ກຳລັງທະຫານສະຫະລັດ ໃນອັຟການິສຖານ ໄດ້ເລີ່ມຖິ້ມລະເບີດຄັ້ງໃໝ່ ໃສ່ກຸ່ມຕາລີ
ບານໃນພາກເໜືອຂອງອັຟການິສຖານ.
ກອງທັບສະຫະລັດ ໄດ້ອອກຖະແຫຼງການສະບັບນຶ່ງ ໃນວັນອັງຄານມື້ນີ້ ໂດຍກ່າວວ່າ
ຕົນໄດ້ເລີ້ມການໂຈມຕີຖິ້ມລະເບີດ ທີ່ມີຄວາມແມ່ນຢຳຢ່າງຕໍ່ເນື່ອງ ໃນວັນສຸກທີ່ຜ່ານ
ມານີ້ ໃສ່ບ່ອນທີ່ສົງໄສວ່າເປັນຄ້າຍຝຶກແບບຂອງກຸ່ມຕາລີບານ ໃນແຂວງບາດັກຊານ
ໂດຍແນເປົ້າໝາຍໃສ່ “ເພື່ອປ້ອງກັນບໍ່ໃຫ້ມີການວາງແຜນ ແລະການຝຶກຊ້ອມຂອງ
ພວກກໍ່ການຮ້າຍ ທີ່ຕັ້ງໃກ້ໆກັບຊາຍແດນຈີນ ແລະຕາຈິກກິສຖານ.” ການໂຈມຕີ
ທາງອາກາດຍັງໄດ້ທຳລາຍຍວດຍານພາຫະນະ ທີ່ຖືກລັກຂະໂມຍໄປ ຈາກກອງທັບ
ແຫ່ງຊາດອັຟການິສຖານ ທີ່ໄດ້ຖືກດັດແປງເປັນລົດລຳລຽງລະເບີດທີ່ເຮັດຂຶ້ນເອງນັ້ນ.
ຖະແຫຼງການ ທີ່ອ້າງຄຳເວົ້າ ຂອງທ່ານນາຍພົນຈອນ ນິໂກຊັນ ຜູ້ບັນຊາການກຳລັງ
ສະຫະລັດ ໃນອັຟການິສຖານກ່າວວ່າ “ກຸ່ມຕາລີບານ ບໍ່ມີບ່ອນທີ່ຈະຫລົບລີ້. ມັນ
ຈະບໍ່ມີບ່ອນຫຼົບລີ້ໃຫ້ກຸ່ມກໍ່ການຮ້າຍໃດໆ ທີ່ພະຍາຍາມຈະສ້າງຄວາມເສຍຫາຍ ແລະທຳລາຍປະເທດນີ້.”
ການໂຈມຕີທາງອາກາດຂອງສະຫະລັດ ຍັງໄດ້ສ້າງຄວາມເສຍຫາຍໃຫ້ແກ່ແຫຼ່ງຫາ
ລາຍໄດ້ ແລະບ່ອນຫລົບລີ້ຂອງກຸ່ມຕາລີບານ ຊຶ່ງຍັງຜົນໃຫ້ມີການເສຍລາຍໄດ້ຫຼາຍ
ກວ່າ 30 ລ້ານໂດລາ ສຳລັບກຸ່ມຕາລີບານ ນັບຕັ້ງແຕ່ ໄດ້ມີການຖິ້ມລະເບີດໂຈມຕີ
ດັ່ງກ່າວ ທີ່ໄດ້ເລີ່ມຂຶ້ນໃນເດືອນພະຈິກປີກາຍນີ້.
