ເຈົ້າໜ້າທີ່ຂອງທຳນຽບຫ້າແຈກ່າວວ່າ ສະຫະລັດບໍ່ໄດ້ພົບເຫັນການເຄື່ອນທີ່ຜິດປົກກະຕິທາງ
ດ້ານທະຫານໃດໆຂອງເກົາຫຼີເໜືອ.
ລັດຖະມົນຕີກະຊວງປ້ອງກັນປະເທດສະຫະລັດທ່ານ Leon Panetta ພວມ ຢູ່ທີ່ລັດ Ca-
lifornia ບ້ານເກີດຂອງທ່ານແລະໄດ້ໂອ້ລົມທາງໂທລະສັບກັບລັດຖະມົນຕີກະຊວງປ້ອງກັນ
ປະເທດຂອງເກົາຫຼີໃຕ້ໃນມື້ວັນຈັນຜ່ານມານີ້ ກ່ຽວກັບເຫດການຕ່າງໆ ໃນໄລຍະສອງສາມມື້
ຂ້າງໜ້ານີ້.
ທ່ານ George Little ໂຄສົກຂອງທຳນຽບຫ້າແຈກ່າວຕໍ່ພວກນັກຂ່າວວ່າ ຫົວໜ້າກະຊວງ
ປ້ອງກັນປະເທດສະຫະລັດແລະຄູ່ຕຳແໜ່ງຝ່າຍເກົາຫຼີໃຕ້ໄດ້ໃຫ້ຄຳໝັ້ນສັນຍາວ່າຈະແຈ້ງໃຫ້
ກັນແລະກັນຊາບກ່ຽວກັບເຫດການຕ່າງໆໃນໄລຍະ ສອງສາມມື້ຂ້າງໜ້ານີ້.
ທ່ານ Little ເວົ້າວ່າ “ທັງລັດຖະມົນຕີປ້ອງກັນປະເທດຂອງສະຫະລັດແລະເກົາຫຼີ
ໃຕ້ເຂົ້າໃຈດີວ່າມັນເປັນເວລາທີ່ຫຼໍ່ແຫຼມ ແລະພວກທ່ານຈຳເປັນຕ້ອງໄດ້ຕິດຕາມ
ຢ່າງໃກ້ຊິດເບິ່ງການເຄື່ອນໄຫວຢູ່ໃນເກົາຫຼີເໜືອແລະໃນແຫຼມເກົາຫຼີນຳ.”
ມີລາຍງານວ່າ ໄດ້ມີການຍິງທົດລອງລູກສອນໄຟຫຼັງຈາກທ່ານກິມເຖິງແກ່ມໍລະນະກຳ. ເຈົ້າ
ໜ້າທີ່ອະວຸໂສໃນດ້ານປ້ອງກັນປະເທດທີ່ຂໍສະຫງວນຊື່ ກ່າວວ່າ ພວກທ່ານເຊື່ອວ່າການຍິງ
ທົດລອງລູກສອນໄຟ ແມ່ນໄດ້ມີການວາງແຜນລ່ວງໜ້າໄວ້ແລ້ວ ແລະບໍ່ມີສ່ວນພົວພັນໃດໆ
ກັບການເຖິງແກ່ມໍລະນະກຳຂອງຜູ້ນຳເກົາຫຼີເໜືອ.
ທ່ານ Dough Bandow ເຈົ້າໜ້າທີ່ອະວຸໂສທ່ານນຶ່ງ ທີ່ສະຖາບັນຄົ້ນຄວ້າ Cato ໃນກຸງວໍ
ຊິງຕັນກ່າວວ່າການເຖິງແກ່ມໍລະນະກຳຂອງທ່ານກິມໄດ້ພາໃຫ້ເກີດຄວາມບໍ່ທຸ່ນທ່ຽງຂຶ້ນແລະ
ມີທ່າທາງວ່າຈະເກີດການຕໍ່ສູ້ຍາດແຍ່ງອຳ ນາດຂຶ້ນ.
ທ່ານ Bandow ເວົ້າວ່າ “ມັນເປັນເລື່ອງທີ່ຍາກຫຼາຍທີ່ຈະຮູ້ໄດ້ວ່ານະໂຍບາຍຂອງ
ເກົາຫຼີເໜືອຈະເປັນແນວໃດ ທັງທາງດ້ານການເມືອງແລະດ້ານທະຫານໃນຊ່ວງ
ເວລາໄລຍະນັ້ນ. ທຸກໆຄົນຢູ່ໃນຂົງເຂດຕ່າງກໍມີຄວາມເປັນຫ່ວງກັງວົນ.”
ທ່ານເວົ້າວ່າ ໃນຂະນະທີ່ຍັງບໍ່ມີລາຍງານວ່າມີການເຄື່ອນໄຫວທີ່ຜິດປົກກະຕິຂອງເກົາຫຼີເໜືອ
ກຳລັງຂອງສະຫະລັດ ກໍບໍ່ມີເຫດຜົນໃດໆທີ່ຈະຕ້ອງຢູ່ໃນທ່າກຽມພ້ອມ ໃນໄລຍະສອງສາມມື້
ຂ້າງໜ້ານີ້.
