ໃນຂະນະທີ່ສະຫະລັດແລະບັນດາປະເທດສະມາຊິກຂອງສະຫະພາບຢູໂຣບສົນທະນາຫາລື
ກັນກ່ຽວກັບການຈຳກັດຮັດແຄບ ການສົ່ງອອກນໍ້າມັນທີ່ມີກຳໄລງາມຂອງອີຣ່ານຢູ່ນັ້ນບັນດາ
ປະເທດອື່ນໆກໍໄດ້ຖືກທາບທາມໃຫ້ຫຼຸດຜ່ອນຄວາມສຳພັນທາງດ້ານທຸລະກິດກັບເຕຫະຣ່ານ.
ໃນເດືອນແລ້ວນີ້ອົງການພະລັງງານປະລະມະນູສາກົນຂອງສະຫະປະຊາຊາດໄດ້ອອກລາຍ
ງານສະບັບນຶ່ງ ກ່າວເຖິງການມີຫຼັກຖານເພີ່ມຕື່ມທີ່ວ່າ ອີຣ່ານພວມດຳເນີນເພື່ອສ້າງອາວຸດ
ນິວເຄລຍ.
ເຕຫະຣ່ານເວົ້າວ່າ ກິດຈະການນິວເຄລຍຂອງຕົນແມ່ນມີຈຸດປະສົງເພື່ອຜະລິດກະແສໄຟຟ້າ
ທໍ່ນັ້ນ.
ແຕ່ລຸນຫຼັງທີ່ໄດ້ມີການພິມເຜີຍແຜ່ລາຍງານສະບັບນີ້ແລ້ວບັນດາປະເທດຕາເວັນຕົກໄດ້ດຳ
ເນີນມາຕະການ ເປັນລຳດັບມາ ທີ່ແນໃສ່ເພື່ອໂດດດ່ຽວອີຣ່ານເພີ່ມຕື່ມ. ໃນຖານະທີ່ເປັນ
ພາກສ່ວນນຶ່ງ ຂອງການເຄື່ອນໄຫວທາງດ້ານການທູດນັ້ນ ທີ່ປຶກສາຂອງກະຊວງການຕ່າງ
ປະເທດສະຫະລັດຮັບຜິດຊອບກ່ຽວກັບການຫ້າມແຜ່ຜາຍອາວຸດນິວເຄລຍແລະການຄວບ
ຄຸມອາວຸດ ທ່ານ Robert Einhorn ໄດ້ເດີນທາງໄປສາທາລະນະລັດເກົາຫຼີໃນສັບປະດາ
ແລ້ວນີ້.
ທ່ານ Einhorn ເວົ້າວ່າ ທ່ານເຂົ້າໃຈດີວ່າເກົາຫຼີໃຕ້ ຊຶ່ງມີຊັບພະຍາກອນນໍ້າມັນເຊື້ອໄຟບໍ່
ພຽງພໍຢູ່ແລ້ວນັ້ນ ອາດຈະມີຄວາມລັງເລໃຈ ໃນການທີ່ຈະຫຼຸດການຊື້ນໍ້າມັນດິບຈາກອີຣ່ານ
ລົງໃນປະລິມານທີ່ສຳຄັນ. ແຕ່ທ່ານເວົ້າວ່າ ເກົາຫຼີໃຕ້ແລະປະເທດພັນທະມິດອື່ນໆທີ່ຕົກຢູ່
ໃນສະຖານະການຄ້າຍຄືກັນນີ້ສາມາດປ່ຽນໄປຊື້ສານ ເຄມີນໍ້າມັນຈາກບ່ອນອື່ນໄດ້.
