ລມຕ ຊ່ວຍ ERIC SCHWARTZ ຮັບຜິດຊອບເລື່ອງພົນລະເມືອງ ອົບພະຍົບ
ແລະຜູ້ຍົກຍ້າຍຖິ່ນຖານ ໄດ້ນຳພາຜູ້ແທນກະຊວງການຕ່າງປະເທດສະຫະລັດ
ຄະນະນຶ່ງທຳການເຄື່ອນໄຫວຢ້ຽມຢາມ ສປປ ລາວ ໃນລະວ່າງວັນທີ13 ຫາ 16
ມີຖຸນານີ້ ໂດຍໄດ້ເຂົ້າຢ້ຽມຄຳນັບ ທ່ານທອງລຸນສີສຸລິດ ລມຕ ການຕ່າງປະເທດລາວ
ໃນວັນອັງຄານວານນີ້ ຊຶ່ງທັງສອງຝ່າຍກໍໄດ້ສົນທະນາແລກປ່ຽນຄວາມຄິດຄວາມເຫັນ
ກັນ ກ່ຽວກັບຫລາຍເລື່ອງ ເປັນຕົ້ນແມ່ນການຮ່ວມມືສອງຝ່າຍ ບັນຫາພາກພື້ນແລະ
ຂົງເຂດ ແລະບັນຫາອື່ນໆອີກທີ່ທັງສອງຝ່າຍມີຄວາມສົນໃຈຮ່ວມກັນ.
ນອກນັ້ນ ທ່ານ ERIC SCHWARTZ ພ້ອມກັບຄະນະ ຍັງໄດ້ພົບປະກັບນາຍພົນ
ຈັດຕະວາ ບົວສ້ຽງ ຈຳປາພັນ ຮອງຫົວໜ້າກົມໃຫຍ່ເສນາທິການກອງ ທັບລາວ
ຊຶ່ງເປັນຫົວໜ້າຄະນະກຳມະການແກ້ໄຂບັນຫາຊາວອົບພະຍົບມົ້ງທີ່ຫລົບໜີໄປປະເທດໄທ
ແລະໄດ້ໄປຢ້ຽມຢາມ ບ້ານພັດທະນາໂພນຄຳ ທີ່ທາງການລາວໄດ້ຈັດສັນໄວ້ໃຫ້ຊາວມົ້ງ
ທີ່ກັບຄືນມາຈາກໄທ ຢູ່ແຂວງບໍລິຄຳໄຊນຳ.
ການຢ້ຽມຢາມ ສປປ ລາວ ໃນຄັ້ງນີ້ ມີຂຶ້ນໃນຂະນະທີ່ ລາວກັບສະຫະລັດ ກະກຽມ
ສະເຫລີມສະຫລອງໂອກາດຄົບຮອບ 55 ປີ ແຫ່ງການສ້າງຕັ້ງສາຍພົວພັນລະຫວ່າງກັນ
ແລະເປັນພາກສ່ວນນຶ່ງຂອງການເດີນທາງຢ້ຽມຢາມ 4 ປະເທດ ຂອງທ່ານ ERIC
SCHWARTZ ແລະຄະນະຜູ້ແທນກະຊວງການຕ່າງປະເທດສະຫະລັດ.
