ລັດຖະບານສະຫະລັດໄດ້ຍົກເລີກການລົງໂທດຕໍ່ທ່ານມຸສສາ ກຸສຊາ ອະດີດລັດຖະມົນຕີການຕ່າງປະເທດຂອງລີເບຍ ໂດຍກ່າວວ່າ ການເຄື່ອນໄຫວດັ່ງກ່າວນີ້ມີວັດຖຸປະສົງເພື່ອຊຸກຍູ້ໃຫ້ພວກເຈົ້າໜ້າທີ່ຂັ້ນອາວຸໂສອື່ນໆໃນວົງການລັດຖະບານຂອງທ່ານກາດດາຟີໂຕນໜີ ແລະແຕກອອກຈາກລັດຖະບານລີເບຍນັ້ນ.
ກະຊວງການເງິນສະຫະລັດກ່າວໃນວັນຈັນວານນີ້ວ່າ ຕົນໄດ້ຖອນຊື່ທ່ານກຸສຊາອອກຈາກບັນ
ຊີດຳຂອງພວກເຈົ້າໜ້າທີ່ລີເບຍທີ່ຖືກເກືອດຫ້າມບໍ່ໃຫ້ເດີນທາງມາຍັງສະຫະລັດແລະຊັບ
ສິນຂອງເຂົາເຈົ້າທີ່ຢູ່ໃນອໍານາດການຄວບຄຸມຂອງສະຫະລັດກໍໄດ້ຖືກຍຶດໄວ້.
ເຈົ້າໜ້າທີ່ອາວຸໂສທ່ານນຶ່ງໃນກະຊວງການເງິນສະຫະລັດກ່າວວ່າ ການໂຕນໜີຂອງທ່ານກຸສຊາແລະການຍົກເລີກການລົງໂທດຢ່າງກະທັນຫັນຕໍ່ທ່ານ ຄວນຈະຊຸກຍູ້ໃຫ້ພວກເຈົ້າໜ້າ
ທີ່ຄົນອື່ນໆໃນວົງການລັດຖະບານຂອງລີເບຍຕັດສິນໃຈໃນທໍານອງດຽວກັນກັບທ່ານກຸສຊານີ້ຕໍ່ລັດຖະບານກາດດາຟີນັ້ນ.
ເວລານີ້ມີເຈົ້າໜ້າທີ່ຂັ້ນອາວຸໂສຂອງລີເບຍ 13 ທ່ານຢູ່ໃນບັນຊີດໍາດັ່ງກ່າວ ຮວມທັງທ່ານ
ກາດດາຟີ ພ້ອມທັງພັນລະຍາແລະພວກລູກຊາຍຂອງທ່ານ. ກະຊວງການເງິນສະຫະລັດເວົ້າຕື່ມວ່າ ຕົນວາງແຜນທີ່ຈະຕື່ມຊື່ພວກເຈົ້າໜ້າທີ່ລີເບຍເຂົ້າໃນບັນຊີດັ່ງກ່າວໃນອີກບໍ່ເທົ່າໃດມື້ຕໍ່ໜ້ານີ້.
ໃນຂະນະດຽວກັນ ອັງກິດກ່າວວ່າ ຕົນໄດ້ຊັກຊວນທ່ານກຸສຊາໃຫ້ຮ່ວມໄມ້ຮ່ວມມືກັບທາງການ Scotland ໃນການສືບສວນການວາງລະເບີດໂຈມຕີໃສ່ເຮືອບິນລໍານຶ່ງຂອງສາຍການບິນ Pan Am ຂອງສະຫະລັດທີ່ຕົກລົງໃນເມືອງ Lockerbie ໃນປີ 1988 ນັ້ນ.
ທ່ານ William Hague ລັດຖະມຸນຕີການຕ່າງປະເທດອັງກິດ ກ່າວວ່າ ພວກເຈົ້າໜ້າທີ່ອັງກິດແລະພວກໄອຍະການ Scotland ໄດ້ພົບປະກັນໃນວັນຈັນວານນີ້ເພື່ອຈັດແຈງການສໍາພາດກັບອະດີດລັດຖະມົນ ລີເບຍທ່ານນີ້. ບັນດາເຈົ້າໜ້າທີ່ອັງກິດໄດ້ປະກາດໃຫ້ຮູ້ໃນວັນອາທິດຜ່ານມານີ້ວ່າ ພວກໄອຍະການ Scotland ຈະສອບຖາມອະດີດນັກການທູດລີເບຍທ່ານນີ້.
