ນັກການທູດສະຫະລັດລະດັບສູງຄົນນຶ່ງກ່າວວ່າ ເວລານີ້ ວໍຊິງຕັນກໍາລັງດຳເນີນການ
ເພື່ອທັບມ້າງ ການສະກັດກັ້ນຂໍ້ມູນທີ່ອຳນວຍໃຫ້ເກົາຫຼີເໜືອ ສາມາດປົກປິດການລະເມີດ
ສິດທິມະນຸດຂອງຕົນແລະຄວບຄຸມປະຊາຊົນຂອງຕົນ ບໍ່ໃຫ້ຮູ້ເລຶ່ອງຄວາມເປັນໄປໃດໆ
ກ່ຽວກັບໂລກພາຍນອກ.
ທ່ານ Robert King ທູດພິເສດສະຫະລັດຮັບຜິດຊອບກ່ຽວກັບເລື່ອງສິດທິມະນຸດໃນເກົາຫຼີເໜືອ ກ່າວເມື່ອວັນພະຫັດມື້ນີ້ວ່າ ການທັບມ້າງສະພາບ ການໂດດດ່ຽວດ້ານສື່ມວນຊົນ ຢູ່ໃນປະເທດຄອມມີວນີສທີ່ມີການຄວບຄຸມ ຢ່າງເຄັ່ງຄັດນັ້ນ ຄືກະແຈອັນນຶ່ງເພື່ອຊຸກຍູ້ໃຫ້ມີການປ່ຽນແປງໃນທາງບວກຢູ່ທີ່ນັ້ນ.
ທ່ານຄິງ ໄດ້ບອກຕໍ່ກອງປະຊຸມທີ່ກຸງໂຊລ ເກົາຫຼີໃຕ້ວ່າ ສະຫະລັດຈະສືບຕໍ່ອອກຂ່າວແລະແຜ່ຜາຍຂໍ້ມູນອື່ນໆເຂົ້າໄປໃນເກົາຫຼີເໜືອ ຊຶ່ງໂດຍແທ້ຈິງແລ້ວເກົາຫຼີເໜືອບໍ່ມີອິນເທີແນັທ ແລະວາງຂໍ້ຈໍາກັດຮັດແຄບຢ່າງເຄັ່ງຄັດ ຕໍ່ການໃຊ້ໂທລະສັບມືຖື.
ທ່ານ ຄິງ ກ່າວອີກວ່າ ເກົາຫຼີເໜືອຍັງຄົງເປັນປະເທດຕົວຢ່າງຂອງການໂດດດ່ຽວຈັດທີ່ສຸດ ແລະວ່າ ການຄວບຄຸມຂໍ້ມູນຕ່າງໆຂອງພຽງຢາງນັ້ນ ກໍ ເປັນເຫດຜົນນຶ່ງ ທີ່ເຮັດໃຫ້ເກົາຫຼີເໜືອປະເຊີນກັບການກ່າວໂຈມຕີຈາກໂລກພາຍນອກໜ້ອຍລົງ.
ໂດຍຍົກເອົາລາຍງານຂອງກະຊວງຕ່າງປະເທດສະຫະລັດສະບັບນຶ່ງທີ່ອອກເມື່ອບໍ່ດົນມານີ້ ທ່ານຄິງເວົ້າວ່າ ເກົາຫຼີເໜືອໄດ້ຫ້າມ ບໍ່ໃຫ້ວິທະຍຸ
ແລະໂທລະພາບຕ່າງໆຮັບຟັງຫຼືເບິ່ງລາຍການຈາກສະຖານີທີ່ບໍ່ແມ່ນລັດເປັນຜູ້ຄວບຄຸມນັ້ນ. ນອກນີ້ແລ້ວ ເກົາຫຼີເໜືອຍັງພະຍາຍາມທີ່ຈະສະກັດກັ້ນການກະຈາຍສຽງຂ່າວໂຮມທັງການກະຈາຍສຽງໂດຍສະຫະລັດແລະເກົາຫຼີໃຕ້ນັ້ນນໍາ.