ບັນຫາການເກັບພາສີ ທີ່ຕອບໂຕ້ກັນໄປມາ ອີກຊຸດນຶ່ງ ລະຫວ່າງສະຫະລັດ ກັບຈີນ
ຕໍ່ສິນຄ້າຂອງກັນ ແລະກັນ ເລີ້ມມີຜົນບັງຄັບໃຊ້ ໃນວັນຈັນມື້ນີ້.
ການວາງອັດຕາພາສີຮອບໃໝ່ຂອງສະຫະລັດ ຕໍ່ສິນຄ້າຈີນ ທີ່ມີມູນຄ່າ 200 ຕື້ໂດລາ
ແລະການເກັບພາສີເພື່ອເປັນການຕອບໂຕ້ຄືນ ຊຸດນຶ່ງຂອງຈີນຕໍ່ສິນຄ້າຂອງສະຫະລັດ
ໃນມູນຄ່າ 60 ຕື້ໂດລານັ້ນ ເລີ້ມມີຜົນບັງຄັບໃຊ້ໃນເວລາ 12:01 ກາງຄືນ ຕາມເວລາ
ໃນວໍຊິງຕັນ ຫລື 04:01 ໂມງເຊົ້າຕາມເວລາສາກົນ.
ອັດຕາພາສີໃໝ່ຂອງສະຫະລັດ ແມ່ນກວາມເອົາສິນຄ້າຂອງຈີນ ຫລາຍພັນຊະໜິດ ຊຶ່ງ
ລວມມີເຄື່ອງເອເລັກໂທຣນິກ, ອາຫານ, ເຄື່ອງມືແລະເຄື່ອງໃຊ້ໃນເຮືອນ. ການເກັບພາ
ສີຊຸດໃໝ່ນີ້ ເລີ້ມຕົ້ນແຕ່ອັດຕາ 10 ເປີເຊັນ ຈາກນັ້ນ ກໍຈະເພີ້ມຂຶ້ນ ເຖິງ 25 ເປີເຊັນໃນ
ວັນທີ 1 ມັງກອນ, 2019. ຄະນະລັດຖະບານ ຂອງທ່ານທຣຳໄດ້ຍົກເວັ້ນພາສີໃຫ້ແກ່
ສິນຄ້າປະເພດອື່ນຫລາຍຢ່າງ ຢູ່ໃນການເກັບພາສີຊຸດໃໝ່ນີ້ ລວມມີ ໂມງສະຫລາດ,
ເຄື່ອງອຸປະກອນບລູທູດ (Bluetooth) ແລະຕັ່ງນັ່ງສຳລັບເດັກນ້ອຍນັ່ງຢູ່ໃນລົດ.
ຢູ່ໃນການໃຫ້ສຳພາດໂດຍໂທລະພາບ ຟັອກສ໌ ນີວສ໌ (Fox News) ໃນວັນ ອາທິດ
ວານນີ້ ທ່ານ ໄມຄ໌ ພອມພຽວ, ລັດຖະມົນຕີກະຊວງການຕ່າງປະເທດສະຫະລັດ ໃຫ້
ຄຳໝັ້ນສັນຍາວ່າ ສະຫະລັດ ຈະຊະນະໃນການເຮັດສົງຄາມທາງການຄ້າທຸກອັນກັບ
ຈີນ. ທ່ານເວົ້າວ່າ "ພວກເຮົາຈະໄດ້ຮັບຜົນຈາກການເກັບພາສີນີ້ ໂດຍທີ່ມັນຈະບັງຄັບ
ໃຫ້ຈີນ ປະພຶດໃນລັກສະນະທີ່ວ່າ ຖ້າເຈົ້າຫາກຢາກເປັນມະຫາອຳນາດ, ມະຫາອຳນາດ
ຂອງໂລກ ປະເທດນຶ່ງ ເຈົ້າກໍຈະບໍ່ລັກຂະໂມຍຊັບສິນທາງດ້ານສະຕິປັນຍາຂອງປະ
ເທດອື່ນ."
ແຕ່ວ່າ ຢູ່ໃນຖະແຫລງການດ້ານນະໂຍບາຍທີ່ເຜີຍແຜ່ອອກມາ ບໍ່ພໍເທົ່າໃດຊົ່ວໂມງ
ພາຍຫລັງທີ່ ການເກັບພາສີຂອງທັງສອງຝ່າຍ ເລີ້ມມີຜົນບັງຄັບໃຊ້ ນັ້ນ ຈີນໄດ້ກ່າວຫາ
ວໍຊິງຕັນວ່າ ໃຊ້ການເກັບພາສີເປັນເຄື່ອງມື ນາບຂູ່ປະເທດອື່ນ ໃຫ້ຍອມເຮັດຕາມໃຈ
ຂອງສະຫະລັດ ໃນເລື້ອງເສດຖະກິດ.
