ການເອົາບາດກ້າວຂອງລັດຖະບານກາງສະຫະລັດກ່ຽວກັບການກ່າວຫາໃນການລັດ ຂະໂມຍ ຈາກກອງທຶນ ການລົງທຶນຂອງມາເລເຊຍ ຊຶ່ງເກືອບວ່າແນ່ນອນ ຈະພາໃຫ້ມີການຮຽກຮ້ອງແບບປະຈຸບັນທັນດ່ວນ ໂດຍພັກການເມືອງຝ່າຍຄ້ານ ໃຫ້ນາຍົກລັດຖະມົນຕີ ທ່ານ Nijib Razak ລາອອກ. ໃນຂະນະທີ່ການດຳເນີນຄະດີທາງກົດໝາຍ ຈະເສີມຄວາມເຂັ້ມແຂງຕື່ມ ຂຶ້ນໃຫ້ແກ່ກຸ່ມຝ່າຍຄ້ານທີ່ຍັງອ່ອນແອຢູ່ ໃນ Kuala Lumpur ແຕ່ນັ້ນກໍບໍ່ຄາດວ່າຈະສາມາດບີບບັງຄັບໃຫ້ຜູ້ນຳລາອອກ ຢ່າງໄວວາໄດ້.
ພັກ UNMO ທີ່ປົກຄອງປະເທດ ຢູ່ໃນຂະນະນີ້ ຈະໜຸນຫຼັງ ທ່ານ Najib ແລະຖິ້ມໂທດໃສ່ “ມະຫາອຳນາດຕ່າງປະເທດ ທີ່ຮວມທັງຊາວຢິວ” ທີ່ພະຍາຍາມຈະໂຄ່ນລົ້ມລັດຖະບານ ທີ່ມີການເລືອກຕັ້ງແບບປະຊາທິປະໄຕ ນັ້ນຄືຄຳທຳນາຍຂອງນັກການເມືອງຝ່າຍຄ້ານ ທ່ານ Charles Santiago ໃນວັນພຸດວານນີ້.
“ພັກຝ່າຍຄ້ານ ແລະກຸ່ມອົງການທີ່ບໍ່ຂຶ້ນກັບລັດຖະບານທັງຫຼາຍ ຈະຮຽກຮ້ອງໃຫ້ອະທິໄອຍະການ ທຳການສືບສວນສອບສວນ ການກ່າວຫາໃນສະຫະລັດ,” ທ່ານ Santiago ຊຶ່ງເປັນສະມາຊິກລັດຖະສະພາຈາກພັກກິດສັງຄົມປະຊາທິປະໄຕ ໄດ້ກ່າວກັບ VOA ອີກຕື່ມວ່າ “ນີ້ຈະບໍ່ໄປໄດ້ໄກ ໃນຂະນະທີ່ຫ້ອງການອະທິໄອຍະການ ໄດ້ປິດຄະດີນີ້ ຫຼາຍໆເດືອນຜ່ານມາແລ້ວນັ້ນ.”
ໃນການລິເລີ້ມທີ່ໃຫຍ່ສຸດຂອງຄະດີແບບນີ້ ໂດຍກະຊວງຍຸຕິທຳຂອງສະຫະລັດ ທີ່ເອີ້ນວ່າ Kleptocracy Asset Recovery Initiative ຫຼື ການກູ້ຄືນຊັບສິນໃນການສໍ້ລາດບັງຫຼວງນັ້ນ ເຈົ້າໜ້າທີ່ຕ້ອງການທີ່ຈະຍຶດເອົາຊັບສິນ ອະສັງຫາ ສິນລະປະ ອັນຍະມະນີ ຕະຫຼອດຈົນລິຂະສິດຂອງຮູບເງົາຂອງ Hollywood ທີ່ມີມູນຄ່າຫຼາຍກວ່າ 1 ພັນລ້ານໂດລາ ທີ່ເຈົ້າ ໜ້າກ່າວຫາວ່າ ໄດ້ຖືກລັກຂະໂມຍໄປຈາກກອງທຶນພັດທະນາ 1ມາເລເຊຍ Berhad ຫຼື 1MBD ຊຶ່ງທ່ານ Najib ເປັນຜູ້ສ້າງຕັ້ງຂຶ້ນມາ ໃນປີ 2009 ແລະປະຈຸບັນນີ້ ທາງກະຊວງການເງິນເປັນເຈົ້າຂອງ ທີ່ນາຍົກລັດຖະມົນຕີເປັນຜູ້ຄວບຄຸມ.
