ລິ້ງ ສຳຫລັບເຂົ້າຫາ

logo-print

​ສະ​ຫະ​ລັດ ວ່າ ບໍ່​ມີ​ກຳ​ນົດ ຂອງວັນເລີ້ມ​ຕົ້ນ ເທື່ອ ສຳ​ລັບ ຂໍ້​ຕົກ​ລົງ​ຢຸດ​ຍິງ ຊົ່ວ​ຄາວ ໃນ​ອັ​ຟ​ກາ​ນິ​ສ​ຖານ


ລັດ​ຖະ​ມົນ​ຕີ​ກະ​ຊວງ​ປ້ອງ​ກັນ​ປະ​ເທດ​ສະ​ຫະ​ລັດ ທ່ານ​ມາກ ແອສ​ເປີ ກ່າວຖະ​ແຫລງ ໃນ​ວັນ​ທີ​ສອງ ​ຢູ່​ທີ່ກອງ​ປະ​ຊຸມ​ຄວາມ​ໝັ້ນ​ຄົງ​ມິວ​ນິກ, ​ປະ​ເທດ​ເຢຍ​ຣະ​ມັນ, ວັນ​ທີ 15 ກຸມ​ພາ 2020.

ລັດ​ຖະ​ມົນ​ຕີ​ກະ​ຊວງ​ປ້ອງ​ກັນ​ປະ​ເທດ​ສະ​ຫະ​ລັດ ທ່ານ​ມາກ ແອສ​ເປີ ໄດ້​ກ່າວ​ໃນ​ວັນ​ເສົາ​ວານນີ້ ວ່າ ການ​ປຶກ​ສາ​ຫາ​ລື​ກັນ ຍັງ​ຄົງ​ດຳ​ເນີນ​ຕໍ່​ໄປ ກ່ຽວ​ກັບ​ການ​ກຳ​ນົດ​ວັນ​ເລີ້ມ​ຕົ້ນ ສຳ​ລັບ​ໄລ​ຍະ​ການ​ທົດ​ລອງ ​ເປັນ​ເວ​ລາ 7 ວັນ ຂອງ​ການ​ຫລຸດ​ຜ່ອນ​ຄວາມ​ຮຸນ​ແຮງ ທີ່​ໄດ້​ເຈ​ລະ​ຈາ​ກັບ ​ກຸ່ມ​ຕາ​ລີ​ບານ​ໃນ​ອັ​ຟ​ກາ​ນິ​ສ​ຖານ.

“ອັນ​ນັ້ນ ເປັນ​ວັນ​ທີ່​ອາດ​ເລື່ອນ​ໄປ​ໄດ້ ເພາະ​ວ່າ ພວກ​ເຮົາ​ຍັງ​ທຳ​ການ​ປຶກ​ສາ​ຫາ​ລື​ກັນຢູ່ ຖ້າທ່ານ​ຄິດ​ເບິ່ງ…ສະ​ນັ້ນແລ້ວ ຂ້າ​ພະ​ເຈົ້າ ບໍ່​ສາ​ມາດ​ໃຫ້​ທ່ານ​ໄດ້​ ວັນ​ທີ່​ເຈາະ​ຈົງ ໃນ​ເວ​ລານີ້” ທ່ານ​ແອສເປີ ໄດ້​ກ່າວ​ຕໍ່​ບັນ​ດາ​ນັກ​ຂ່າວ ໃນ​ນະ​ຄອນຫຼວງ​ມິວ​ນິກ ຂອງ​ເຢຍ​ຣະ​ມັນ ຫຼັງ​ຈາກ​ທີ່​ເຂົ້າ​ຮ່ວມ​ໃນ​ກອບ​ປະ​ຊຸມ​ດ້ານ​ຄວາມ​ໝັ້ນ​ຄົງ​ຢູ່​ທີ່​ນັ້ນ.

ບັນ​ດາ​ເຈົ້າ​ໜ້າ​ທີ່​ສະ​ຫະ​ລັດ ໄດ້​ກ່າວ​ເຖິງ​ຜົນ​ສຳ​ເລັດ​ໃນ​ການ​ຈັດ​ຕັ້ງ​ປະ​ຕິ​ບັດ ການ​ຫລຸດ​ຜ່ອນ​ຄວາມ​ຮຸນ​ແຮງ​ຊົ່ວ​ຄາ​ວນັ້ນວ່າ ຈະ​ແຜ່ວ​ທາງ​ໄປ​ສູ່​ຂໍ້​ຕົກ​ລົງ​ສັນ​ຕິ​ພາບ​ຮອບ​ດ້ານ ກັບ​ກຸ່ມກະ​ບົດ​ດັ່ງ​ກ່າວ ທີ່​ອາດ​ຈະ​ຍຸ​ຕິ​ສົງ​ຄາມ​ຂອງ​ອາ​ເມ​ຣິ​ການ​ທີ່​ຍາວ​ນານ​ທີ່​ສຸດ ແລະ​ຈະ​ນຳ​ເອົາ​ທະ​ຫານ​ສະ​ຫະ​ລັດ ປະ​ມານ 13,000 ຄົນ ​ກັບ​ຄືນ​ປະ​ເທດ ຈ​າກ​ອັ​ຟ​ກາ​ນິ​ສ​ຖານ ກໍ​ເປັນ​ໄດ້.

