ລັດຖະມົນຕີກະຊວງປ້ອງກັນປະເທດສະຫະລັດກ່າວວ່າ ບໍ່ມີຊ່ອງທາງໃດເລີຍທີ່ຈະທຳລາຍ
ກຸ່ມກໍ່ການຮ້າຍອາລກາຍດາໄດ້ ແຕ່ການສັງຫານນາຍ Osama bin-Laden ຜູ້ນຳຂອງ
ກຸ່ມ ໄດ້ເຮັດໃຫ້ກຸ່ມດັ່ງກ່າວເປັນອຳມະພາດ.
ທ່ານ Leon Panetta ກ່າວໃນຕອນແລງຂອງມື້ວັນສຸກວານນີ້ວ່າ ພວກເຮົາປະສົບຄວາມ
ສຳເລັດຫຼາຍເທົ່າໃດ ໃນການກຳຈັດ ພວກທີ່ເປັນຜູ້ນຳພາ ທາງດ້ານຈິດໃຈ ພວກຜູ້ນຳທາງ
ດ້ານອຸດົມການ ກໍຍິ່ງເຮັດໃຫ້ພວກເຮົາມີຄວາມສາມາດຫຼາຍຂຶ້ນ ໃນການທີ່ຈະເຮັດໃຫ້ການ
ຂົ່ມຂູ່ຂອງພວກເຂົາຕໍ່ປະເທດນີ້ ອ່ອນແອລົງ.
ທ່ານ Panetta ກ່າວຕື່ມວ່າ ທ່ານແນ່ໃຈວ່າສະຫະລັດມີຄວາມປອດໄພຕື່ມຂຶ້ນນັບແຕ່ການ
ເສຍຊີວິດຂອງນາຍ bin-Laden ທີ່ໄດ້ຖືກສັງຫານເມື່ອວັນທີ 2 ພຶດສະພາປີກາຍໃນການ
ປະຕິບັດງານລັບ ຂອງກຳລັງພິເສດ Navy SEAL ທີ່ເຮືອນຫຼັງນຶ່ງ ອ້ອມດ້ວຍກຳແພງໃນ
ເມືອງ Abottabad ຫົວເມືອງຄ້າຍທະຫານໃນປາກິສຖານ.
ທ່ານ Robert Cardillo ຈາກສຳນັກງານຜູ້ອຳນວຍການສືບລັບແຫ່ງຊາດ ກໍໄດ້ໃຫ້ຄວາມ
ເຫັນທີ່ຄ້າຍຄືກັນໃນມື້ວັນສຸກວານນີ້ ໂດຍເວົ້າວ່າ ຄວາມເປັນໄປໄດ້ໃນການໂຈມຕີໂດຍໃຊ້
ອາວຸດເຄມີ ອາວຸດເຊື້ອໂຣກ ອາວຸດປະລະມານູ ຫລື ອາວຸດທີ່ມີກຳມັນຕະພາບລັງສີອື່ນໆ
ໃນຮອບນຶ່ງປີຂ້າງໜ້ານີ້ແມ່ນຕໍ່າຫຼາຍ.
ເບິ່ງວີດີໂອ ການສັງຫານນາຍ bin-Laden ຍັງສືບຕໍ່ເປັນບັນຫາ ໃນຄວາມສຳ
ພັນ ສະຫະລັດ-ປາກິສຖານ
ແຕ່ແນວໃດກໍຕາມ ພວກເຈົ້າໜ້າທີ່ສືບລັບຂອງສະຫະລັດ ທີ່ຂໍສະຫງວນຊື່ກ່າວໃນວັນສຸກ
ວານນີ້ວ່າ ໃນຂະນະທີ່ແກນນຳ ຂອງຕາໜ່າງກໍ່ການຮ້າຍອາລກາຍດາ ອາດຈະບໍ່ສາມາດ
ທຳການໂຈມຕີ ທີ່ເຮັດໃຫ້ມີຜູ້ບາດເຈັບລົ້ມຕາຍ ໄດ້ຢ່າງຫຼວງຫຼາຍ ໃນລະດັບດຽວກັນກັບ
ການໂຈມຕີເມື່ອວັນທີ 11 ກັນຍາປີ 2001 ໄດ້ກໍຈິງແຕ່ພວກກໍ່ການຮ້າຍທີ່ເປັນເຄືອຂ່າຍ
ຂອງກຸ່ມດັ່ງກ່າວຍັງເປັນໄພຂົ່ມຂູ່ຢູ່.
ພວກເຈົ້າໜ້າທີ່ໄດ້ຊີ້ໃຫ້ເຫັນວ່າ ກຸ່ມກໍ່ການຮ້າຍອາລກາຍດາ ສາຂາເຢເມນແມ່ນເປັນອັນ
ຕະລາຍຫຼາຍກວ່າໝູ່ ໂດຍເວົ້າວ່າກຸ່ມດັ່ງກ່າວ ໄດ້ມີພື້ນທີ່ໃນການປະຕິບັດ ແລະສາມາດ
ເກັບເກນສະມັກພັກພວກໄດ້ຫຼາຍຂຶ້ນ ທັງໆທີ່ໄດ້ຕົກເປັນເປົ້າໃນການໂຈມຕີໂດຍກຳລັງຕໍ່
ຕ້ານພວກກໍ່ການຮ້າຍຂອງເຢເມນແລະສະຫະລັດ.
ພວກເຈົ້າໜ້າທີ່ ທີ່ຂໍສະຫງວນຊື່ເຫຼົ່ານີ້ ຍັງໄດ້ກ່າວອ້າງເຖິງໄພຂົ່ມຂູ່ ຈາກອັນທີ່ເອີ້ນວ່າ
ພວກກໍ່ການຮ້າຍ ທີ່ປະຕິບັດງານຕາມລໍາພັງ ທີ່ໄດ້ຮັບແຮງດົນໃຈ ຈາກກຸ່ມກໍ່ການຮ້າຍ
ອາລກາຍດາໄດ້ຕັ້ງໃຈທີ່ຈະກໍ່ຄວາມຮຸນແຮງຂຶ້ນນັ້ນ. ພວກເຈົ້າໜ້າທີ່ເວົ້າວ່າ ການໂຈມ
ຕີຕ່າງໆເຊັ່ນການຍິງສັງຫານແບບບໍ່ເລືອກໜ້າໃນເດືອນແລ້ວຢູ່ປະເທດຝຣັ່ງໂດຍມຸສລິມ
ຫົວຮຸນແຮງຄົນນຶ່ງນັ້ນ ແມ່ນຍາກທີ່ຈະຮັບມືໄດ້.