ຜູ້ບັນຊາການສູງສຸດກອງກໍາລັງສະຫະລັດໃນເກົາຫຼີໃຕ້ ພວມຮ້ອງຂໍເອົາເຮືອບິນເຮລິ
ຄອບເຕີໂຈມຕີ ແລະເຮືອບິນສືບລັບເພີ່ມຕື່ມ ແລະເສີມຂະຫຍາຍລະບົບປ້ອງກັນລູກ
ສອນໄຟ ຊຶ່ງເປັນພາກສ່ວນນຶ່ງຂອງອັນທີ່ທ່ານເອີ້ນວ່າ ເປັນຄວາມພະຍາຍາມເພື່ອເສີມ
ຂະຫຍາຍຄວາມສາມາດໃນການສູ້ລົບ.
ນາຍພົນ James Thurman ກ່າວຕໍ່ກອງປະຊຸມທີ່ກຸງໂຊລ ໃນວັນອັງຄານມື້ນີ້ ວ່າ
ທ່ານໝັ້ນໃຈວ່າກະຊວງປ້ອງກັນປະເທດ ຈະສະໜອງຕອບຕໍ່ຄຳຮ້ອງຂໍຂອງທ່ານທີ່
ຢາກເພີ່ມສະມັດຖະພາບຂອງກອງທັບໃນເກົາຫລີໃຕ້ ຊຶ່ງຄໍາຮ້ອງຂໍນີ້ໄດ້ມີຂຶ້ນທ່າມ
ກາງທີ່ມີຄວາມຢ້ານກົວກັນເພີ່ມຂຶ້ນວ່າ ຈະມີການທ້າທາຍເກາະຜິດທາງທະຫານຈາກ
ເກົາຫຼີເໜືອທີ່ມີອາວຸດນີວເຄລຍນັ້ນ.
ໃນຕົ້ນເດືອນນີ້ ກຸງພຽງຢາງໄດ້ຂົ່ມຂູ່ທີ່ຈະໂຈມຕີບ່ອນຂາຍໜັງສືພິມນິຍົມແນວທາງເດີມ
ຫຼາຍໆສະບັບທີ່ກຸງໂຊລ ຫຼັງຈາກໜັງສືພິມເຫຼົ່ານີ້ໄດ້ຕໍາໜິຕິຕຽນຜູ້ນໍາຂອງເກົາຫຼີເໜືອ
ທ່ານ Kim Jong Un. ຫວ່າງບໍ່ດົນມານີ້ກຸງໂຊລ ກໍໄດ້ກ່າວຫາກຸງພຽງຢາງວ່າ ໄດ້ລົບ
ກວນສັນຍານບອກທິດທາງຈາກດາວທຽມ ທີ່ສົ່ງຜົນກະທົບຕໍ່ບັນດາເຮືອບິນໂດຍສານ
ແລະກໍາປັ່ນໃນເກົາຫຼີໃຕ້ນັ້ນ.
ນອກນັ້ນ ຍັງມີຄວາມເປັນຫວ່ງວ່າ ເກົາຫຼີເໜືອອາດຈະພະຍາຍາມທົດລອງອາວຸດນິວ
ເຄລຍຄັ້ງທີ່ 3 ຫຼັງຈາກທີ່ໄດ້ຮັບຄວາມອັບອາຍຂາຍໜ້າກ່ຽວກັບການທົດລອງລູກສອນ
ໄຟໄລຍະຍາວ ເມື່ອເດືອນເມສາຜ່ານມານີ້ ເຖິງແມ່ນກຸງພຽງຢາງຢືນຢັດວ່າ ຕົນບໍ່ໄດ້
ກະກຽມເພື່ອການທົດລອງນີ້ກໍຕາມ.
ໃນຂະນະດຽວກັນນີ້ ກອງກໍລັງຂອງສະຫະລັດແລະເກົາຫຼີໃຕ້ ໄດ້ທຳການຊ້ອມລົບຮ່ວມ
ກັນ ໃນວັນອັງຄານມື້ນີ້ ທີ່ເມືອງ Pocheon ຂອງເກົາຫຼີໃຕ້.
ປະຈຸບັນນີ້ສະຫະລັດ ມີທະຫານເກືອບ 30,000 ຄົນ ປະຈໍາການຢູ່ໃນເກົາຫຼີໃຕ້ ຊຶ່ງຍັງ
ສືບຕໍ່ຢູ່ໃນສະພາວະສົງຄາມມາດົນກວ່າ 60 ປີ ກັບເກົາຫຼີເໜືອ. ຂໍ້ຕົກລົງທີ່ຍຸຕິສົງຄາມ
ກາງເມືອງ ແຕ່ປີ 1950 ຫາ 53 ນັ້ນ ເປັນພຽງການຢຸດຍິງຊົ່ວຄາວເທົ່ານັ້ນ.