YES Academy ໄປສອນສິນລະປະ ທີ່ໄທ ແລະພາກຕາເວັນອອກກາງ (ວີດີໂອລາວ/ອັງກິດ)

ເບິ່ງວີດີໂອ ພາສາລາວ:

ທ່ານ Gene Aitken ຄູ​ສອນ​ດົນຕີ​ແຈ໊ສ ທີ່​ເຄີຍ​ຖືກ​ສະ​ເໜີ​ຊື່​ເຂົ້າຮັບ​ລາງ​ວັນ Grammy ຊຶ່ງ​ເປັນ​ລາງວັນອັນ​ຍິ່ງ​ໃຫຍ່ຂອງ​ວົງ​ການ​ອຸດສາຫະກໍາ​ດົນຕີ​ ຂອງ​ອາ​ເມ​ຣິກາ ເຄີຍເປັນ​ຫົວໜ້າ​ວົງ​ດົນຕີ​ທະຫານ​ທີ່ີມີ​ຊື່​ສຽງ​ມາ​ແລ້ວ​ຫລາຍ​ວົງ ​ໃນ​ຂົງ​ເຂດ​ເອ​ເຊຍ ​ແລະ​ພາກຕາ​ເວັນອອກ​ກາງ.

ຈາກ​ປະ​ເທດ​ໄທ ທ່ານຈະ​ເດີນທາງ​ໄປ​ຍັງ​ຫລາຍໆປະ​ເທດ​ທີ່​ກໍາລັງ​ໂຜ່​ໂຕ​ຂຶ້ນມາ​ຈາກ​ຂໍ້​ຂັດ​ແຍ້​ງ​ແລະ​ການ​ຢູ່​ໂດດດ່ຽວ ​ເພື່ອ​ນໍາ​ເອົາ​ພວກ​ເຍົາວະ​ຊົນ​ຈາກຂົງ​ເຂດແລະ​ວັດທະນະ​ທໍາ​ຕ່າງໆ ​ມາ​ຮ່ວມ​ກັນ.

“ມັນ​ມີ​ພາສາ​ນຶ່ງທີ່​​ເປັນ​ພາສາ​ຮ່ວມ​ກັນ​ ແລະ​ນັ້ນ​ກໍຄື​ສິນລະປະ​. ທົ່ວ​ປະ​ເທດ ຈີນ ທົ່ວພາກຕາ​ເວັນ​ອອກ​ກາງ ​ແລະ​ທຸກ​ຫົນ​ແຫ່ງ ທຸກໆ​ຄົນ​​ແມ່ນເຂົ້າ​​ໃຈ ສິນລະປະ. ທຸກໆຄົນ​ຢາກ​ມີ​ສ່ວນ​ພົວພັນ​ນໍາ ບໍ່​ວ່າ​ໃນ​ຖານະເປັນຜູ້​ປະ​ກອບ​ສ່ວນ ຫລື​ເປັນ​ພຽງຜູ້​ຢາກ​ເບິ່ງ​ຢາກ​ຟັງ. ​ເພາະວ່າ ​ເວລາ​ພວກ​ເຮົາ​ໄປ​ອີ​ຣັກ ຊຶ່ງບາງທີ​ ພວກ​ເຮົາ​ອາດ​ໄດ້​ຮັບ​ແຈ້ງ​ລ່ວງ​ໜ້າພຽງ​ມື້​ດຽວ ກ່ອນຈະ​ມີ​ການ ສະ​ແດງ​ດົນຕີ​ກັນນັ້ນ ຫ້ອງ​ໂຖງບ່ອນສະ​ແດງດົນຕີ​ ​ກໍແມ່ນ​ອັ່ງ​ອໍ​​ໄປດ້ວຍ​ຜູ້​ຊົມ.”

Rang Kawa ນັກ​ດົນຕີ​ແຈ໊ສ ຈາກເຂດ Kurdistan ຂອງອີຣັກ​ ​ໄດ້​ເດີນ ທາງ​ໄປ​ຍັງ​ປະ​ເທດ​ໄທ ​ເພື່ອຮຽນ​ດົນຕີ​ກັບທ່ານ Aitken. ລາວ​ເວົ້າ​ວ່າ:

“ເພງ​ແຈ໊ສ ​ເພງຣ໊ອກ ​ແລະ​ເພງພ໊ອບສາກົນ ​​ແມ່ນເປັນ​ນຶ່ງ​ໃນ​ຫລາຍ​ສິ່ງໆ​ທີ່​​ແປກໃໝ່ຢູ່​ໃນ​ປະ​ເທດ​ຂອງ​ຂ້ອຍ. ​ແຕ່​ເວລາ​ໂຄງການ YES Academy ຂອງ​ສະມາຄົມ American Voices ເຂົ້າ​ໄປ​ອີຣັກ ປາກົດ​ວ່າ​ ມັນ​ຄຶກຄັກ ​ແລະດີ​ຂຶ້ນ​ກວ່າ​ເກົ່າ”.

ຫ້ອງສອນ​ເພງ​ແຈ໊ສຂອງ​ທ່ານ Aitken ​ແມ່ນ​ເປັນ​ສ່ວນ​ນຶ່ງ​ຂອງ​ໂຄງການ YES Academy ຊຶ່ງ​ຄໍາ​ວ່າ YES ​ແມ່ນ​ຫຍໍ້​ມາ​ຈາກ Youth Excellence on Stage ທີ່​ແປ​ວ່າ ຄວາມ​ດີ​ເດ່​ນຂອງ​ເຍົາວະ​ຊົນ​ເທິງ​ເວທີ​ສະ​ແດງ.

