ລັດຖະມົນຕີການຕ່າງປະເທດສະຫະລັດ ທ່ານໄມຄ໌ ພອມພຽວ ຈະພົບປະກັບເຈົ້າໜ້າທີ່
ອະວຸໂສຂອງເກົາຫຼີເໜືອ ໃນວັນພະຫັດມື້ຮື ໃນນະຄອນນິວຢອກ.
ກະຊວງການຕ່າງປະເທດໄດ້ອອກຖະແຫຼງການສະບັບນຶ່ງ ໃນວັນຈັນວານນີ້ທີ່ລະບຸວ່າ
ທ່ານພອມພຽວ ກັບທ່ານກິມ ຢົງ ໂຊລ໌ ທີ່ປຶກສາອະວຸໂສຂອງຜູ້ນຳເກົາຫຼີເໜືອ ກິມ ຈົງ
ອຶນ, ຈະປຶກສາຫາລືກັນ “ເພື່ອດຳເນີນຂັ້ນຕອນຂອງ 4 ພາກສ່ວນທີ່ສຳຄັນທັງໝົດ
ໃນຖະແຫຼງການຮ່ວມຂອງກອງປະຊຸມສຸດຍອດທີ່ປະເທດສິງກະໂປ, ທີ່ຮວມທັງ
ການບັນລຸເປົ້າໝາຍສຸດທ້າຍ, ການປົດອາວຸດນິວເຄລຍ” ຂອງເກົາຫຼີເໜືອທີ່ຈະພິສູດ
ໄດ້ຢ່າງຄົບຖ້ວນ.
ທ່ານກິມ ແລະປະທານາທິບໍດີສະຫະລັດ ທ່ານ ດໍໂນລ໌ ທຣຳ ໄດ້ລົງນາມໃນຂໍ້ຕົກລົງ
ທີ່ກອງປະຊຸມສຸດຍອດສຳຄັນ ໃນເດືອນມິຖຸນາຜ່ານມານີ້ ທີ່ຈະປົດອາວຸດນິວເຄລຍ
ໃນແຫຼມເກົາຫຼີ, ແຕ່ວ່າທັງສອງຝ່າຍ ໄດ້ຢູ່ໃນທ່າທີທີ່ບໍ່ລົງລອຍກັນ ກ່ຽວກັບບາດກ້າວ
ຂອງຄວາມພະຍາຍາມຂອງພຽງຢາງ ທີ່ຈະຍຸຕິໂຄງການອາວຸດນິວເຄລຍຂອງຕົນ.
ເກົາຫຼີເໜືອ ໄດ້ເຕືອນໃນສັບປະດາແລ້ວນີ້ວ່າ ຕົນຈະພິຈາລະນາວ່າຈະຟື້ນຄືນ
ໂຄງການອາວຸດນິວເຄລຍຂອງຕົນ ຖ້າຫາກວ່າສະຫະລັດບໍ່ຍົກເລີກການລົງໂທດ
ຕໍ່ການເສດຖະກິດທີ່ລ່ອຍຫຼໍຂອງລະບອບການປົກຄອງນີ້. ນອກນັ້ນ ເກົາຫຼີເໜືອ
ຍັງສະແຫວງຫາສົນທິສັນຍາສັນຕິພາບກັບສະຫະລັດ ແລະເກົາຫຼີໃຕ້ ທີ່ຈະຍຸຕິສົງຄາມ
ຢ່າງເປັນທາງການລະຫວ່າງ 1950-53 ທີ່ແບ່ງແຍກ ປະເທດຄອມມຸຍນິດເກົາຫຼີເໜືອ
ອອກຈາກປະເທດປະຊາທິປະໄຕເກົາຫຼີໃຕ້ນັ້ນ.
