ແຕ່ກໍບໍ່ເຖິງຂັ້ນທີ່ຝ່າຍປາກິສ
ຖານຮຽກຮ້ອງຄືໃຫ້ຂໍຂະມາໂທດໂດຍເຕັມນັ້ນ.
ປາກິສຖານໄດ້ປະຕິເສດບໍ່ຍອມໃຫ້ການຮ່ວມມືໃນການສືບສວນກ່ຽວກັບເລື່ອງນີ້. ເຈົ້າ
ໜ້າທີ່ທຳນຽບຫ້າແຈກ່າວໃນວັນພະຫັດວານນີ້ວ່າ ໄດ້ມີການສົ່ງລາຍງານກ່ຽວກັບຜົນ
ຂອງການສືບສວນຂອງກອງທັບສະຫະລັດໄປໃຫ້ຜູ້ບັນຊາການກອງທັບບົກປາກິສຖານ
ນາຍພົນແອັສແຟັກ ກາຢານີແລ້ວ.
