ປະທານາທິບໍດີບາຣັກໂອບາມາ ຈະໃຫ້ກຽດແກ່ດວງວິນຍານຂອງພວກທີ່ເສຍຊີວິດໄປໃນປາງສົງຄາມບັ້ນຕ່າງໆຂອງອະເມຣິກາໃນວັນຈັນມື້ນີ້ ໃນພິທີວາງພວງມາລາທີ່ປ່າຊ້າແຫ່ງຊາດ Arlington ນອກກຸງວໍຊິງຕັນ.
ວັນຈັນສຸດທ້າຍຂອງເດືອນພຶດສະພາເປັນວັນ Memorial Day ຫລືວັນລະນຶກເຖິງຜູ້ເສຍຊີວິດ ອັນເປັນມື້ພັກທາງການສໍາລັບຊາວອະເມຣິກັນທັງປວງ ເພື່ອໃຫ້ກຽດແກ່ພວກທີ່ໄດ້ສະລະຊີບເພື່ອຊາດຂອງເຂົາເຈົ້ານັ້ນ.
ຈະມີການຈັດພິທີວາງພວງມາລາ ຢູ່ທີ່ອະນຸສາວະລີຕ່າງໆໃນກຸງວໍຊິງຕັນ ເຊ່ນອະນຸສາວະລີສົງຄາມໂລກຄັ້ງທີສອງ ອະນະສາວະລີນັກລົບເກົ່າຫວຽດນາມ ອະນຸສາວະລີກອງທັບເຮືອ ແລະກອງທັບອາກາດ.
ນອກນີ້ ກໍມີການເດີນສວນສະໜາມແລະພິທີລະລຶກໄວ້ອາໄລຕ່າງໆເຊ່ນກັນ ໃນຫົວເມືອງໃຫຍ່ແລະຫົວເມືອງນ້ອຍຕ່າງໆໃນທົ່ວປະເທດອະເມຣິກາ.
ໃນວັນອາທິດວານນີ້ ພວກອາສາສະມັກໄດ້ພາກັນວາງທຸງຊາດອະເມລິກັນນ້ອຍໆໃສ່ຕາມຂຸມຝັງສົບທີ່ປ່າຊ້າແຫ່ງຊາດ Arlington ໃນຂະ ນະທີ່ ພວກລູກເສືອ ຫລື Boy Scouts ກໍໄດ້ພາກັນໄປວາງທຸງຊາດ ນ້ອຍໆໃນປ່າຊ້າພວກນັກລົບເກົ່າແຫ່ງຕ່າງໆໃນທົວປະເທດ.
ໃນວັນອາທິດວານນີ້ເຊ່ນກັນ ພວກຂີ່ລົດຈັກຫລາຍພັນຄົນມາຈາກທົ່ວສະຫະລັດ ທີ່ເອີ້ນວ່າ ພວກ “Rolling Thunder” ໄດ້ພາກັນຂີ່ລົດ ຈັກເປັນຂະບວນເຂົ້າສູ່ກຸງວໍຊິງຕັນ ນະຄອນຫລວງຂອງສະຫະລັດ ເພື່ອຮຽກຮ້ອງຄວາມສົນໃຈໃຫ້ແກ່ພວກນັກລັບເກົ່າທີຍັງຢູ່ໃນບັນຊີລາຍຊື່ພວກທີ່ຫາຍສາບສູນໄປໃນປາງສົງຄາມນັ້ນ.
ພວກຄົນອະເມຣິກັນຫລາຍຄົນພາກັນຖືວັນ Memorial Day ນີ້ເປັນ ການເລີ້ມຕົ້ນຂອງວັນພັກໃນລະດູຮ້ອນ ຊຶ່ງພວກເຂົາເຈົ້າພາກັນສະເຫລີມສະຫລອງກັນດ້ວຍການຊຸມເຂົ້າປິກນິກ ຫລືເດີນທາງໄປຫລິ້ນແຄມທະເລ ຫລືໄປພັກແຮມຄືນໃນປ່າ. ຄົນອະເມຣິກັນບາງຄົນກ່າວວ່າ ເຂົາເຈົ້າມີຄວາມເປັນຫ່ວງວ່າ ວັນ Memorial Day ໄດ້ກາຍມາເປັນ ວັນພັກຜ່ອນຫລາຍຂຶ້ນ ແທນທີ່ຈະເປັນເວລາສໍາລັບລະນຶກເຖິງຫລືໃຫ້ກຽດແກ່ພວກທີ່ເສຍຊີວິດໄປໃນປາງສົງຄາມຂອງປະເທດ.
