ພວກປະຊາຄົມຕ່າງໆທີ່ຕັ້ງຢູ່ເລາະຕາມແຄມຝັ່ງທະເລຂອງ
ອ່າວເມັກຊິ ໂກໃນສະຫະລັດຄາດວ່າຈະພາກັນລະລຶກເຖິງ
ວັນຂີດໝາຍຄົບຮອບ 1 ປີຂອງການລະເບີດຂຶ້ນໃນຖານ
ເຈາະບໍ່ນໍ້າມັນທີ່ເປັນໄພຫາຍະນະໃນອ່າວເມັກຊິໂກໃນວັນ
ພຸດມື້ນີ້ໂດຍຈະພາໂຮມຊຸມນຸມກັນທີ່ເພ່ງເລັງໃສ່ການມີສະ
ຕິລະວັງໂຕດ້ານສິ່ງແວດລ້ອມ.
ການລະເບີດຂຶ້ນ ໃນຖານເຈາະບໍ່ນໍ້າມັນ Deepwater
Horizon ໃນວັນທີ 20 ເດືອນເມສາປີ 2010 ໄດ້ເຮັດ
ໃຫ້ປະຊາຊົນເສຍຊີວິດໄປ11 ຄົນແລະພາໃຫ້ນໍ້າມັນຮົ່ວ
ໄຫລຢູ່ນອກຝັ່ງທະເລຄັ້ງຮ້າຍແຮງທີ່ສຸດໃນປະວັດສາດສະຫະລັດ. ນໍ້າມັນໃນບໍ່ໃຕ້ພື້ນທະເລໄດ້ຮົ່ວໄຫລຂຶ້ນມາຢູ່ຕາມໜ້ານໍ້າເປັນເວລາ 85 ມື້ ກ່ອນຈະຖືກອຸດຕັນໄວ້ໄດ້ໃນເດືອນກໍລະ ກົດປີແລ້ວນີ້.
ປະຊາຊົນໃນຂົງເຂດດັ່ງກ່າວເວົ້າວ່າ ຂີ້ຊາຍແລະດິນໃນເຂດແຄມຝັ່ງທະເລຍັງມີເສດເຫລືອຂອງນໍ້າມັນປົນຢູ່ແລະມີກິ່ນຄືກັບກິ່ນນໍ້າມັນເຊື້ອໄຟ. ພວກນໍ້າມັນທີ່ເປັນກ້ອນກໍຍັງເຫັນຟູຢູ່ຕາມໜ້ານໍ້ານັ້ນຢູ່.
ບັນດານັກຊ່ຽວຊານ ກ່າວວ່າ ຄວາມເສຍຫາຍຂັ້ນຕົ້ນນັ້ນ ບໍ່ປາກົດວ່າຮ້າຍແຮງເທົ່າກັບພວກຜູ້ຄົນທີ່ພາກັນຢ້ານກົວໄວ້ກ່ອນນັ້ນ ແລະມັນຈະໃຊ້ເວລາຕື່ມອີກຫລາຍປີ ກ່ອນພວກຜູ້ຄົນຈະຮູ້ຈັກຜົນກະທົບໂດຍເຕັມຂອງນໍ້າມັນຮົ່ວໄຫລນີ້ຕໍ່ສະພາບແວດລ້ອມ.
ຄວາມເສຍຫາຍຕໍ່ວົງການອຸດສາຫະກໍາໃນຂົງເຂດແມ່ນເຫັນຢ່າງຈະແຈ້ງແລ້ວ. ໃນຂະນະທີ່ການທ່ອງທ່ຽວໃນຂົງເຂດໄດ້ເລີ້ມດີຂຶ້ນນັບແຕ່ປີແລ້ວນີ້ເປັນຕົ້ນມາ ແຕ່ພວກຊາວປະມົງກ່າວວ່າທຸລະກິດຂອງເຂົາເຈົ້າຍັງບໍ່ທັນຟື້ນໂຕຄືນເທື່ອ.