​ໂຄງການບໍ່​ຫວັງ​ຜົນ​ກໍາ​ໄລ​ທີ່ໄດ້​ທຶນ​ຈາກສະຫະລັດໂຄງການນີ້ ແມ່ນ​ສະໜອງ​ການ​ອົບ​ລົມສິດສອນ​ແບບ​ມື​ອາຊີບໃຫ້ ໂດຍ​ບໍ່​ຄິດ​ຄ່າ ໃນດ້ານ​ສິນລະປະການສະ​ແດງ ທີ່​ເປັນ​ເອກະລັກ​ຂອງອາ​ເມຣິກາ ​ເຊັ່ນດົນຕີ Hip Hop ​ແລະ​ລະຄອນ​ເພງຕ່າງໆ ທີ່​ສະ​ແດງ​ຢູ່ Broadway.

ນອກ​ນີ້​ແລ້ວ ​ໂຄງການ YES Academy ຍັງໄປ​ສອນ​ຢູ່​ໃນ​ອັຟການີສ ຖານ ອີ​ຈິບ ຈໍ​ແດນ ​ເລ​ບາ​ນອນ ມາ​ເລ​ເຊຍ ປາ​ກີ​ສຖານ ​ແລະ​ຊີ​ເຣຍ ​ແຕ່ ທ່ານ Aitken ກ່າວ​ວ່າ ​ສ່ວນ​ໃຫຍ່ແມ່ນຈະ​ເຮັດຢູ່​ໃນ​ອີຣັກ.

ເບິ່ງວີດີໂອ ພາສາອັງກິດ:

ທ່ານ John Ferguson ຜູ້​ອໍານວຍ​ການ​ໂຄງການ Yes Academy ກ່າວ​ວ່າ ອີ​ຣັກ​ມີ​ວົງ​ດົນຕີ​ Orchestra ທີ່​ຍິ່ງ​ໃຫຍ່​ຫຼາຍ​ວົງ ມີ​ໂຮງຮຽນ​ສອນ​ດົນຕີແລະ​ລະຄອນທີ່​ດີໆ ພ້ອມ​ດ້ວຍ​ພວກ​ນັກຮຽນ​ທີ່​ສົນ​ໃຈ​ຢາກ​ຮຽນແທ້ໆ ​ແຕ່ໄລຍະ​ເວລາ​ຫລາຍ​ສິບ​ປີ​ຂອງ​ການ​ຂັດ​ແຍ້​ງສູ້​ລົບກັນ ​ເຮັດ​ໃຫ້​ຄູ​ສອນ​ບໍ່​ມີ​ໄດ້​ຮັບການອົບ​ລົມ​ທີ່​ດີໆ. ທ່ານ​ອະທິບາຍ​ວ່າ:

“ດັ່ງ​ນັ້ນ ພວກ​ເຮົາຈຶ່ງ​ກໍາລັງ​ພະຍາຍາມ​ສ້າງ​ໂຄງ​ລ່າງ​ພື້ນຖານດ້ານ​ວັດທະ ນະ​ທໍາ​ຄືນ​ໃໝ່ ຢູ່​ທີ່​ນັ້ນ ຄືຊ່ວຍ​ເຝິກ​ແອບ​ບັນດາ​ຄູ​ສອນ ຊ່ວຍ​ເຝິກ​ແອບ​ຄູ​ສອນ​ລຸ້ນຕໍ່​ໄປ ​ແລະ​ໃຫ້​ກໍາລັງ​ໃຈ​ແກ່​ພວກ​ນັກຮຽນ​ ເພື່ອ​ໃຫ້​ພວກ​ເຂົາ​ເຈົ້າ ບຸກບືນ​ຕໍ່​ໄປ​ໃນ​ຄວາມ​ມັກ​ຄວາມ​ສົນ​ໃຈ​ດ້ານ​ດົນຕີ​ ການ​ເຕັ້ນ​ການ​ຟ້ອນ ​ແລະ​ການສະ​ແດງ​ລະຄອນ ຂອງ​ພວກ​ເຂົາ​ເຈົ້າ.”

ທ່ານ ​ເຟີ​ກູ​ສັນ ກ່າວ​ອີກ​ວ່າ ພວກ​ເຂົາ​ເຈົ້າບໍ່​ໄດ້ອະນຸຍາດ​ໃຫ້ແຕ່​ດົນຕີ ບໍ່ ໃຫ້ສອນ​ເຕັ້ນ​ລໍາ ​ຢູ່​ໃນປະ​ເທດ​ອະນຸ​ລັກ​ນິຍົມ​ ອັຟກາ​ນີສຖານນັ້ ນ​.

​ແຕ່​ຢູ່ແຫ່ງ​ອື່ນໆ ​ໃນທົ່ວ​ຂົງ​ເຂດພາກ​ຕາ​ເວັນ​ອອກ​ກາງ​ນັ້ນ ສິນລະປະດ້ານ​ການສະ​ແດງ​ຂອງຕາ​ເວັນ​ຕົກ​ແມ່ນ​ໄດ້​ຮັບ​ຄວາມ​ນິຍົມ​ຫລາຍສົມຄວນ ​ເພາະວ່າ​ອິດ​ທິພົນ​ຈາກຮູບ​ເງົາ​ Hollywood ​ແລະການ​ຂາດ​ເຂີນ​ໂຮງຮຽນ ​ແລະ​ຄູ​ສອນ​ ​ມືອາຊີບ.