ທ່ານ Einhorn ເວົ້າວ່າ “ຂ້າພະເຈົ້າຄິດວ່າ ລັດຖະບານສາທາລະນະລັດເກົາຫຼີ
ຮັບຮູ້ເຖິງຄວາມສຳຄັນໃນການກ້າວມາເຖິງຈຸດໆນີ້ຢ່າງເປັນການສະເພາະເພື່ອ
ສົ່ງຄຳເຕືອນອັນຈະແຈ້ງ ເປັນນໍ້ານຶ່ງສຽງດຽວກັນໄປຍັງອີຣ່ານ. ຂ້າພະເຈົ້າຄິດ
ວ່າ ພວກເຮົາໄດ້ຮັບປະຕິກິລິຍາໃນທາງບວກ ທີ່ລັດຖະບານສາທາລະນະລັດ
ເກົາຫຼີກຳລັງສືບຕໍ່ທຳການພິຈາລະນາວ່າ ມາຕະການເພີ່ມຕື່ມ ອັນໃດທີ່ຕົນປະ
ສົງຈະດຳເນີນການນັ້ນ.”
ປະມານ 10% ຂອງນໍ້າມັນທີ່ເກົາຫຼີໃຕ້ນຳເຂົ້າທັງໝົດແມ່ນມາຈາກອີຣ່ານ.
ມູນຄ່າດັ່ງກ່າວນີ້ແມ່ນປະກອບເປັນເຄິ່ງນຶ່ງຂອງການຄ້າທັງໝົດລະຫວ່າງປະເທດທັງສອງ.
ແຕ່ນອກນັ້ນແລ້ວເກົາຫຼີໃຕ້ຍັງໄດ້ພິຈາລະນາເຖິງການມີຄວາມສຳພັນອັນໃກ້ຊິດກ່ຽວກັບ
ເທັກໂນໂລຈີໃນການສ້າງອາວຸດ ທີ່ກ້າວໜ້າທັນສະໄໝ ຊຶ່ງບາງທີອາດຮວມທັງອາວຸດນິວ
ເຄລຍນຳດ້ວຍລະຫວ່າງອີຣ່ານແລະເພື່ອນບ້ານທີ່ເປັນຄູ່ປໍລະປັກຂອງກຸງໂຊລນັ້ນກໍຄືເກົາ
ຫຼີເໜືອ.
ສະຫະລັດມີກຳລັງທະຫານຫຼາຍກວ່າ 28,000 ຄົນໃນເກົາຫຼີໃຕ້. ທະຫານອະເມຣິກັນໄດ້
ຖືກສົ່ງໄປປະຈຳການຢູ່ໃນປະເທດດັ່ງກ່າວ ນັບແຕ່ສົງຄາມເກົາຫຼີໃນຕົ້ນ ຊຸມປີ 1950. ໃນ
ດ້ານເທັກນິກແລ້ວ ສອງເກົາຫຼີ ແມ່ນຍັງຢູ່ໃນສະພາບສົງຄາມ ຍ້ອນວ່າບໍ່ທັນໄດ້ມີການລົງ
ນາມໃນຂໍ້ຕົກລົງສັນຕິພາບລະຫວ່າງກັນ.
ອີກເລື່ອງນຶ່ງ ທີ່ຢູ່ໃນແຜນການຂອງທ່ານ Einhorn ກໍແມ່ນ ການສົນທະນາກ່ຽວກັບການ
ຮື້ຟື້ນຂໍ້ຕົກລົງກ່ຽວກັບພະລັງງານນິວເຄລຍສະບັບປີ 1974 ລະຫວ່າງກຸງໂຊລແລະວໍຊິງຕັນ.
ຂໍ້ຕົກລົງ ຊຶ່ງໄດ້ໝົດອາຍຸເມື່ອ 3 ປີກ່ອນນັ້ນ ປັດຈຸບັນນີ້ໄດ້ ຫ້າມບໍ່ໃຫ້ເກົາຫຼີໃຕ້ນຳເຊື້ອໄຟ
ນິວເຄລຍທີ່ໃຊ້ແລ້ວໄປກັ່ນຄືນໃໝ່ ທີ່ສາມາດໃຫ້ທາດປລູໂຕນຽມ ເພື່ອສ້າງອາວຸດນິວເຄລຍ
ໄດ້ນັ້ນ.
