ກອງບັນຊາການກຳລັງສະຫະລັດໃນເຂດພາກໃຕ້ ຫຼື SOUTHCOM ມີແຜນການທີ່ຈະເພີ້ມການມີໜ້າຂອງກຳລັງສະຫະລັດ ຢູ່ໃນເຂດຊີກໂລກຕາເວັນຕົກໃນຂະນະທີ່ຕັດການຊ່ວຍເຫຼືອຕໍ່ໂຄງການພາຄີຄວາມໝັ້ນຄົງ ທີ່ຊ່ວຍປະເທດໃນລາຕິດອາເມຣິກາທີ່ເປັນພາຄີຕໍ່ຕ້ານກັບກຸ່ມຄ້າຢາເສບຕິດ.
ໃນການໃຫ້ການແບບເປັນລາຍລັກອັກສອນ ໃນວັນພຸດວານນີ້ ຜູ້ບັນຊາການ ຂອງກອງກຳລັງ SOUTHCOM ພົນເຮືອເອກເຄຣກ ພອລເລີ ກ່າວວ່າ ສະຫະລັດ “ພຽງແຕ່ໄດ້ຊຸກຍູ້ການຈັບກຸມທີ່ສຳເລັດຜົນປະມານ 9 ເປີເຊັນ ໃນການລັກລອບຄ້າຢາທີ່ຮູ້ຈັກກັນ” ຢູ່ໃນເຂດລາຕິນອາເມຣິກາ ແລະທະເລຄາຣິບບຽນ.
ພົນເຮືອເອກຟອລເລີ ກ່າວຕໍ່ສະມາຊິກຄະນະກຳມະການກອງທັບຂອງສະພາຕ່ຳວ່າ ທ່ານຕ້ອງການກຳລັງທະຫານ ແລະອຸບປະກອນເພີ້ມຕື່ມ ໃນຈຳນວນທີ່ສຳຄັນ ເພື່ອຈະປັບປຸງຈຳນວນດັ່ງກ່າວໃຫ້ດີຂຶ້ນ ຮວມທັງກຳປັ່ນອີກຫຼາຍສິບລຳ.
ພົນເຮືອເອກຟອລເລີ ກ່າວຕໍ່ພວກນັກຂ່າວ ຫຼັງຈາກໄດ້ໃຫ້ການແລ້ວ ຢູ່ທີ່ທຳນຽບຫ້າແຈວ່າ “ໂດຍການຮັບຮູ້ບັນຫາທ້າທາຍທີ່ສະຫຼັບຊັບຊ້ອນ ຢູ່ໃນເຂດໃກ້ກັບພວກເຮົານີ້ ພວກເຮົາຈະເຫັນການມີໜ້າເພີ້ມຂຶ້ນຢູ່ໃນເຂດຊີກໂລກນີ້.”
ການເພີ້ມຂຶ້ນດັ່ງກ່າວ ແມ່ນບັງເອີນມີຂຶ້ນພ້ອມໆກັນກັບການທົບທວນກອງບັນຊາການກຳລັງສະຫະລັດ ຊຶ່ງຈະຮວມທັງການເພີ້ມຈຳນວນກຳປັ່ນລົບ ເຮືອບິນແລະກຳລັງທະຫານ ນັ້ນຄືຄຳເວົ້າຂອງພົນເຮືອເອກຟອລເລີ ຊຶ່ງບໍ່ຍອມເວົ້າເຖິງໂຕໂລກເລີຍ.
