ລິ້ງ ສຳຫລັບເຂົ້າຫາ

ວັນພະຫັດ, ໐໓ ເມສາ ໒໐໒໕

ຊາຍອາເມຣິກັນ ຟ້ອງບໍລິສັດນຳທ່ຽວ ຫຼັງຈາກພັນລະຍາ ຖືກຊ້າງ​ນ້ຳກັດເສຍ​ຊີ​ວິດທີ່ປະເທດ ແຊມເບຍ


ແຟ້ມພາບ-ຊ້າງນ້ຳລອຍຢູ່ໃນໜອງນ້ຳທີ່ ສວນອຸທິຍານ Hacienda Napoles, ໃນເມືອງ ເປີຣໂຕ ທຣີອຸນໂຟ, ປະເທດໂຄລອມເບຍ, ວັນທີ 16 ກຸມພາ 2022. (AP Photo/Fernando Vergara)
ແຟ້ມພາບ-ຊ້າງນ້ຳລອຍຢູ່ໃນໜອງນ້ຳທີ່ ສວນອຸທິຍານ Hacienda Napoles, ໃນເມືອງ ເປີຣໂຕ ທຣີອຸນໂຟ, ປະເທດໂຄລອມເບຍ, ວັນທີ 16 ກຸມພາ 2022. (AP Photo/Fernando Vergara)

ຜູ້ຊາຍຊາວລັດນິວເຈີຊີ ເຊິ່ງປະສົບເຫດການທີ່ຮ້າຍແຮງຈາກການທີ່ພັນລະຍາຂອງລາວ ຖືກໂຕຊ້າງ​ນ້ຳ ຫຼື ຮິບໂປໂປໂທ​ມັ​ສ ທຳຮ້າຍຈົນເສຍຊີວິດ ເມື່ອປີກາຍນີ້ ລະຫວ່າງການເດີນທາງໄປທ່ອງທ່ຽວອາຟຣິກາ ໄດ້ຕັດສິນໃຈຟ້ອງຮ້ອງບໍລິ ສັດນຳທ່ຽວເຊິ່ງເປັນຜູ້ຈັດການທ່ອງທ່ຽວດັ່ງກ່າວ ໂດຍກ່າວຫາວ່າ ບໍ່ສາມາດຮັບປະກັນຄວາມປອດໄພຂອງລູກຄ້ານັກທ່ອງທ່ຽວໄດ້ ອີງຕາມລາຍງານ ຂອງອົງການຂ່າວເອພີ.

ທ່ານ ເຄຣັກ ແລະ ຍານາງ ລີຊາ ແມນເດີຣ໌ສ ຖືກຊ້າງ​ນ້ຳໂຕນຶ່ງຈູ່ໂຈມທຳຮ້າຍ ຂະນະທີ່ຍ່າງຢູ່ໃນປ່າຂອງ​ປະ​ເທດແຊມເບຍ ເມື່ອເດືອນມິຖຸນປີກາຍນີ້ ໂດຍມີຜູ້ ນຳທາງຈາກບໍລິສັດ ອາຟຣິກັນ ພວຣ໌ຕໂຟລີໂອ (African Portfolio) ຈາກ ລັດຄອນເນັກຕິຄັດ ຮ່ວມຍ່າງທາງໄປນຳດ້ວຍ.

ໃນເອກະສານການຟ້ອງຮ້ອງເຊິ່ງລົງວັນທີ 5 ກຸມພາ ລະບຸວ່າ ຊ້າງ​ນ້ຳທີ່ຮ້າຍໂຕນັ້ນ ແລ່ນພຸ້ງຂຶ້ນມາຈາກນ້ຳ ແລ້ວງັບເອົາຍານາງ ລີຊາ ໄວ້ ຈາກນັ້ນ ກັດຫົວ ແລະຮ່າງກາຍຂອງລາວ ໂດຍຜູ້ຟ້ອງຮ້ອງກ່າວຫາວ່າ ຜູ້ນຳທາງເຊິ່ງມີປືນຍາວຕິດຕົວ ໄດ້ຍ່າງໜີໂດຍບໍ່ໄດ້ເຂົ້າໄປຊ່ອຍເຫຼືອ ຍານາງ ລີຊາ ແລະ ທ່ານ ເຄຣັກ ທີ່ເບິ່ງເຫດການຢ່າງຕົກໃຈ.

ເອກະສານບອກວ່າ ຍານາງ ລີຊາ ອາຍຸ 70 ປີ ໄດ້ຮັບບາດເຈັບສາຫັດ ແລະເສຍ ຊີວິດໃນເວລາບໍ່ດົນ.

ທ່ານ ພອລ ສເລເກີອຣ໌ ທະນາຍຄວາມຂອງໂຈດ ກ່າວວ່າ “ເລື້ອງແບບນີ້ ບໍ່ຄວນເກີດຂຶ້ນອີກ” ແລະວ່າ “ທຸລະກິດຕ່າງໆ ຄວນປະຕິບັດຕາມມາດຕະ ຖານຄວາມປອດໄພຂັ້ນພື້ນຖານ ລວມເຖິງຜູ້ທີ່ຢູ່ໃນທຸລະກິດນຳທ່ຽວຊາຟາຣີ ບໍ່ດັ່ງນັ້ນຈະເກີດຜົນກະທົບທີ່ຮ້າຍແຮງຕາມມາເຊັ່ນນີ້.”

