ເຈົ້າໜ້າທີ່ອະວຸໂສທ່ານນຶ່ງຂອງສະຫະລັດຮັບຜິດຊອບກ່ຽວກັບເລື່ອງເກົາຫຼີເໜືອ ຈະເດີນ
ທາງໄປຢ້ຽມຢາມຣັດເຊຍໃນອາທິດໜ້ານີ້ ເພື່ອປຶກສາຫາລືຊອກຫາຊ່ອງທາງຮັບມືກັບ
ຜູ້ນຳຄົນໃໝ່ຂອງເກົາຫຼີເໜືອ.
ກະຊວງການຕ່າງປະເທດສະຫະລັດ ປະກາດໃນວັນມື້ສຸກວານນີ້ວ່າ ຜູ້ຕາງໜ້າພິເສດຮັບ
ຜິດຊອບກ່ຽວກັບນະໂຍບາຍເກົາຫຼີເໜືອທ່ານ Glyn Davies ຈະເດີນທາງໄປຣັດເຊຍໃນ
ມື້ວັນຈັນຈະມານີ້ເພື່ອເສີມຂະຫຍາຍການຮ່ວມມືແລະການມີວິໄສທັດຮ່ວມກັນກ່ຽວກັບ
ເກົາຫຼີເໜືອ.
ຖະແຫຼງການກ່າວວ່າທ່ານ Davies ມີແຜນການທີ່ຈະພົບປະກັບເຈົ້າໜ້າທີ່ອະວຸໂສຂອງ
ຣັດເຊຍຮວມທັງຮອງລັດຖະມົນຕີການຕ່າງປະເທດທ່ານ Igor Morgulov ເອກອັກຄະ
ລັດຖະທູດຮັບຜິດຊອບກ່ຽວກັບການເຈລະຈາ 6 ຝ່າຍທ່ານ Grigoriy Logvinov.
ການເຈລະຈາຫາລືເຫຼົ່ານີ້ແມ່ນມີຈຸດປະສົງ ແນໃສ່ໃຫ້ເກົາຫຼີເໜືອທັບມ້າງໂຄງການນິວ
ເຄລຍ ເພື່ອເປັນການແລກປ່ຽນ ກັບການຊ່ອຍເຫຼືອ ທີ່ຕົກຢູ່ໃນສະພາບບໍ່ໄປບໍ່ມານັບ
ແຕ່ປີ 2008 ເປັນຕົ້ນມາ. ນອກນັ້ນ ເຂົ້າຮ່ວມໃນການເຈລະຈາດັ່ງກ່າວ ຍັງມີເກົາຫຼີໃຕ້
ຈີນ ແລະຍີ່ປຸ່ນ.
ຕິດຕາມທ່ານ Davies ກໍມີທ່ານ Clifford Hart ທູດພິເສດ ໃນການເຈລະຈາ 6 ຝ່າຍ
ຂອງສະຫະລັດ ສຳລັບການເດີນທາງທີ່ຈະສິ້ນສຸດລົງໃນວັນທີ 2 ກຸມພາຈະມານີ້.
ນອກນັ້ນແລ້ວ ໃນອາທິດໜ້າ ທ່ານ Kurt Campbell ລັດຖະມົນຕີຊ່ອຍວ່າການກະຊວງ
ການຕ່າງປະເທດສະຫະລັດຮັບຜິດຊອບກ່ຽວກັບກິດຈະການເອເຊຍປາຊີຟິກ ກໍຈະເດີນ
ທາງໄປຢ້ຽມຢາມເກົາຫຼີໃຕ້ ຫວຽດນາມແລະກຳປູເຈຍ
ມື້ລາງຜູ້ນຳທີ່ປົກຄອງປະເທດເປັນເວລາດົນນານຂອງເກົາຫຼີເໜືອທ່ານກິມຈົງອິລໄດ້ເຖິງ
ແກ່ອະສັນຍະກຳໃນເດືອນທັນວາ ປ່ອຍໃຫ້ການປົກຄອງປະເທດຕົກຢູ່ໃນກຳມືລູກຊາຍ
ຫຼ້າຂອງທ່ານ ຄືທ່ານກິມຈົງອຸນ.