ເວລານີ້ລັດຖະບານລາວກຳລັງສືບຕໍ່ປາບປາມການຜະລິດ, ການໃຊ້ ແລະການລັກລອບຄ້າຂາຍຢາເສບຕິດຜິດກົດໝາຍ ແລະສະຫະລັດເອງກໍກຳລັງໃຫ້ການສະໜັບສະໜຸນໃນເລຶ່ອງນີ້ຢູ່.
ເມື່ອໝໍ່ໆມານີ້ ທ່ານ ຣາວິກ ຮູໂຊ ເອກອັກຄະລັດຖະທູດສະຫະລັດປະຈຳລາວ ໃນນາມລັດຖະບານສະຫະ ລັດ ໄດ້ເຊັນສັນຍາສະບັບແກ້ໄຂຂອງໜັງສືສັນຍາ ສຳລັບການຮ່ວມມືສອງຝ່າຍໃນການສະໜັບສະໜຸນການປາບປາມຢາເສບຕິດ ແລະການບັງຄັບກົດໝາຍ. ພິທີເຊັນສັນຍາດັ່ງກ່າວແມ່ນຈັດຂື້ນທີ່ນະຄອນຫລວງວຽງຈັນ ໂດຍມີ ທ່ານ ສຸບັນ ສະລິດທິລາດ ລັດຖະມົນຕີປະຈຳສຳນັກປະທານປະເທດລາວ ແລະປະທານຄະນະ ກຳມະການຄວບຄຸມແລະປາບປາມຢາເສບຕິດແຫ່ງຊາດລາວ ເປັນຜູ້ລົງນາມຕ່າງໜ້າລັດຖະບານລາວ.
ໜັງສືສັນຍາສະບັບນີ້ບົ່ງວ່າ ສະຫະລັດຈະໃຫ້ການຊ່ວຍເຫລືອແກ່ລາວ ໃນມູນຄ່າ ຫົກຮ້ອຍຫ້າສິບພັນໂດລາ ສຳລັບການປາບປາມຢາເສບຕິດ ແລະການປະຕິບັດກົດໝາຍປະຈຳປີ 2010 ນີ້ ຊຶ່ງໂຄງການເຫລົ່ານີ້ ຈະບໍລິຫານ ແລະດຳເນີນການໂດຍພະແນກບັງຄັບກົດໝາຍແລະຢາເສບຕິດ ຂອງສະຖານທູດສະຫະລັດ.
ງົບປະມານທີ່ບົ່ງໄວ້ຢູ່ໃນໜັງສືສັນຍາສະບັບດັ່ງກ່າວນັ້ນ ແມ່ນຈະຊ່ວຍລັດຖະບານລາວໃນການປະຕິບັດງານເພື່ອຫລຸດຜ່ອນຄວາມຮຽກຮ້ອງຕ້ອງການ ຢາກະຕຸ້ນປະສາດປະເພດຢາບ້າ ຫລື ຢາເສບຕິດຊະນິດອື່ນໆ ແລະໃຫ້ການປິ່ນປົວ ການບຳບັດພັກຟື້ນ ແລະການດູແລພວກຕິດຢາເສບຕິດ ຫລັງຈາກໄດ້ຮັບການປິ່ນປົວແລ້ວ. ພ້ອມດຽວກັນ ໜັງສືສັນຍານີ້ຍັງໄດ້ໃຫ້ການສະໜັບສະໜູນ ໃນດ້ານການເຝິກອົບຮົມແລະສະໜອງອຸປະກອນທີ່ຈຳເປັນໃຫ້ແກ່ພວກເຈົ້າໜ້າທີ່ລາວຝ່າຍບັງຄັບກົດໝາຍ ສຸນລະກາກອນ ແລະລະບົບສານອາຊະຍາກຳ ນໍາອີກ. ນອກນັ້ນແລ້ວ ກໍຍັງຈັດໃຫ້ມີການຊ່ວຍເຫລືອຈຳນວນນຶ່ງ ເພື່ອຫລຸດຜ່ອນການປູກແລະເກັບກ່ຽວຝິ່ນຕຶ່ມອີກ ສະໜອງພືດທົດແທນອື່ນໆ ແລະໃຫ້ລາຍໄດ້ເສີມ ແລະ ບຳບັດພວກຕິດຢາຝິ່ນ. ເປົ້າໝາຍ ຫລັກຂອງຄວາມພະຍາຍາມເຫລົ່ານີ້ ແມ່ນຈະສຸມໃສ່ແຂວງພົງສາລີ ແລະແຂວງຫົວພັນ.
ໃນລາຍງານວ່າດ້ວຍຍຸທະສາດການຄວບຄຸມຢາເສບຕິດ ທີ່ນຳອອກເຜີຍແຜ່ເມື່ອຕົ້ນປີນີ້ ກະຊວງຕ່າງປະເທດສະຫະລັດເວົ້າວ່າ ປະເທດລາວ ແມ່ນໄດ້ສ້າງຄວາມກ້າວໜ້າຢ່າງຫລວງຫລາຍໃນການປະຕິບັດງານເພື່ອຫລຸດຜ່ອນການປູກຝິ່ນລົງ ໃນລະວ່າງປີ 2000 ຫາ ປີ 2008 ນັ້ນ ແຕ່ຕົກມາໃນລະວ່າງປີ 2008 ແລະ 2009 ນັ້ນ ກັບປາກົດເຫັນມີການປູກຝິ່ນເພີ່ມຂື້ນ ແລະພ້ອມດຽວກັນ ກໍໄດ້ສັງເກດເຫັນມີການຊົມໃຊ້ຢາບ້າເພີ່ມຂື້ນໃນລາວ ແລະລາວກໍຖືວ່າເປັນເສັ້ນທາງຜ່ານທີ່ສຳຄັນຂອງຢາເຮໂຣອີນ ຢາກະຕຸ້ນປະສາດປະເພດຢາບ້າ ແລະສານເຄມີຕົ້ນ ຂອງຂົງເຂດເອເຊຍຕາເວັນອອກສຽງໃຕ້. ຂະບວນການການຄ້າຢາເສບຕິດຜ່ານປະເທດລາວ ແມ່ນມີໂຮມທັງພວກແກ໊ງອາຊະຍາກຳ ທີ່ມີສາຍພົວພັນ ກັບຂົງເຂດອາຟຣິກາ ອາເມລິກາລາຕິນ ຢຸໂຣບ ແລະສະຫະລັດ ຕລອດທັງພາກສ່ວນອື່ນໆຂອງຂົງເຂດເອເຊຍ.
ການຄ້າຢາເສບຕິດ ແມ່ນຖືວ່າເປັນໄພຂົ່ມຂູ່ຕໍ່ນາໆຊາດ ແລະຈຳເປັນຕ້ອງໄດ້ຮັບຄວາມຮ່ວມມືຈາກລະວ່າງຊາດ. ສຳລັບໃນພາກສ່ວນຂອງຕົນນັ້ນ ສະຫະລັດແມ່ນມີຄວາມໝັ້ນໝາຍທີ່ຈະປະຕິບັດງານ ກັບລັດຖະ ບານລາວແລະຜູ້ຮ່ວມງານອື່ນໆຈາກນານາຊາດ ເພື່ອນຳໃຊ້ຕົວບົດກົດໝາຍ ກັບພວກລັກລອບຄ້າຂາຍຢາເສບຕິດນັ້ນ.
