ພົນເຮືອເອກ Mike Mullen ນາຍທະຫານລະດັບສູງສຸດຂອງສະຫະລັດ ໄດ້ໄປຢຸດແວ່ອີສຣາແອລໂດຍ ທີ່ບໍ່ໄດ້ປະກາດໃຫ້ຮູ້ລ່ວງໜ້າ ເພື່ອທຳການພົບ ປະແບບເປັນການສ່ວນຕົວກັບເຈົ້າໜ້າທີ່ທະຫານຂອງອີສຣາແອລ.
ນາຍພົນ ມູລເລິນ ກ່າວເມື່ອວັນອາທິດວານນີ້ທີ່ກຸງ Tel Aviv ຫລັງ ຈາກເຈລະຈາກັບນາຍພົນໂທ Gabi Ashkenazi ຫົວໜ້າເສນາທິການທະຫານ ຂອງອີສຣາແອລ ວ່າ ທ່ານພະຍາຍາມມອງເບິ່ງໄພຂົ່ມຂູ່ ແລະ ສິ່ງທ້າທາຍຕ່າງໆໃນຂົງເຂດນັ້ນ ຈາກແງ່ຂອງຝ່າຍອີສຣາແອລ. ນາຍພົນມູລເລິນ ກ່າວອີກວ່າເຖິງແມ່ນວ່າບັນຫາດ້ານຄວາມປອດໄພຕ່າງໆ ທີ່ພວກຜູ້ນຳທະຫານໄດ້ປຶກສາຫາລືກັນນັ້ນ ຖືວ່າເປັນຜົນປະໂຫຍດ ຕໍ່ອີສຣາແອລ ແຕ່ກໍມີຄວາມສຳຄັນຕໍ່ສະຫະລັດນຳເຊັ່ນກັນ.
ນາຍພົນ Ashkenazi ໄດ້ກ່າວຍ້ອງຍໍຊົມເຊີຍນາຍພົນມູລເລິນ ທີ່ໄດ້ ເດີນທາງມາຢ້ຽມຢາມອີສຣາແອລ ຫລາຍໆຄັ້ງແລ້ວ ແລະທີ່ໄດ້ຊຸກຍູ້ສົ່ງເສີມການຮ່ວມມືທາງທະຫານລະຫວ່າງປະເທດທັງສອງ. ນອກນັ້ນ ໃນວັນອາທິດວານນີ້ ພົນເຮືອເອກ ມູລເລິນ ປະທານເສນາທິການຮ່ວມຂອງ ສະຫະລັດຍັງໄດ້ ພົບປະ ກັບລັດຖະມົນຕີປ້ອງກັນປະເທດຂອງອີສຣາແອລ ທ່ານ Ehud Barak ນຳອີກ.
ທ່ານມູລເລິນ ໄດ້ຢຸດແວ່ອີສຣາແອລໃນລະຫວ່າງການເດີນທາງກັບສະຫະລັດ ຈາກການໄປຢ້ຽມຢາມ ອັຟການີສຖານແລະປາກີສຖານ. ຄັ້ງນີ້ເປັນຄັ້ງທີ່ສີ່ທີ່ທ່ານໄດ້ໄປຢ້ຽມຢາມອີສຣາແອລ.