ທ່ານ​ແອ​ສ​ເປີ ເວົ້າ​ວ່າ “ບ່ອນ​ທີ່​ພວກ​ເຮົາ​ຢູ່​ໃນ​ເວ​ລານີ້ ແມ່ນ​ຢູ່​ໜ້າ​ປະ​ຕູ​ຂອງ​ໄລ​ຍະ​ການ​ຫລຸດ​ຜ່ອນ​ຄວາມ​ຮຸນ​ແຮງ. ຖ້າ​ພວ​ກ​ເຮົາ ຕັດ​ສິນ​ໃຈທີ່​ຈະ​ກ້າວ​ໄປ​ໜ້າ ຖ້າ​ໝົດ​ທຸກ​ຝ່າຍ​ປະ​ຕິ​ບັດ​ຕາມ--ພັນ​ທະ​ຂອງ​ພວກ​ຕົນ ​ພາຍ​ໃຕ້​ການ​ຫລຸດ​ຜ່ອນ​ໃນ​ຄວາມ​ຮຸນ​ແຮງນັ້ນ--ຕໍ່​ຈາກນັ້ນ ພວກ​ເຮົາ​ຈະ​ເລີ້ມ​ກາ​ນ​ເຈ​ລະ​ຈາ​ກ່ຽວ​ກັບ​ພາກ​ສ່ວນ​ຕໍ່​ໄປ ຊຶ່ງ​ຈະ​ກ້າວ​ໜ້າ​ຕໍ່​ໄປ​ໄດ້ຫຼືບໍ່ ດ້ວຍ​ການ​ຕົກ​ລົງ​ສັນ​ຕິ​ພາບ​ແບບ​ຮ​ອບ​ດ້ານ.”

ຕາມ​ພາກ​ສ່​ວນ​ນຶ່ງ​ຂອງ​ຂໍ້​ຕົກ​ລົງໄລ​ຍະ​ສັ້ນດັ່ງ​ກ່າວ ທ່ານ​ແອ​ສ​ເປີ ກ່າວ​ຕື່ມໄປວ່າ ​ສະ​ຫະ​ລັດ ຈະ​ຍົກ​ເລີກ “​ການ​ປະ​ຕິ​ການ​ຂອງ​ພວກ​ເຮົາ​ ໂດຍ​ສ່ວນ​ໃຫຍ່” ຫາກ​ແຕ່​ຫົວ​ໜ້າ​ທຳ​ນຽບ​ຫ້າ​ແຈ ​ໄດ້​ປະ​ຕິ​ເສດ​ທີ່​ຈະສົນ​ທະ​ນາ​ໃນ​ລາຍ​ລະ​ອຽດ​ໃດໆ​ຕື່ມ​ອີກ.

ບັນ​ດາ​ເຈົາ​ໜ້າ​ທີ່​ສະ​ຫະ​ລັດ ກ່າວ​ວ່າ ຂໍ້​ຕົກ​ລົງ​ດັ່ງ​ກ່າວ ຜູກ​ໝັດ​ກຸ່ມ​ຕາ​ລີ​ບານ ເພື່ອ​ໃຫ້​ຍຸ​ຕິ​ການ​ໂຈມ​ຕີ​ທີ່ສຳ​ຄັນ ທີ່​ຮວມ​ທັງ​ການ​ວາງ​ລະ​ເບີດ​ຕາມ​ແຄມ​ທາງ ແລະ​ການ​ລະ​ເບີດ​ສະ​ຫລະ​ຊີບ ​ຕໍ່​ກອງ​ກຳ​ລັງອັ​ຟ​ກາ​ນິ​ສ​ຖານ ແລະ​ກອງ​ກຳ​ລັງ​ນາ​ໆ​ຊາດ ທີ່​ນຳ​ພາ​ໂດຍ​ສະ​ຫະ​ລັດ ຢູ່​ແຫ່ງ​ຫົນ​ໃດ​ກໍ​ຕາມ​ໃນ​ປະ​ເທດ​ອັ​ຟກ​າ​ນິ​ສ​ຖານ.

ກ່ອນ​ໜ້ານີ້ ທ່ານ​ແອ​ສ​ເປີ ໄດ້​ກ່າວ​ຕໍ່​ບັນ​ດາ​ຜູ້​ຊົມ ຢູ່​ທີ່ກອງ​ປະ​ຊຸມ​ດ້ານ​ຄວາມ​ໝັ້ນ​ຄົງ​ໃນ​ມິວ​ນິກ ກ່ຽວ​ກັບ​ການ​ຫລຸດ​ຜ່ອນ​ໃນ​ຄວາມ​ຮຸນ​ແຮງວ່າ ກໍ​ບໍ່​ແມ່ນ​ວ່າ ຈະ​ປາ​ສະ​ຈາກ​ຄວາມ​ສ່ຽງ ແຕ່​ມັນ “ເບິ່ງ​ຄື​ວ່າ ມີ​ຄວາມ​ຫວັງຫຼາຍ” ແລະ “ພວກ​ເຮົາ​ຕ້ອງ​ໃຫ້​ໂອ​ກາດແກ່​ສັນ​ຕິ​ພາບ.”

ອ່ານ​ຂ່າວນີ້​ຕື່ມ ເປັນ​ພາ​ສາ​ອັງ​ກິດ

ທ່ານອາດຈະມັກເລື້ອງນີ້ຄືກັນ

XS
SM
MD
LG