ທ່ານ Einhorn ແມ່ນຮວມຢູ່ໃນບັນດາເຈົ້າໜ້າທີ່ສະຫະລັດຫຼາຍໆຄົນທີ່ໄດ້ເດີນທາງໄປຢ້ຽມ
ຢາມເກົາຫຼີໃຕ້ໃນໄວໆນີ້ເພື່ອປຶກສາຫາລືກ່ຽວກັບນະໂຍບາຍການຕ່າງປະເທດ.
ຜູ້ຕາງໜ້າພິເສດຄົນໃໝ່ຂອງສະຫະລັດຮັບຜິດຊອບກ່ຽວກັບນະໂຍບາຍເກົາຫຼີເໜືອ ທ່ານ
Glyn Davies ກໍໄດ້ຈະລະຈາຫາລືກັບເກົາຫຼີໃຕ້ເຊ່ນກັນ. ຫົວໜ້າເຈລະຈາໃນດ້ານນິວ
ເຄລຍຂອງສະຫະລັດກັບເກົາຫຼີເໜືອ ທ່ານ Clifford Hart ກໍໄດ້ຮ່ວມເດີນທາງໄປເກົາຫຼີ
ໃຕ້ໃນຄັ້ງນີ້. ຫົວໜ້າເຈລະຈາໃນດ້ານນິວເຄລຍຄົນກ່ອນ ຄືທ່ານ Sung Kim ເມື່ອໄວໆ
ມານີ້ໄດ້ຖືກແຕ່ງຕັ້ງໃຫ້ເປັນເອກອັກຄະລັດຖະທູດສະຫະລັດປະຈຳເກົາຫຼີໃຕ້.
ນອກນັ້ນແລ້ວ ມີກຳນົດເດີນທາງໄປເຖິງກຸງໂຊລກໍແມ່ນ ຮອງລັດຖະມົນຕີກະຊວງປ້ອງກັນ
ປະເທດສະຫະລັດ ຮັບຜິດຊອບກ່ຽວກັບເຂດເອເຊຍຕາເວັນອອກ ທ່ານ Derek Mitchell
ແລະທ່ານ Mitchell ຍັງເປັນທູດພິເສດຂອງສະຫະລັດຮັບຜິດຊອບກ່ຽວກັບເລື່ອງມຽນມາ
ນຳດ້ວຍ.
ລຸນຫຼັງການເດີນທາງໄປຢ້ຽມຢາມມຽນມາຄັ້ງປະວັດສາດຂອງລັດຖະມົນຕີການຕ່າງປະເທດ
ສະຫະລັດທ່ານນາງ Hillary Clinton ເມື່ອໄວໆມານີ້ ເປັນທີ່ຄາດກັນວ່າທ່ານ Mitchell
ຈະຮ້ອງຂໍການຊ່ອຍເຫຼືອຈາກເກົາຫຼີໃຕ້ເພື່ອກົດດັນ ໃຫ້ເຈົ້າໜ້າທີ່ມຽນມາຕັດຂາດທຸກຄວາມ
ສຳພັນທີ່ເປັນຄຳຖາມທີ່ຍັງເຫຼືອຢູ່ກັບເກົາຫຼີເໜືອ.
ເຈົ້າໜ້າທີ່ສະຫະລັດກ່າວວ່າ ໃນບັນດາເງື່ອນໄຂຕ່າງໆທີ່ຄວາມສຳພັນຂອງສະຫະລັດກັບ
ມຽນມາຈະໄດ້ຮັບການປັບປຸງໃຫ້ດີຂຶ້ນນັ້ນ ປະເທດດັ່ງກ່າວຈະຕ້ອງບໍ່ມີການ ຮ່ວມມືໃດໆ
ກ່ຽວກັບເລື່ອງລູກສອນໄຟແລະການສ້າງອາວຸດນິວເຄລຍກັບພຽງຢາງ.
