ໜັງສືພິມລະດັບຊັ້ນນໍາສະບັບນຶ່ງຂອງສະຫະລັດກ່າວວ່າ ວໍຊິງຕັນກໍາລັງງົດ ແລະໃນບາງກໍລະນີ ຮອດໄດ້ຍົກເລີກເງິນຊ່ວຍເຫລືອກອງທັບປາກີສຖານ ຈໍານວນຫລາຍຮ້ອຍລ້ານໂດລານັ້ນ.
ໜັງສືພິມ ນີວຢ໊ອກທາຍສ໌ ໄດ້ອ້າງພວກເຈົ້າໜ້າທີ່ອາວຸໂສທີ່ບໍ່ເປີດເຜີຍຊື່ ຂອງສະຫະລັດ 3 ຄົນ ທີ່ເວົ້າວ່າ ການເຄື່ອນໄຫວດັ່ງກ່າວນີ້ ແມ່ນມີເປົ້າ ໝາຍເພື່ອສັ່ງສອນປາກີສຖານ ທີ່ໄດ້ຂັບໄລ່ພວກນາຍທະຫານເຝິກແອບ ຂອງສະຫະລັດ ອອກຈາກປະເທດ ແລະກົດດັນໃຫ້ກອງທັບປາກີສຖານ ຕໍ່ສູ້ກັບພວກຫົວຮຸນແຮງ ຢ່າງມີປະສິດທິຜົນຫລາຍຂຶ້ນ.
ໜັງສືພິມສະບັບນີ້ ກ່າວວ່າ ການເຄື່ອນໄຫວດັ່ງກ່າວອາດສາມາດມີຜົນກະທົບຕໍ່ ເງິນແລະອຸບປະກອນຊ່ວຍເຫລືອຕ່າງໆສໍາລັບກອງທັບປາກີສຖານ ທີ່ມີມູນຄ່າປະມານ 800 ລ້ານໂດລາ ຫລືຫລາຍກ່ວາ ນຶ່ງສ່ວນສາມ ຂອງ ຈໍານວນສອງພັນກວ່າລ້ານໂດລາ ຂອງການຊ່ວຍເຫລືອດ້ານຄວາມໝັ້ນຄົງ ທີ່ສະຫະລັດມອບໃຫ້ປາກີສຖານ ໃນແຕ່ລະປີນັ້ນ.
ໜັງສືພິມ ນີວຢ໊ອກທາຍສ໌ ລາຍງານວ່າ ການງົດການຊ່ວຍເຫລືອດັ່ງກ່າວ ແມ່ນແລເຫັນໄດ້ຢ່າງແຈ້ງຂາວວ່າ ມີຈຸດປະສົງເພື່ອບັງຄັບໃຫ້ກອງທັບປາ ກີສຖານ ເລືອກເອົາໃນລະຫວ່າງໃຫ້ການສະໜັບສະໜຸນແກ່ປະເທດ ທີ່ໃຫ້ ເງິນແກ່ການປະຕິບັດການທາງທະຫານຂອງຕົນ ເປັນຈໍານວນຫລວງຫລາຍ ນັ້ນ ກັບການສືບຕໍ່ສະໜອງການສະໜັບສະໜຸນຢ່າງລັບໆ ໃຫ້ແກ່ກຸ່ມຕາລີ ບານ ຫລືພວກກຸ່ມຫົວຮຸນແຮງອື່ນໆ ທີ່ສູ້ລົບກັບທະຫານອາເມຣິກັນ ໃນອັຟ ການີສຖານນັ້ນ.
ອິງຕາມໜັງສືພິມ The New York Times ພວກເຈົ້າໜ້າທີ່ສະຫະລັດ ທີ່ບໍ່ຂໍເປີດເຜີຍຊື່ນັ້ນໄດ້ກ່າວວ່າ ການມອບສົ່ງອຸບປະກອນແລະການຊ່ວຍ ເຫລືອຕ່າງໆໄປໃຫ້ປາກີສຖານ ຄົງຈະມີຂຶ້ນຕໍ່ໄປໄດ້ ຖ້າຫາກວ່າຄວາມສໍາ ພັນລະຫວ່ງສະຫະລັດແລະປາກີສຖານດີຂຶ້ນ ແລະຖ້າຫາກວ່າປາກີສຖານ ມຸ່ງໝັ້ນທີ່ຈະຕໍ່ສູ້ກັບພວກກໍ່ການຮ້າຍ ຢ່າງຫ້າວຫັນແລະຕັ້ງໜ້າຫລາຍຂຶ້ນ ກວ່າເກົ່າ.
ຄວາມສໍາພັນລະຫວ່າງວໍຊິງຕັນ ແລະອີສລາມາບັດ ໄດ້ຈືດຈາງລົງໄປ ນັບຕັ້ງແຕ່ກໍາລັງພິເສດຂອງສະຫະລັດບຸກເຂົ້າໄປສັງຫານນາຍໂອຊາມາ ບິນລາເດັນ ຜູ້ນໍາກຸ່ມອາລຄາອີດາ ໃນປາກີສຖານ ໃນຕົ້ນເດືອນພຶດສະພາ ຜ່ານມາ ໂດຍທີ່ສະຫະລັດບໍ່ໄດ້ແຈ້ງໃຫ້ປາກິສຖານຊາບລ່ວງໜ້າເລີຍນັ້ນ.