ການຕັດສິນໃຈຂອງເກົາຫຼີເໜືອທີ່ໂຈະການທົດລອງອາວຸດນີວເຄຼຍ ແລະລູກສອນໄຟ ໄລ
ຍະໄກຂອງຕົນນັ້ນ ແມ່ນກໍາລັງໄດ້ຮັບການຊົມເຊີຍ ຢ່າງລະມັດລະວັງໃນຂົງເຂດເອເຊຍ
ບ່ອນທີ່ປະຊາຊົນໃນເຂດດັ່ງກ່າວຈຳນວນຫຼວງຫລາຍ ຍັງຈື່ຈໍາປະວັດແຕ່ຄັ້ງກ່ອນ ທີ່ບໍ່ປະ
ຕິບັດຕາມຄໍາໝັ້ນສັນຍານັ້ນ.
ພວກເຈົ້າໜ້າທີ່ສະຫະລັດ ແລະເກົາຫຼີເໜືອ ໄດ້ປະກາດພ້ອມໆກັນເຖິງຄວາມກ້າວໜ້າເມື່ອ
ວັນພຸດວານນີ້ ໂດຍກ່າວວ່ານອກນີ້ແລ້ວ ພຽງຢາງຍັງຈະຍຸຕິກິດຈະກໍານີວເຄລຍອື່ນໆນັ້ນ
ນໍາ ໂຮມທັງການເສີມສະມັດຖະພາບທາດຢູເຣນຽມ ໃນຂະນະດຽວກັນສະຫະລັດກ່າວວ່າ
ຕົນຈະດຳເນີນ ຕາມແຜນການ ທີ່ຈະສະໜອງການຊ່ວຍເຫຼືອອາຫານຈາກສະຫະລັດໃນປະ
ລິມານ 240,000 ໂຕນ ໃຫ້ແກ່ເກົາຫຼີເໜືອ.
ທ່ານ Koichiro Gemba ລັດຖະມົນຕີຕ່າງປະເທດຍີ່ປຸ່ນ ກ່າວເມື່ອວັນພະຫັດມື້ນີ້ ທີ່ນະ
ຄອນຫຼວງໂຕກຽວວ່າ ຂໍ້ຕົກລົງກັນດັ່ງກ່າວນີ້ ຍັງຈະອໍານວຍໃຫ້ພວກເຈົ້າໜ້າທີ່ກວດກາ
ຈາກອົງການພະລັງງານປະລະມະນູສາກົນ ກັບຄືນໄປຍັງເກົາຫຼີເໜືອໄດ້.
ລັດຖະມົນຕີຕ່າງປະເທດຍີ່ປຸ່ນໄດ້ອະທິບາຍເຖິງການຍິນຍອມທີ່ຍື່ນສະເໜີໂດຍເກົາຫຼີເໜືອ
ນັ້ນວ່າມີຄວາມສໍາຄັນ ແຕ່ທ່ານກໍຮັບຮູ້ວ່າ ຍັງມີອີກຫຼາຍສິ່ງຫລາຍປະການ ທີ່ຈະຕ້ອງໄດ້
ປະຕິບັດ ກ່ອນທີ່ການເຈລະຈາຫົກຝ່າຍ ກ່ຽວກັບໂຄງການນີວເຄຼຍຂອງເກົາຫລີເໜືອ ທີ່
ໄດ້ຢຸດຊະງັກມາດົນນານແລ້ວນັ້ນ ຈະສາມາດເປີດຄືນໄດ້.
ນອກນີ້ແລ້ວໂຄສົກກະຊວງຕ່າງປະເທດຈີນ ຍັງໄດ້ສະແດງຄວາມຍິນດີຕໍ່ຂໍ້ຕົກລົງດັ່ງກ່າວນີ້
ໂດຍກ່າວວ່າ ປັກກິ່ງຈະສືບຕໍ່ຕຽມພ້ອມທີ່ຈະເອົາບົດ ບາດໃນທາງສ້າງສັນໃນການນໍາເອົາ
ສັນຕິພາບແລະສະຖຽນລະພາບມາສູ່ ຂົງເຂດນີ້.
ເມື່ອວັນພຸດວານນີ້ ພວກເຈົ້າໜ້າທີ່ສະຫະລັດ ກໍຮັບຮູ້ວ່າ ຂໍ້ຕົກລົງທີ່ວ່ານີ້ ເປັນພຽງບາດ
ກ້າວທໍາອິດໃນການດໍາເນີນຂັ້ນຕອນອັນຍາວນານນັ້ນ.
ຂໍ້ຕົກລົງນີ້ ມີຂຶ້ນຫຼັງຈາກການເຈລະຈາເມື່ອອາທິດຜ່ານມາທີ່ນະຄອນຫຼວງປັກກິ່ງ ລະຫວ່າງ
ພວກເຈົ້າໜ້າທີ່ສະຫະລັດ ແລະເກົາຫຼີເໜືອ ໃນໄລຍະພຽງສອງເດືອນ ລຸນຫຼັງການເຖິງແກ່
ອະສັນຍະກຳຂອງມື້ລາງຜູ້ສຳສູງສຸດ ຂອງເກົາຫຼີເໜືອ ທ່ານ ກິມ ຈົງອິລ.
ທ່ານນາງຮິລແລຣີ ຄລິນຕັນ ລັດຖະມົນຕີຕ່າງປະເທດສະຫະລັດກ່າວວ່າ ທີມງານສະຫະລັດ
ແລະເກົາຫຼີເໜືອ ຈະພົບປະກັນໃນອີກບໍ່ຊ້ານີ້ເພື່ອສະລຸບລາຍລະອຽດຂອງແຜນການຈັດສົ່ງ
ການຊ່ວຍເຫລືອອາຫານໄປຍັງເກົາ ຫຼີເໜືອ ຊຶ່ງທ່ານນາງກ່າວອີກວ່າ ການຈັດສົ່ງອາຫານ
ຄັ້ງນີ້ແມ່ນຈະມີການ ຕິດຕາມຄວບຄຸມຢ່າງເຂັ້ມງວດ ເພື່ອຮັບປະກັນວ່າການຊ່ວຍເຫຼືອນີ້ໄດ້
ຕົກໄປຮອດໄປເຖິງພວກທີ່ຕ້ອງການແທ້ໆ.