ທ່ານ Bandow ເວົ້າວ່າ “ການບໍ່ມີສະເຖຍລະພາບໃດໆກໍຕາມໃນດ້ານທິດສະດີແລ້ວ
ອາດຈະພາໃຫ້ໂອກາດທີ່ຈະເກີດສົງຄາມແມ່ນມີສູງຂຶ້ນ. ຂ້າພະເຈົ້າຄິດວ່າມັນມີທ່າ
ທາງທີ່ຈະເປັນໄປໄດ້ ໜ້ອຍທີ່ສຸດ ແຕ່ຖ້າທ່ານ ຫາກເປັນທະຫານອະເມຣິກັນແລ້ວ
ທ່ານຕ້ອງຮັບຮູ້ວ່າບາງທີມັນອາດຈະມີຄວາມເຄັ່ງຕຶງທາງດ້ານຄວາມປອດໄພແລະ
ຄວາມວິຕົກກັງວົນເພີ່ມຂຶ້ນ ກ່ຽວກັບທຸກໆຢ່າງທີ່ເກີດຂຶ້ນຢູ່ ໃນບໍລິເວນຊາຍແດນ.”
ທ່ານ Bruce Klingner ເປັນອະດີດສະມາຊິກຄົນນຶ່ງຂອງປະຊາຄົມສືບລັບສະຫະລັດຊຶ່ງ
ໃນເວລານີ້ເປັນເຈົ້າໜ້າທີ່ອະວຸໂສ ທີ່ມູນນິທິ Heritage Foundation ທີ່ໃຫ້ຄຳແນະນຳໃນ
ດ້ານນະໂຍບາຍ. ທ່ານກ່າວວ່າມັນຍັງບໍ່ທັນແນ່ນອນເທື່ອວ່າຜູ້ສືບທອດອຳນາດຕໍ່ຈາກທ່ານ
ກິມຈະປະຕິບັດຕົນແນວໃດ.
ທ່ານ Klingner ກ່າວວ່າ “ບາງທີທ່ານກິມຈົງອຸນ ອາດມີຄວາມຮູ້ສຶກຫຼາຍຂຶ້ນວ່າຈຳ
ເປັນຕ້ອງໄດ້ໃຊ້ວິທີການກໍ່ກວນເພື່ອກະຕຸກຊຸກຍູ້ໃຫ້ເກີດຄວາມເປັນນໍ້ານຶ່ງໃຈດຽວ
ເພື່ອພິສູດໃຫ້ເຫັນເຖິງຄຸນນະພາບ ແລະຄວາມສາມາດຂອງທ່ານ ຕໍ່ການທ້າທາຍ
ໃດໆກໍຕາມ ທີ່ອາດຈະເກີດຂຶ້ນນັ້ນ. ໂດຍກ່າວເຖິງພາກສ່ວນເຫຼົ່ານີ້ ທັງໝົດແລ້ວ
ມັນກໍຍັງສືບຕໍ່ມີຄວາມຫຼໍ່ແຫຼມສຳຄັນສຳລັບສະຫະລັດ ທີ່ຈະຮັກສາກຳລັງກອງໜ້າ
ທີ່ເຂັ້ມແຂງຢູ່ປະເທດຍີ່ປຸ່ນ ຮວມທັງທີ່ເກາະໂອກີນາວາແລະເກົາຫຼີໃຕ້ເພື່ອສະກັດ
ກັ້ນແລະປ້ອງກັນຕະຫຼອດທັງຖ້າຫາກມີຄວາມຈຳເປັນເອົາຊະນະຕໍ່ການໂຈມຕີໃດໆ
ກໍຕາມຂອງເກົາຫຼີເໜືອຫຼືກິດຈະກຳທາງດ້ານທະຫານອື່ນໆ.”
ມີທະຫານອະເມຣິກັນປະມານ 30,000 ຄົນປະຈຳການຢູ່ທີ່ເກົາຫຼີໃຕ້ແລະເຈົ້າໜ້າທີ່ກ່າວວ່າ
ບໍ່ໄດ້ມີການປ່ຽນແປງໃດໆ ກ່ຽວກັບລະດັບການກຽມພ້ອມສຳລັບທະຫານສະຫະລັດຢູ່ໃນຂົງ
ເຂດ. ໃນມື້ວັນຈັນຜ່ານມານີ້ ທຳນຽບຫ້າແຈກ່າວວ່າ ບໍ່ມີຄວາມຈິງໃດໆກ່ຽວກັບຂ່າວລືທີ່ວ່າ
ຄອບຄົວຂອງພວກທະຫານອະເມຣິກັນໄດ້ພາກັນເດີນທາງອອກຈາກເກົາຫຼີໃຕ້ນັ້ນ.
