ປະທານາທິບໍດີສະຫະລັດ ທ່ານບາຣັກ ໂອບາມາ ເດີນທາງໄປຢ້ຽມຢາມລັດໂຄໂລຣາໂດ
ໃນວັນອາທິດມື້ນີ້ ເພື່ອພົບພໍ້ພວກຄອບຄົວທີ່ສູນເສຍສະມາຊິກໄປ ໃນການສັງຫານໝູ່
ທີ່ໂຮງສາຍຮູບເງົາ ໃກ້ນະຄອນແດນເວີ ທີ່ໄດ້ເຮັດໃຫ້ 12 ຄົນເສຍຊີວິດ ລວມທັງເດັກຍິງ
ອາຍຸ 6 ປີ ແລະເຮັດໃຫ້ອີກຫລາຍສິບຄົນ ໄດ້ຮັບບາດເຈັບ.
ໃນວັນເສົາວານນີ້ ຊ່ຽວຊານດ້ານລະເບີດ ໄດ້ກໍາຈັດວັດຖຸລະເບີດໃຫຍ່ທັງໝົດ ທີ່ມືປືນ
ໄດ້ຫ້າງໄວ້ເປັນກັບດັກ ຢູ່ທີ່ອາພາດເມັນຂອງຕົນນັ້ນ.
ຫົວໜ້າຕໍາຫລວດຂອງເມືອງ Aurora ທ່ານ Dan Oates ເວົ້າວ່າ ອາພາດເມັນດັ່ງກ່າວ ແມ່ນໄດ້ຖືກຫ້າງລະເບີດໄວ້ ເພື່ອສັງຫານຜູ້ໃດກໍຕາມ ທີ່ຈະເຂົ້າໄປໃນຫັ້ນກ່ອນໝູ່ ຊຶ່ງ
ທ່ານກ່າວຕໍ່ໄປວ່າ ກໍຄົງຈະແມ່ນເຈົ້າໜ້າທີ່ຕໍາຫລວດ ທີ່ຈະເຂົ້າໄປກ່ອນໝູ່ໝົດ.
ເບິ່ງຮູບສະໄລດ໌ກ່ຽວກັບການໄວ້ອາໄລແກ່ພວກໄດ້ຮັບເຄາະ:
ພວກເຈົ້າໜ້າທີ່ເວົ້າວ່າ ທ້າວ James Holmes ນັກຮຽນ ອາຍຸ 24 ປີ ໄດ້ຍິງປືນກວດ
ເຂົ້າໃສ່ຝຸງຄົນ ຢູ່ໃນໂຮງສາຍຮູບເງົາທີ່ແອອັດແຫ່ງນຶ່ງໃນເຊົ້າວັນສຸກທີ່ຜ່ານມາ ທີ່ເມືອງ
Aurora.
ທ້າວ Holmes ທີ່ປະກອບອາວຸດຢ່າງໜັກ ໄດ້ຖືກຈັບໃນທັນທີ ຢູ່ນອກໂຮງສາຍຮູບເງົາ
ລຸນຫຼັງການນອງເລືອດດັ່ງກ່າວ ຊຶ່ງຜູ້ກ່ຽວມີປືນຍາວນຶ່ງກະບອກ, ປືນລູກຊອງນຶ່ງກະບອກ, ປືນສັ້ນສອງກະບອກ, ໜ້າກາກກັນອາຍແກສ ແລະນຸ່ງເສື້ອກັນກະສູນປືນ. ເວລານີ້ ຜູ້ກ່ຽວ
ຖືກຂັງດ່ຽວຢູ່ໃນຄຸກແຫ່ງນຶ່ງ.
