ປະທານາທິບໍດີ ສະຫະລັດ ທ່ານບາຣັກໂອບາມາກ່າວວ່າ ຂໍ້ຕົກລົງການຄ້າເສລີ ກັບເກົາຫລີໃຕ້ສະບັບໃໝ່ ຈະມີບົດບາດສຳຄັນໃນການຊຸກຍູ້ໃຫ້ເສດຖະກິດຂອງ ສະຫະລັດ ຟື້ນຕົວໄວຂຶ້ນ.
ທ່ານໂອບາມາໄດ້ສະແດງຄວາມເຫັນດັ່ງກ່າວ ຕໍ່ພວກນັກຂ່າວໃນວັນເສົາວານນີ້ ທີ່ນະຄອນຫລວງວໍຊິງຕັນ.
ທ່ານໃຫ້ຄຳໝັ້ນສັນຍາວ່າ ຂໍ້ຕົກລົງທາງການຄ້າດັ່ງກ່າວຈະເຮັດໃຫ້ມູນຄ່າສິນຄ້າສົ່ງອອກຂອງສະຫະລັດ ເພີ້ມຂຶ້ນໄດ້ຫລາຍເຖິງ 11 ພັນລ້ານໂດລາຕໍ່ປີ ແລະຊ່ວຍໃຫ້ມີວຽກເຮັດງານທຳພາຍໃນປະເທດໄດ້ ຢ່າງໜ້ອນ 70 ພັນໜ້າວຽກ ຊຶ່ງມັນຈະເຮັດ ໃຫ້ຜົນຜະລິດທາງເສດຖະກິດຂອງປະເທດ ເພີ້ມຂຶ້ນຫລາຍກວ່າ ທີ່ໄດ້ມາຈາກຂໍ້ຕົກລົງການຄ້າ 9 ສະບັບໃນເມື່ອກ່ອນ ໂຮມເຂົ້າກັນອີກ.
ປະທານາທິບໍດີສະຫະລັດ ຍັງກ່າວອີກວ່າ ຂໍ້ຕົກລົງສະບັບນີ້ຈະນຳຜົນປະໂຫຍດມາໃຫ້ພວກບໍລິສັດຜະລິດລົດຍົນຂອງສະຫະລັດ ຫລາຍເປັນພິເສດ ໂດຍອຳນວຍໃຫ້ພວກເຂົາເຈົ້າ ມີຊ່ອງທາງເຂົ້າເຖິງຜູ້ຊົມໃຊ້ໃນເກົາຫລີໃຕ້ຢ່າງກວ້າງຂວາງ ຂຶ້ນກວ່າເກົ່າ.
ຂໍ້ຕົກລົງສະບັບດັ່ງກ່າວຍັງຈະຕ້ອງໄດ້ຖືກຮັບຮອງເອົາໂດຍສະພານິຕິບັນຍັດຂອງທັງສອງປະເທດ. ແລະໃນເວລານີ້ ຢ່າງໜ້ອຍກໍມີຜູ້ແທນສຳຄັນຜູ້ນຶ່ງຂອງສະຫະລັດ ຊຶ່ງກໍຄື ທ່ານ Mitch McConnell ຜູ້ນຳພັກ Republican ໃນສະພາສູງ ໄດ້ໃຫ້ການ ສະໜັບສະໜູນແກ່ສັນຍາການຄ້າສະບັບນີ້ແລ້ວ.
