ສະຖານະການດ້ານຄວາມປອດໄພ ຢູ່ໃນຂົງເຂດຊາແຮລ ຂອງອາຟຣິກາ ແມ່ນກຳລັງຊຸດໂຊມລົງຢ່າງວ່ອງໄວ ອີງຕາມການກ່າວເຕືອນ ຂອງບັນດາເຈົ້າໜ້າທີ່ສະຫະລັດ.
ການໂຈມຕີກໍ່ການຮ້າຍທັງຫຼາຍ ຕໍ່ພວກພົນລະເຮືອນແລະເປົ້າໝາຍທາງທະຫານຕ່າງໆ ທີ່ກຸ່ມຫົວຮຸນແຮງອິສລາມ ໄດ້ອ້າງເອົາຄວາມຮັບຜິດຊອບ ໄດ້ເພີ້ມສູງຂຶ້ນໂດຍສະເພາະຢ່າງຍິ່ງ ຢູ່ໃນປະເທດເບີກີນາຟາໂຊ ມາລີ ແລະໄນເຈີ ທັງສາມປະເທດນີ້ ແມ່ນຢູ່ໃນຂົງເຂດຊາແຮລ.
ຂົງເຂດຊາແຮລນີ້ ເປັນຂົງເຂດເຄິ່ງແຫ້ງແລ້ງ ທີ່ກວມລວມເອົາພື້ນທີ່ທາງພາກໃຕ້ຂອງທະເລຊາຍ ຊາຮາຣາ ຍາວຢຽດອອກໄປກວມເອົາ 10 ປະເທດຈາກ ພາກຕາເວັນຕົກຂອງ ເຊເນການ ໄປຮອດ ພາກຕາເວັນອອກຂອງເອຣິເທຣຍ.
ໃນປີ 2019 ພົນລະເຮືອນຫຼາຍກວ່າ 2,000 ຄົນ ໄດ້ຖືກຂ້າຕາຍ ໂດຍການສູ້ລົບ ແລະຄວາມຮຸນແຮງ ຢູ່ໃນພື້ນທີ່ດັ່ງກ່າວ.
ນັບຕັ້ງແຕ່ ປີ 2020 ທີ່ການຕໍ່ສູ້ໄດ້ເລີ້ມຕົ້ນຂຶ້ນ ຢູ່ໃນເບີກີນາຟາໂຊ ແຫ່ງດຽວເທົ່ານັ້ນ ມີ 4,000 ຄົນ ຕໍ່ມື້ ແມ່ນຖືກພັດພາກຈາກຖິ່ນຖານໂດຍຄວາມຮຸນແຮງ ອີງຕາມອົງການຂ້າຫຼວງໃຫຍ່ດ້ານອົບພະຍົບຂອງສະຫະປະຊາຊາດ ຫຼື UNHCR.
ທ່ານ ມາກ ກຣີນ ເຈົ້າໜ້າທີ່ບໍລິຫານຂອງອົງການພັດທະນາສາກົນຂອງສະຫະລັດ ຫຼື USAID ໄດ້ກ່າວໃນລະຫວ່າງ ການຮັບຟັງຄຳໃຫ້ການໃນສະພາສູງສະຫະລັດ ເມື່ອວັນອັງຄານ ວ່າ “ມັນຈະຄວາມຜິດພາດທີ່ຈະໃຫ້ເຫດຜົນວ່າ ຄວາມຮຸນແຮງທັງໝົດນີ້ ເປັນຍ້ອນລັດຖິຫົວຮຸນແຮງ ຫຼືບັນຫາຂັດແຍ້ງລະຫວ່າງສາສະໜາ.”
ທ່ານກຣີນກ່າວຕື່ມວ່າ “ແຕ່ມັນພຽງເປັນເລື້ອງທີ່ຜິດ ທີ່ບໍ່ຍອມຮັບຮູ້ວ່າ ສະພາບການແບບບໍ່ຕອບຮັບຂອງອຳນາດການປົກຄອງ ການຂາດໂອກາດທາງດ້ານເສດຖະກິດ ແລະການກຳນົດແຫລ່ງຊັບພະຍາກອນທຳມະຊາດຫຼາຍຂຶ້ນນັບມື້ ຖ້າປ່ອຍປະໄວ້ໂດຍບໍ່ແກ້ໄຂ ກໍຈະເຮັດໃຫ້ຂົງເຂດນີ້ ສາມາດມີຄວາມສຽງຫຼາຍເທົ່າຕໍ່ລັດຖິຫົວຮຸນແຮງ ອຸດົມການ ແລະ ວິທີການລະດົມກຳລັງ ຂອງພວກເຂົາເຈົ້າ.”
ທ່ານກຣີນ ໄດ້ກ່າວໄປອີກວ່າ ພວກກຸ່ມທີ່ອັນຕະລາຍ ລວມມີ ພວກແກັ້ງອາຊະຍາກຳ ພວກນັກຄ້າອາວຸດ ແລະ ພວກກຸ່ມຫົວຮຸນແຮງ ທີ່ຫາທາງທີ່ຈະຂະຫຍາຍອຳນາດຂອງພວກເຂົາເຈົ້າ ນຳເອົານິໄສຄວາມຮຸນແຮງຂອງພວກເຂົາເອງ ມາຍັງຂົງເຂດດັ່ງກ່າວ ທີ່ເຮັດໃຫ້ສະຖານະການ “ໃກ້ຈະລະເບີດຂຶ້ນຫຼາຍເທົ່າ.”
