ຄົນສັນຊາດອາເມຣິກັນ ຜູ້ນຶ່ງທີ່ຖືກຕັ້ງຂໍ້ຫາສຳລັບການສົ່ງລະເບີດທໍ່ນໍ້າ ໄປໃຫ້ນັກ
ການເມືອງລະດັບສູງສັງກັດພັກເດໂມແຄຣັດ ແລະ ຄົນອື່ນໆທີ່ວິຈານປະທານາທິບໍດີ
ສະຫະລັດ ທ່ານ ດໍໂນລ ທຣຳ ນັ້ນ ໄດ້ຖືກສັ່ງຈັບເຂົ້າຄຸກ ໂດຍບໍ່ໃຫ້ປະກັນຕົວອອກ
ມາໄດ້ ໃນວັນອັງຄານວານນີ້ ໃນລະຫວ່າງການປາກົດຕົວ ຕໍ່ສານລັດຖະບານກາງ
ຄັ້ງທຳອິດໃນ ນິວຢອກ.
ຮອງໄອຍະການສະຫະລັດ ທ່ານນາງ ເຈນ ຄິມ ໄດ້ໂຕ້ແຍ້ງວ່າ ທ້າວ ເຊຊາ ຊາຢັອກ,
ຜູ້ທີ່ຖືກສົ່ງໂຕ ຈາກການຄວບຄຸມໂດຍລັດຖະບານກາງໃນລັດຟລໍຣິດາ, ນັ້ນແມ່ນ
“ໄພອັນຕະລາຍທີ່ຮ້າຍແຮງຕໍ່ສາທາລະນະ ແລະ ຄວາມສ່ຽງຕໍ່ການເດີນທາງໆອາ
ກາດ.”
ທ້າວ ຊາຢັອກ, ທີ່ໃສ່ຊຸດນັກໂທດສີຟ້ານັ້ນ, ໄດ້ປາກົດວ່າຕື່ນຕົວ ແລະ ມີຄວາມເຄົາ
ລົບ ໃນເວລາທີ່ລາວປາກົດຕົວຕໍ່ໜ້າຜູ້ພິພາກສາລັດ ສະຫະລັດ ທ່ານ ໂຣເບີດ
ແລເບີເກີ. ເມື່ອທ່ານ ແລເບີເກີ ຖາມຈຳເລີຍວ່າລາວເຂົ້າໃຈ ກ່ຽວກັບ ສິດທິຂອງລາວ
ບໍ່ນັ້ນ, ທ້າວ ຊາຢັອກ ໄດ້ຕອບວ່າ “ໂດຍທ່ານ, ເຂົ້າໃຈຮ້ອຍເປີເຊັນ.”
ການໃຫ້ປາກຄຳຄັ້ງທຳອິດໃນຄະດີດັ່ງກ່າວ ແມ່ນມີກຳນົດໃນວັນທີ 12 ພະຈິກ ນີ້.
ອະດີດນັກເຕັ້ນແກ້ເຄື່ອງ ແລະ ຄົນຂັບລົດສົ່ງພິດຊາ ນັ້ນ ໄດ້ຖືກຈັບກຸມ ໃນວັນທີ 26
ຕຸລາທີ່ຜ່ານມາໃນເມືອງ ຝອດ ລໍເດີເດລ, ລັດ ຟລໍຣິດາ, ແລະ ໄດ້ຖືກຕັ້ງຂໍ້ຫາ ໃນຄະ
ດີອາຍາລັດຖະບານກາງ 5 ກະທົງ. ທ້າວ ຊາຢັອກ, ຜູ້ທີ່ອາໄສຢູ່ໃນລົດຕູ້ສີຂາວ ທີ່
ຕິດຮູບພາບການເມືອງປີກຂວາເຕັມໄປໝົດ ເຊິ່ງສະໜັບສະໜູນທ່ານ ທຣຳ ແລະ ໄດ້
ກ່າວປະນາມພວກນັກວິຈານທ່ານ ທຣຳ ນັ້ນ, ແມ່ນໄດ້ຖືກຄວບຄຸມຕົວ ຫຼັງຈາກການ
ຕາມລ່າຢ່າງເຂັ້ມຂຸ້ນ.
ທ້າວ ຊາຢັອກ ໄດ້ຖືກກ່າວຫາ ກ່ຽວກັບ ການສົ່ງລະເບີດແປັບນໍ້າໄປໃຫ້ຄົນຕ່າງໆ 16
ລູກ, ເຊິ່ງບາງລູກນັ້ນ ໄດ້ຖືກສົ່ງໄປໃຫ້ອະດີດປະທານາທິບໍດີ ບາຣັກ ໂອບາມາ ແລະ
ທ່ານ ບິລ ຄລິນຕັນ, ອະດີດລັດຖະມົນຕີການຕ່າງປະເທດ ທ່ານນາງ ຮິລເລິຣີ ຄລິນ
ຕັນ, ມະຫາເສດຖີພັນລ້ານທ່ານ ຈໍຈ໌ ໂຊໂຣສ໌ ແລະ ໂທລະພາບ CNN.
ບໍ່ມີລະເບີດລູກໃດໄດ້ແຕກ ກ່ອນຖືກສະກັດໄດ້ ແລະ ບໍ່ມີໃຜໄດ້ຮັບບາດເຈັບ.
ທ້າວ ຊາຢັອກ ຈະປະເຊີນໜ້າກັບການຖືກຂັງຄຸກ 48 ປີ ຖ້າຖືກຕັດສິນວ່າມີຄວາມ
ຜິດໃນຂໍ້ກ່າວຫາ 5 ກະທົງ ທີ່ຖືກຮ່າງຂຶ້ນ ໃນ ນິວຢອກ ຍ້ອນວ່າ ລະເບີດບາງລູກ
ແມ່ນຖືກກອບກູ້ໄດ້ຢູ່ທີ່ນັ້ນ.