ບໍລິສັດນຳທ່ຽວອາຟຣິກາແຫ່ງນີ້ຖືກຟ້ອງວ່າ “ສະໜັບສະໜູນ ແລະ/ຫຼື ອະນຸຍາດ” ໃຫ້ນັກທ່ອງທ່ຽວຄູ່ນີ້ເຂົ້າໃກ້ກັບຊ້າງ​ນ້ຳ ທີ່ດຸຮ້າຍ ແລະບໍ່ສາມາດປົກ ປ້ອງທັງສອງຄົນ ລະຫວ່າງທີ່ຖືກຈູ່ໂຈມທຳຮ້າຍໄດ້ ໂດຍຜູ້ຟ້ອງ ໄດ້ຮຽກ ຮ້ອງຄ່າເສຍຫາຍທີ່ຍັງບໍ່ມີການເປີດເຜີຍຈຳນວນ.

ຮູບນີ້ສະໜອງໂດຍ ທ່ານເຄຣັກ ແມນເດີຣ໌ສ ໃຫ້ເຫັນ ພັນລະຍາ ຍານາງ ລີຊາ ແມນເດີຣ໌ສ ຜູ້ຖືກຮິບໂປ້ທຳຮ້າຍເຖິງແກ່ຊີວິດ ທີ່ປະເທດແຊມເບຍ ເມື່ອວັນທີ 5 ກຸມພາ 2025 (Craig Manders via AP)
ຮູບນີ້ສະໜອງໂດຍ ທ່ານເຄຣັກ ແມນເດີຣ໌ສ ໃຫ້ເຫັນ ພັນລະຍາ ຍານາງ ລີຊາ ແມນເດີຣ໌ສ ຜູ້ຖືກຮິບໂປ້ທຳຮ້າຍເຖິງແກ່ຊີວິດ ທີ່ປະເທດແຊມເບຍ ເມື່ອວັນທີ 5 ກຸມພາ 2025 (Craig Manders via AP)

ທາງດ້ານທະນາຍຄວາມຂອງບໍລິສັດອາຟຣິກັນ ພອດໂຟລີໂອ (African Portfolio) ກ່າວວ່າ ທາງບໍລິສັດຮັບໜ້າທີ່ຈັດຫາທີ່ພັກ ແລະກຽມຕາຕະລາງ ທ່ອງທ່ຽວໃຫ້ແກ່ນັກທ່ອງທ່ຽວຊາວອາເມຣິກັນຄູ່ນີ້ເທົ່ານັ້ນ ໂດຍມີເຈົ້າຂອງທີ່ພັກ ຄື ຊິອາວາ ຊາຟາຣີສ໌ (Chiawa Safaris) ໃນແຊມເບຍ ເປັນຜູ້ຈັດຫາຜູ້ນຳ ທາງຊາຟາຣີ.

ທະນາຍຂອງບໍລິສັດ ລະບຸດ້ວຍວ່າ ຊິອາວາ ຊາຟາຣີສ໌ ມີປະຫວັດທີ່ດີໃນການ ບໍລິການລູກຄ້າ ແລະຂໍໃຫ້ສານຍົກຟ້ອງຄະດີນີ້ ໂດຍອ້າງອີງຈາກເງື່ອນໄຂທີ່ ລະບຸໄວ້ ໃນສັນຍາການນຳທ່ຽວທີ່ສາມີພັນລະຍາຄູ່ນີ້ ໄດ້ລົງນາມໄວ້ແລ້ວ.

ຖະແຫລງການຂອງ African Portfolio ເປີດເຜີຍວ່າ ໄດ້ມີການປະຕິບັດຕາມລະບຽບຄວາມປອດໄພກ່ອນເກີດເຫດ ແລະໄດ້ມີການເຕືອນຫຼາຍຄັ້ງໃຫ້ນັກ ທ່ອງທ່ຽວກັບໄປທີ່ລົດ “ລະຫວ່າງເກີດເຫດ.”

ທັງນີ້ ຊ້າງ​ນ້ຳຖືເປັນສັດບົກລ້ຽງລູກດ້ວຍນົມຂະໜາດໃຫຍ່ເປັນອັນດັບສອງຮອງ ຈາກຊ້າງ ໂດຍຊ້າງ​ນ້ຳເພດຜູ້ ທີ່ໃຫຍ່ເຕັມໄວ ອາດມີນ້ຳໜັກເຖິງ 3,200 ກິໂລກຣາມ ແລະມີຄວາມຍາວປະມານ 3.5 ແມັດ ນອກຈາກນີ້ ຍັງເປັນສັດ ທີ່ຫວງແຫນພື້ນທີ່ ແລະອາດມີຄວາມຮ້າຍໄດ້ໃນບາງຄັ້ງ.

ນຶ່ງປີກ່ອນໜ້າທີ່ຈະເກີດເຫດການນີ້ ເຄີຍມີລາຍງານຊ້າງ​ນ້ຳໂຈມຕີເຮືອຄານູ ລຳນຶ່ງຈົນຫລົ້ມລົງໃນແມ່ນ້ຳ ທີ່ມາລາວີ ເຮັດໃຫ້ມີຜູ້ເສຍຊີວິດ 7 ຄົນ.

ຟໍຣັມສະແດງຄວາມຄິດເຫັນ

XS
SM
MD
LG